‏ Matthew 28

Dat .xxviij. Capittel. ✣ 1MAer opden sabboth auont den welcken beghint te schijnen ten iersten daghe vanden sabboth soo is ghecomen Maria magdalene ende die ander Maria om te besien het graf, 2Ende siet daer is een groote eertbeuinghe ghesciet, want een Enghel des Heeren is nedercomen vanden hemel, ende aencomende heeft hy den steen weder afghewentelt ende sadt op dien, 3ende sijn aensicht was ghelijck eenen blixem ende sijn cleedt ghelijck sneeu, 4Ende wt die vreese van hem, soo sijn die bewaerders verscrict gheweest, ende sijn gheworden als dooden, 5Maer die Enghel antwoordende heeft gheseydt tot die vrouwen. En wilt ghy niet vreesen, want ick weet wel dat ghy Iesum soect die ghecruyst is, 6Hy en is hier niet, want hy is opghestaen ghelijck hi gheseyt heeft, Coemt ende besiet die plaetse daer die Heere gheleydt was, 7Ende haestelijck gaende segghet sijnen discipelen dat hy opghestaen is, ende siet hy gaet v voren in Galileen, daer suldi hem sien, siet ick hebt v te voren gheseyt. ✴

8Ende sij sijn haestelijck ghegaen wten graue met vreesen ende met grooter blijscappen loopende om die bootschap te draghen sijnen discipelen, 9Ende siet Iesus is hen te ghemoete ghecomen segghende. Weest ghegroet, Ende si sijn by hem ghecomen ende hebben sijn voeten ghehouden ende hem aenghebeden, 10Doen seyde Iesus tot hen. En wilt niet vreesen gaet henen ende bootscapt mijnen broeders, dat sij gaen in Galileen daer sullen sij my sien, 11Ende als sij wech ghegaen waren, siet soo sijnder sommighen vanden bewaerders ghecomen in die stadt, ende hebben ghebootscapt den princen der priesteren alle die dinghen die daer ghesciet waren, 12Ende sij vergadert sijnde metten ouders als si raet ghenomen hadden, soo hebben sij seer veel ghelts den ruyters ghegheuen 13segghende. Segt sijn discipelen sijn des nachts ghecomen, ende hebben hem ghestolen, die wijle dat wij sliepen, 14Ende eest sake dat dit ghehoort wort vanden president, so sullen wi hem dat wijs maken, ende wij sullen v versekeren. 15Ende als si het ghelt ontfanghen hadden soo hebben sij ghedaen ghelijck sij onderwesen waren, Ende dit woort is al om verbreydt gheweest by die Ioden tot opden dach van heden toe. ✣

16Ende die elf discipelen sijn wech gheghaen in Galileen opden berch daert hen Iesus ghestelt hadde, 17Ende sij hem siende hebben hem aenbeden, maer die sommighe hebben ghetwijfelt, 18Ende Iesus naerder comende heeft hen aenghesproken segghende. My is alle die macht ghegheuen inden hemel ende inder eerden, 19daerom gaende leert alle tvolck doopende die inden naem des vaders, ende des soons, ende des heylichs gheests, leerende hen bewaren alle die dinghen die ick v lieden beuolen hebbe, 20ende siet ick ben met v lieden tot allen daghen, tot die voleyndinghe der werelt. ✴ Hier voleyndt S. Matheus Euangelie.