‏ Mark 3

Dat .iij. Capittel. ✣ 1ENde hi is wederom in die Sinagoge ghegaen ende daer was een man hebbende een dorre hant, 2Ende sij sloeghen hem gade oft hi op die sabboth daghen ghenesen soude, om dat sij hem souden besculdighen, 3Ende hy seyde totten mensch die die dorre hant hadde. Staet op int midden, 4Ende hy seyde tot hen. Eest gheorloft op die sabboth daghen wel te doen oft qualijck? een ziele te behouden oft te dooden? Maer sij sweghen, 5Ende hen rontsomme aensiende met gramscappen bedroeft wesende van die blentheyt haerder herten heeft hy gheseyt totten mensche. Steect v hant wt, Ende hi heeftse wtghesteken, ende die hant is hem wederom ghesont ghegheuen. ✴ 6Ende die Phariseen ter stont wtghaende metten Herodianen hielden eenen raet teghen hem, hoe si hem dooden souden, 7Maer Iesus met sijnen discipelen is gheweken ter zeewaerts, ende een groote scare van Galileen ende Iudeen is hem gheuolcht, 8ende van Ierusalem, ende van Idumeen, ende van ouer die Iordane, ende die omtrent Tyrus ende Sidon waren een groote menichte hoorende wat hi dede, sijn tot hem ghecomen, 9Ende hy heeft sijnen discipelen gheseyt dat hem tsceepken dienen soude om der scaren wille, dat sij hem niet verdringhen en souden, 10want hi maecter veel ghesont, al soo dat sij hem ouerliepen om hem te ghenaken alle die eenighe siecten hadden, 11Ende die onsuyuer gheesten als sij hem saghen soo vielen sij voor hem neder, ende riepen segghende. 12Ghy sijt die sone Gods, Ende hi dreychdese seer dat sij hem niet openbaer maken en souden, 13Ende climmende op eenen berch heeft hi tot hem gheroepen die hi selue wilde, ende sij sijn tot hem ghecomen, 14Ende hi heeft ghemaect datter twaelue met hem sijn souden ende dat hi hen soude senden te preken, 15Ende hi heeft hen macht ghegheuen siecken te ghenesen, ende duyuelen wt te worpen, 16Ende hy heeft Simon den naem Petrus ghegheuen, 17ende Iacobum Zebedeus sone, ende Iohannem Iacobus broeder, ende hy heeft hen namen ghegheuen Boanerges, dat is kinderen des donders, 18ende Andream, ende Philippum, ende Bartholomeum, ende Matheum, ende Thomam, ende Iacobum Alpheus sone, ende Thaddeum, ende Simonem den Cananeusschen 19ende Iudam den Iscarioter die hem oock verraden heeft, 20Ende sij comen tot een huys, ende daer is wederom een scare vergadert, alsoo dat sij ooc gheen broot eten en mochten, 21Ende doent die sijne ghehoort hadden, soo sijn sij wtghegaen om hem te houden, Want sij seyden. Hy is in een rasernie verkeert, 22Ende die Scriben die van Ierusalem nederwaerts comen waren seyden. Hy heeft Beelzebub in hem, ende door den prince der duyuelen worpt hi die duyuelen wt, 23Ende als hy hen te samen gheroepen hadde, so seyde hy hen in ghelijckenissen, Hoe mach Satanas Satanam wtworpen? 24Ende eest sake dat een rijck in sij seluen ghesceyden wort dat rijck en mach niet staen, 25Ende eest dat een huys teghen sij seluen ghedeylt wordt, so en mach dat huys niet staen, 26Ende eest dat Satanas opstaet teghen si seluen, soo is hi ghesceyden, ende hy en mach niet staen, maer hy heeft een eynde, 27Niemant en mach die ghereetscappen van eenen stercken, in sijn huys ghegaen sijnde, roouen, ten sij dat hy ierstmael den stercke binde, ende dan sal hy sijn huys beroouen, 28Voorwaer ic segghe v lieden dat den kinderen der menschen alle sonden sullen vergheuen worden, ende die blasphemien waer mede sij gheblasphemeert hebben, 29maer soo wie blasphemeert inden heyleghen gheest, die en heeft gheen verghiffenisse inder eewicheyt, maer hy sal schuldich sijn des eewighen misdaets, 30Om dat sij seyden, Hy heeft eenen onsuyueren gheest, 31Ende sijn moeder ende broeders comen, ende buyten staende hebben sij ghesonden aen hem, roepende hem, 32Ende daer sadt rontsomme hem een scare, ende sij segghen tot hem. Siet v moeder ende v broeders daer buyten begheren v, 33Ende hy hen antwoordende heeft gheseyt. Wie is mijn moeder ende mijn broeders? 34Ende rontsomme aensiende die ghene die rontsomme hem saten heeft hi gheseyt. Siet hier mijn moeder ende mijn broeders, 35Want wie Godts wille doet, dese is mijn broeder ende suster ende moeder.