‏ Job 21

Dat .xxi. Capittel. 1MAer Iob antwoerdende heeft gheseyt, 2Hoort doch (dat bidde ick) mijn redenen, ende doet penitencie. 3Verdraecht my, dat ic oock mach spreken, ende nae mijn woerden (duncket v goet) soo lacht. 4Es mijn disputacie teghen eenen mensche, dat ic te rechte niet en behoire droeue te sijne? 5Aenmerct my, ende weest verbaest, ende legt den vingher op uwen mont. 6Ende wanneer ics ghe-dencke, soo vreese ick seere, ende die beuinghe scudt mijn vleesch. 7Waer om leuen dan die ongoddelijcke, ende sijn verheuen, ende versterct met rijckdommen? 8Hen saet blijft duerende voer hen, die scare van haren naesten, ende kinders kinderen sijn in hen aenscouwen. 9Haerlieden huysen sijn vrij, ende in vreden, ende Godts roede en is op hen niet. 10Hen coe heeft ontfanghen, ende en is niet misuaren van calue.

Hen veerse heeft ghecalft, ende sij en is niet berooft van haerder dracht. 11Hen cleyn kinderkens gaen wt als cudden, ende hen kinderen noch niet sprekende verhueghen hen met haren spelen. 12Sij houden die bomme ende die herpe, ende sij verblijden hen tot dat gheluyt der orghelen. 13Sij brenghen hen daghen ouer met weelden, ende op eenen ooghenblinck dalen sij neder ter hellen. 14Die Gode gheseyt hebben, gaet wech van ons, ende die kennisse van uwen weghen en willen wy niet. 15Wie is die almachtighe, dat wy hem dienen souden? ende wat batet ons eest dat wy hem bidden? 16Maer nochtans want hen goet niet en is in hen handen, soe sij der ongoddelijcken raet verre van mij. 17Hoe dicmael sal die lampe der ongoddelijcker wtghedaen worden, ende den ouervloet hen ouercomen, ende hoe dicmael sal hy die smerten van sijnder rasernien deylen? 18Sy sullen sijn als dat caff voer daensicht des wints, ende ghelijck dat gensterken welck den stormenden wint verstroyt. 19Godt sal diens kinderen bewaren die smerten des vaders, ende als hijt betalen sal, dan sal hijt weten. 20Sijn ooghen sullen sijn doodinghe sien ende van die rasende gramscap des almachtighen sal hy drincken. 21Want wat gaetet hem aene van sijnen huyse nae hem? ende oft tghetal sijnder maenden oock half gecort sal worden? 22Sal iemant Gode wetentheyt leeren, die de hooghe vonnist? 23Dese sterft vroem ende ghesondt, rijck ende gheluckich. 24Sijn inghewant is vol vets, ende met merch worden sijn beenderen veruerscht. 25Maer een andere sterft in die bitterheyt sijnder zielen, sonder eenighe rijcdommen.

26Ende nochtans sullen sij te samen int ghestubbe der eerde slapen, ende die wormen sullense ouerdecken.

27Voerwaer ick heb v ghedachten wel ghekent, ende v onrechte vonnissen teghen my. 28Want ghy segghet. Waer is thuys vanden prince? ende waer sijn die tabernakelen van die ongoddelijcke? 29Vraghet wien ghy wilt vanden wandelaers, ende ghy sult bekennen dat hy dese selue dinghen verstaet. 30Want tot den dach der verderffenissen wort die quade bewaert, ende totten dach der rasender gramscap sal hy gheleydt worden. 31Wie sal voer hem sijnen wech straffen? ende dat hy ghedaen heeft, wie salt hem betalen? 32Hy sal tot die grauen gheleyt worden ende in den hoop der dooden sal hy waken. 33Soet was hy den cleynen steenkens der truerigher beken, ende nae hem sal hy alle menschen trecken, ende voer hem ontellijcken vele. 34Waerom vertroost ghy my dan te vergheefs, aenghemerct dat ghetoont is dat v antwoerde teghen die waerheyt strijdt?