‏ Mark 9

Dat .ix. Capittel. 1ENde hi seyde tot hen. Voorwaer ick segghe v lieden, datter sommighe sijn vanden ghenen die hier staen die den doot niet smaken en sullen, tot dat sij ghesien hebben het rijck Gods comende met crachte, 2Ende nae ses daghen heeft Iesus met hem ghenomen Petrum ende Iacobum, ende Iohannem, ende hy leyt die op eenen hooghen berch besijden alleene, ende hi werde verandert van ghedaente voor henlieden, 3Ende sijn cleederen sijn gheworden blinckende ende bouen maten seer wit ghelijck sneeu hoedanighe gheen volder en mach wit blinckende maken op die eerde, 4Ende hen openbaerde Elias met Moyses ende sij waren sprekende met Iesu, 5Ende Petrus antwoordende heeft tot Iesum gheseyt. Rabbi tis ons goet hier te sijn, ende laet ons maken drij tabernakelen, Voor v een, ende voor Moyses een, ende voor Elias een, 6Want hy en wist niet wat hy seyde, want sij waren van vreesen seer veruaert, 7ende daer is een wolcke ghecomen hen ouerlommerende ende een stemme is van der wolcken ghecomen segghende. Dit is mijnen alderliefsten sone, Hoort dien, 8Ende ter stont rontsomme siende soo en hebben sij niemanden meer ghesien dan alleen Iesum met hen, 9Ende als sij vanden berch quamen soo heeft hy hen gheboden dat sij niemande tghene datse ghesien hadden en souden vertellen, dan als die sone des menschen van die dooden soude verresen sijn, 10Ende sij hebben dit woort bewaert bi hen seluen onder malcanderen ondervraghende wat dat was, Als hy vanden dooden sal verresen sijn, 11Ende sij vraechden hem segghende. Wat segghen dan die Phariseen ende Scriben dat Elias ierst comen moet? 12Die welcke antwoordende heeft tot hen gheseyt. Elias als hi sal ghecomen sijn, ten iersten sal hy alle dinghen weder oprechten, ende ghelijckerwijs datter ghescreuen is vanden sone des menschen, dat hy veel lijden soude, ende versmaet worden, 13Maer ick segghe v lieden. Dat Elias oock ghecomen is, ende sij hebben hem ghedaen al dat sij ghewilt hebben, alsoo ghescreuen is van hem, 14Ende comende tot sijn discipelen heeft hy ghesien een groote scare omtrent haerlieden, ende die Scriben disputerende met hem, 15Ende ter stont alle tvolck Iesum siende is seer verwondert gheworden, ende sij verscricten hen, ende tot hem loopende hebben sij hem ghegroet 16Ende hy heeft hemlieden ghevraecht. Wat disputeerdi onder v lieden. ✣ 17Ende een wter scaren antwoordende heeft gheseyt. Meester ick heb mijnen sone tot v ghebrocht hebbende binnen eenen stommen gheest 18die welcke waer hy hem aenueert so stoot hy hem erghers teghen ende hy scuymt ende crijselt metten tanden ende hy verdorret, ende ick heb uwen discipelen gheseyt dat sij dien wtworpen souden, ende sij en hebbens niet connen ghedoen, 19Die welcke antwoordende heeft tot hen gheseyt. O ghi ongheloouich gheslachte, hoe langhe sal ic bi v sijn? hoe langhe sal ic v lijden? brengt dien tot my, 20Ende sij hebben dien by ghebracht, Ende als hy dien ghesien hadde ter stont soo heeft den gheest hem ghequelt ende ghestooten sijnde teghen der eerden wentelde hy al scuymende, 21Ende hy heeft sijnen vader ghevraecht, Hoe veel tijts eest voorleden van dat hem dit ghebuert is, Hy seyde. Van sijnder kintscheyt, 22ende hy heeft hem dicmael int vier ende int water gheworpen, om dat hy hem dooden soude, Maer eest dat ghy iet vermoecht, soo helpt ons doch onser ontfermende, 23Ende Iesus seyde tot hem. Moechdi gheloouen, alle dinghen sijn moghelijck den gheloouende. 