‏ Matthew 20

Dat .xx. Capittel. ✣ 1HEt rijck der hemelen is ghelijck eenen mensch die vader des huysghesins is, die wtghegaen is ten iersten morghenstont, om werckluyden te hueren in sijnen wijngaert. 2Ende als hy ouercomen was metten wercluyden om den daghelijcschen penninck, heeft hy die ghesonden in sijnen wijngaert. 3Ende wt ghegaen sijnde omtrent der derder vre, heeft hy ander ghesien op die merct ledich staende, 4en hy heeft dien gheseyt, Gaet ghy oock in den wijngaert, ende wat recht is dat sal ick v gheuen. 5Ende sij sijn wech ghegaen. Ende wederom is hy wtghegaen omtrent der sester ende neghenster vren, ende heeft desghelijcs ghedaen. 6Maer omtrent die elfste vre is hy wtghegaen, ende heefter ander staende gheuonden, ende hy seyt tot die, Waer om staedi hier alle den dach ledich? 7Ende sij segghen hem, Om dat ons niemant ghehuert en heeft, Hy seyt dien, Gaet ghy lieden ooc in den wijngaert. 8Ende alst auont gheworden was, soe seyt die heere vanden wijngaert tot sijnen huysmeester, Roept die wercluyden, ende betaelt hen haren loon, beginnende vanden laetsten totten iersten. 9Als sij dan quamen die omtrent der elfster vren ghecomen waren, hebben sij elck eenen penninck ontfanghen. 10Ende die ierste oock comende hebben ghemeynt dat sij meer ontfanghen souden, ende sij hebben ontfanghen elck eenen penninck. 11Ende ontfanghende hebben sij ghemurmureert teghen den vader des huysghesins 12segghende, Dese alder laetste en hebben maer een vre ghewracht, ende ghy hebt die ons ghelijck ghemaect, die den last van den daghe ghedraghen hebben ende die hitte? 13Ende hy antwoerdende heeft tot eenen van dien gheseyt, Vrient ick en doe v gheen onghelijck, en sijt ghy niet om eenen penninck met my ouercomen? 14Neemt dat uwe is, ende gaet henen, ick wil oock desen laetsten gheuen ghelijc v. 15Oft en eest my niet gheorloft te doen dat ic wille? Es v ooghe quaet om dat ick goet ben? 16Alsoe sullen die laetste dierste wesen, ende dierste die laetste. Want veel isser gheroepen, ende luttel wtuercoren. ✴ ✣ 17Ende Iesus opwaerts gaende nae Ierusalem, heeft tot hem ghenomen die twaelf discipelen secretelijck, ende heeft hen gheseyt, 18Siet wy gaen opwaerts nae Ierusalem, ende die sone des menschen, sal gheleuert worden den princen der Priesteren, ende den Scriben, ende sij sullen hem ter doot verwijsen, 19ende sij sullen hem den Heydenen leueren om te bespotten, ende te gheesselen, ende te cruycen, ende opden derden dach sal hy weder opstaen. ✴ ✣ 20Doen is tot hem ghecomen die moeder van Zebedeus kinderen, met haren sonen, aenbiddende ende begherende wat van hem. 21Die welcke heeft haer gheseyt, Wat wildi? Ende sij seyde hem, Segt dat dese mijn twee sonen sitten deen aen v rechte hant, ende dander aen v slincke hant in v rijck. 22Ende Iesus antwoerdende heeft gheseyt, Ghy en weet niet wat ghy begheert. Moechdi drincken den kelck den welcken ick drincken sal. Sy hebben hem gheseyt, Iae wy. 23Hy heeft hen gheseyt, Mijnen kelck suldi voerwaer drincken, maer te sitten aen mijn rechte hant, ende slincker hant, dat en behoirt my niet v lieden te gheuen, maer den ghenen diet bereydt is van mijnen vader. 24Ende dit hoorende die thiene hebben hen verbolghen van die twee broeders. 25Maer Iesus heeftse tot hem gheroepen ende gheseyt, Ghy weet wel dat die Princen der heydenen heerscappie ouer hen hebben, ende die de meeste sijn ghebruycken macht ouer hen, 26Maer alsoe en salt niet wesen onder v lieden, maer soe wie dat onder v lieden wilt die meeste worden, die sij v lieder dienaer, 27ende die onder v lieden wilt dierste sijn sal v lieder dienaer sijn, 28ghelijck die sone des menschen niet comen en is om ghedient te worden, maer om te dienen, ende sijn ziele te gheuen tot een verlossinghe voor vele. ✴ ✣ 29Ende als sij van Iericho ghinghen, soe is hen een groote schare gheuolcht, 30ende siet twee blenden sittende by den wech hebben ghehoort dat Iesus voerby ginck, ende sij hebben gheroepen segghende, Heere ontfermt v onser Dauids sone. 31Ende die scare straftese dat sij swijghen souden, Maer sij riepen te meer segghende, Heere ontfermt v onser Dauids sone. 32Ende Iesus heeft ghestaen ende hy heeftse gheroepen ende gheseyt. Wat wildi dat ick v doe? 33Sij segghen tot hem, Heere dat onse ooghen gheopent worden. 34Ende Iesus haerder ontfermende heeft hen ooghen gheraect. Ende ter stont hebben sij ghesien, ende sijn hem gheuolcht. ✴