‏ Job 28

Dat .xxviij. Capittel. 1TIluer heeft sijnder aderen beghinselen, ende tgout sijn plaetse daert in ghesmolten wort. 2Het yser wort wter aerden ghenomen, ende den steen metter hitten ghesmolten wort in metael verkeert. 3Hy heeft der duysternissen tijt ghestelt, ende deynde van allen dinghen aenmerct hy.

Oock den steen des neuels, ende die scaduwe des doots. 4Die beke sceydt vanden vreemden volcke, die ghene die den voet vanden armen mensch vergheten heeft, ende die verdoelde. 5Dlant daer tbroot wt wies van sijnder plaetsen, is metten vier omgheworpen. 6Een plaetse wiens steenen Saphieren sijn, ende haer cluyten sijn gout. 7Dien wech en heeft gheen voghel gheweten, noch die ooghe van den ghier en heeft dien niet ghesien. 8Der coopluyden kinderen en hebben dien niet betreden, noch die leuwinne en heeft daer ouer niet gegaen. 9Totter keyen heeft hy sijn hant wtghesteken, hy heeft vanden wortelen die berghen omgheworpen. 10In die harde steenen heeft hy riuieren wt ghehouwen, ende alle dat costelijck is heeft sijn ooghe ghesien. 11Ende die diepten der vloeden heeft hy doersocht, ende die verborghen dinghen heeft hy int dlicht ghebracht.

12Maer waer wort die wijsheyt gheuonden? ende welck is die plaetse des verstants? 13Die mensch en weet haer weerde niet, noch sij en wort niet gheuonden int lant der gheender die sachtelijck leuen. 14Den afgront seyt, Sij en is my niet, ende die see spreect, Sy en is met my niet. 15Daer en sal gheen fijn gout voer haer ghegheuen worden, noch men sal gheen siluer weghen tot haer vermanghelinghe. 16Sij en sal niet gheleken worden by die gheuerwede verwen van Indien, noch by den aldercostelijcsten sardonir steen, oft den saphier. 17Gheen gout of ghelas en sal by haer gheleken worden, noch gheen gulden iuweelen en sullen voer haer vermanghelt worden. 18Gheen hooghe oft wtnemende vaten, en sullen ghenoemt worden in haer ghelijckenisse, maer die wijsheyt wort ghetrocken wt die verborghen dinghen. 19By haer en sal niet gheleken worden den Topasius vander morianen lant, noch sij en sal teghen die aldersuyuerste verwe niet ghestelt worden. 20Van waer coemt dan die wijsheyt? ende welck es die plaetse des verstants? 21Sy is verborghen wt die ooghen van allen die leuen, ende den voghelen des hemels is sij ombekent. 22Die verdoemenisse ende die doot hebben gheseyt Met onsen ooren hebben wy haer fame ghehoort. 23Godt verstant haren wech, ende hy kent haer plaetse. 24Want hi aensiet die eynden der werelt, ende alle dat onder den hemel es aenscouwet hy. 25Die den winden heeft een ghewicht ghemaect, ende weecht die wateren in een mate. 26Doen hy den reghenen een wet stelde, ende eenen wech den ruyschenden slach reghenen. 27Doen heeft hy die ghesien ende vertelt, ende te voeren bereydt, ende ondersocht. 28Ende hy seyde den mensche. Siet die vreese Godts, dat is die wijsheyt, ende tquaet te scouwen, dats verstandicheyt.