Pro 13 | NldLeuv1548 | STEP | EEn wijs kint is des vaders leeringhe, maer die een spotter is en hoort niet als hy ghestraeft wort.

‏ Proverbs 13

Dat .xiij. Capittel. 1 EEn wijs kint is des vaders leeringhe, maer die een spotter is en hoort niet als hy ghestraeft wort. 2 Van die vrucht sijns monts sal die mensch versaedt worden met goeden, maer die ziele der ouertreders is ongherechtich. 3 Die sijnen mont bewaert, die bewaert sijn ziele, maer die ombedacht is van spreken sal quaet ghevuelen. 4 Een traech mensch wilt ende hy en wilt niet, maer die ziele der gheender die wercken sal vet worden. 5 Die rechtuerdighe sal een loghenachtich woort verfoeyen, maer een ongoddelijcke sal bescamen ende bescaemt worden. 6 Die rechtuerdicheyt bewaert den wech vanden onsculdighen, maer die ongoddelijcheyt vertreedt den sondare. 7 Daer is een als rijck gheacht die nochtans niet en heeft, ende daer is een als arm die nochtans in veel rijckdommen is. 8 Die verlossinghe van eens mans ziele is sijnen rijckdom, maer die arm is, en verdraecht die straffinghe niet. 9 Dlicht der rechtuerdigher verblijdt, maer dat lichtuat der ongoddelijcker sal wt ghedaen worden. 10 Tusschen die hoouerdighe sijn altijt kijuagien, maer die alle dinghen met raet doen worden vander wijsheyt gheregeert. 11 Haestighen rijckdom sal ghemindert worden, maer die allinxkens metter hant verghadert wort, sal vermenichfuldicht worden. 12 Die hope die wtghesteldt wort quelt die ziele, een hout des leuens is een comende begheerte. 13 Wie eenich dinck lastert, die verbint sij seluen in toecomende tijden, maer die tghebodt vreest sal in vrede wandelen. Die bedrieghelijcke zielen dolen in sonden, maer die rechtuerdighe sijn bermhertich, ende doen bermherticheyt. 14 Die wet vanden wijsen is een fonteyn des leuens, dat hy af wijcken soude vanden val des doots. 15 Goede leeringhe sal gratie gheuen, inden wech vanden versmaders is een verslindende diepte. 16 Een scalck doet alle dinghen met raede, maer die dwaes is opent die dwaesheyt. 17 Die bode vanden ongoddelijcke sal int quaet vallen, maer een ghetrou legaet is ghesontheyt. 18 Armoede ende schande ouer hem die de castijnghe verlaet, maer wie hem te ghenoeghe gheeft den ghenen die hem straft, die sal gheeert worden. 19 Als een begheerte volbracht wort soo doet sij der zielen wellust aen, die sotten versmaden hen die van quade dinghen vlieden. 20 Die metten wijsen gaet, sal wijs worden, een vrint der dwasen sal haers ghelijck worden. 21 Den sondaers veruolcht dat quaet, ende den rechtuerdighen sullen goede dinghen ten loon ghegheuen worden. 22 Die goede laet erfghenamen achter kinderen ende kints kinderen, ende die rijckdom des sondaers wordt voor den rechtuerdighen bewaert. 23 Veel spijsen sijn in die nieuwe ackers der vaderen, ende die worden voor andere verghadert sonder oordeel. 24 Die de roede spaert haet sijnen sone, maer die dien liefheeft die onderwijst hem neerstelijck. 25 Die rechtuerdighe eet ende veruult sijn ziele, maer den buyck der ongoddelijcken is onuersadelijck.