‏

Tot Philemonem

Hier beghint die Epistel van sinte Pauwels tot Philemonem.

‏ Philemon

1PAULUS een gheuanghen Iesu Christi, ende Timotheus een broeder Philemoni onsen beminden ende medehelper 2ende Appie onser alderliefster suster, ende Archippo onsen medestrijder, ende der kercken die in v huys is. 3Gratie sij v ende vrede van God onsen vader ende vanden Heere Iesu Christo, 4Ic danc mijnen Godt altijt uwer ghedenckenisse houdende in mijnen ghebeden, 5hoorende v liefde, ende ghelooue, die ghy hebt inden Heere Iesu, ende tot alle die heylighen, 6op dat die ghemeynscap ws gheloofs mach openbaer worden tot kennisse van alle tgoet dat in v lieden is in Christo Iesu. 7Want ick heb groote ghenuechte ghehadt, ende vertroostinghe in v liefde, want die binnenste leden der heylighen hebben gherust door v broeder, 8Waerom ick groot betrouwen hebbende in Christo Iesu om v te ghebieden, tghene dat profijtelijck is, 9soo bidde ick nochtans lieuer om der liefden wille, aenghesien dat ghy sulck sijt als die oude Paulus, maer nv oock een gheuanghen Iesu Christi, 10Ic bidde v voor mijnen sone den welcken ick ghewonnen hebbe in die banden, Onesimo, 11die v somtijts onnut gheweest heeft, maer nv is hy my ende v nuttelijck, 12den welcken ick v wederom heb ghesonden, Maer ontfanct hem als mijn binnenste 13den welcken ick wel ghewilt hadde by my te behouden, om dat hy voor v my dienen soude in die banden des Euangelijs, 14maer sonder uwen raet en wilde ic niet doen, op dat v duecht niet sijn en soude wt bedwanck maer ghewillich, 15want by auontueren is hy daerom eenen cleynen tijt van v ghesceyden, op dat ghy hem inder eewicheyt soudt wederom ontfanghen, 16nv niet als eenen knecht, maer voor eenen knecht eenen alderliefsten broeder, alderdermeest my, hoe veel te meer v oock int vleesch ende inden Heere? 17Daerom eest dat ghy my houdt als eenen medegheselle, soo ontfant hem als my. 18Maer eest dat hy v eenighe scade ghedaen heeft, oft v iet sculdich is, rekent dat op mi. 19Ick Paulus hebt met mijn hant ghescreuen, ick salt betalen, op dat ick v niet en segghe dat ghy oock v seluen my sculdich sijt. 20Alsoo broeder laet my ws met vruechden ghenieten inden Heere, Vermaect mijn inwendighe leden, inden Heere, 21Betrouwende in uwe ghehoorsaemheyt heb ick v ghescreuen, wetende dat ghi meer doen sult dan ic segghe. 22Daer toe bereydt my die herberghe, want ick hope dat ick door uwe ghebeden v lieden weder ghegheuen sal worden, 23Epaphras mijn mede gheuanghene in Christo Iesu groet v, 24Marcus, Aristarchus, Demas, ende Lucas mijn helpers. 25Die gratie ons Heeren Iesu Christi sij met uwen gheest, Amen. Hier voleynt die Epistel van sinte Pauwels tot Philemonem.