24Ende ter stont die vader des kints luyde roepende, seyde met tranen. Ick ghelooue Heere, helpt mijn ongheloouicheyt, 25Ende als Iesus sach die scare te hoope loopende, soo heeft hy den onsuyueren gheest ghedreycht segghende tot hem. Ghy dooue ende stomme gheest, ic ghebiede v gaet wt hem, ende coemt voorts aen niet meer in hem, 26Ende seer crijsschende, ende hem seer scorende is hy van hem wtghegaen, ende hi is gheworden als een doode, also datter veel seyden. Hy is doot 27Maer Iesus nemende sijn hant heeft hem opghehauen, ende hi is opghestaen, 28Ende als hi in huys ghecomen was, soo hebben sijn discipelen hem heymelijck gheuraecht, Waerom en hebben wij dien niet connen wtgheiaghen? 29Ende hy heeft hem gheseyt dien aert en mach nerghers door wtgaen, dan door bidden ende vasten. ✴ ✣ 30Ende van daer ghereyst sijnde ghinghen sij voorbi Galileen ende hi en wilde niet dat iemant wiste, 31Ende hi leerde sijn discipelen, ende seyde tot hen. Die sone des menschen sal gheleuert worden in der menschen handen, ende sij sullen hem dooden ende hi ghedoot sijnde sal verrijsen ten derden daghe, 32Maer sij en verstonden dat woort niet, ende sij vreesden hem te vraghen, 33Ende sij sijn ghecomen in Capharnaum, Die welcke als hi thuys was so vraechde hi hen. Wat disputeerde ghi opden wech, 34Maer sij sweghen, want sij hadden opden wech ghedisputeert wie van henlieden die meeste wesen soude, 35Ende nedersittende heeft hi die twaelue gheroepen ende seyde tot hen. Eest dat iemant wilt dierste sijn, die sal die laetste van allen ende die dienaer van allegader sijn, 36Ende nemende een kint heeft hi dat ghestelt int midden van henlieden, het welcke als hi omhelst hadde soo heeft hi tot hen gheseyt. 37Soo wie een van desen kinderen ontfanghet in mijnen naem, die ontfanct my, ende soo wie my ontfanghet, die en ontfanct mi niet, maer hem die mi ghesonden heeft. ✴ ✣ 38Ende Iohannes heeft hem gheantwoort segghende. Meester wij hebben eenen ghesien door uwen naem duijuelen wtworpende, die ons niet en volcht, ende wij hebbent hem verboden, 39Maer Iesus seyde. En wilt dien niet verbieden, Want niemant en isser die cracht doet door mijnen naem, ende haest soude moghen qualijck spreken van my, 40Want soo wie niet en is teghen v lieden, die is voor v, 41want soo wie v te drincken gheeft eenen croes waters in mijnen naem om dat ghi Christo toebehoort, Voorwaer ick segghe v die en sal sijnen loon niet verliesen, 42Ende soo wie verarghert een van desen cleynen die in my gheloouen, het waer hem beter datter eenen molensteen om sijnen hals ghebonden ware, ende dat hy in die zee gheworpen worde, 43Ende eest oock dat v hant v verarghert snijtse af, tis v beter dat ghi met eender hant ghaet int leuen, dan dat ghi twee handen hebbende ghaet int die helle, in dat onblusschelijck vier 44daer haren worm niet en sterft, ende tvier niet wtghebluscht en wort, 45Eest ooc dat uwen voet v verarghert snijdt dien af want tis v beter cruepel te ghaen int eewich leuen, dan twee voeten hebbende gheworpen te worden in die helle des onblusschelijcs viers, 46daer haren worm niet en sterft, ende het vier niet wtghebluscht en wort, 47Maer eest dat v ooghe v verarghert soo worpt die wte, tis v beter met eender ooghen te gaen int rijck Godts, dan twee ooghen hebbende gheworpen te worden in die helle des viers, 48daer haren worm niet en sterft, ende tvier niet wtghebluscht en wort. ✴ 49Want een ieghelijc sal door tvier ghesouten worden, ende alle slachofferande sal met sout ghesouten worden, Tsout is goet, maer eest dat het sout crachteloos is waer mede suldy dat souten? Hebt in v lieden sout, ende hebt vrede onder v lieden.