‏ Proverbs 27

Dat .xxvij. Capittel. 1EN wilt v niet beroemen vanden morghen niet wetende wat den toecomenden dach voertbrenghen sal. 2Laet een ander v prijsen, ende niet uwen mont, eenen vreemden, ende niet uwe lippen. 3Steen es swaer ende sandt es lastich, maer die gramscap van eenen dwasen es swaerder dan dese beyde. 4Die gramscap en heeft gheen bermherticheyt noch die wtberstende rasernie, ende wie sal moghen verdragen den oploop van eenen geest tot gramscap verwect? 5Beter is een openbaere berispinghe dan verborghen liefde. 6Beter sijn die wonden van eenen die lief heeft, dan bedrieghelijcke cussinghen des gheens die haet. 7Een versade ziele sal honichraten vertreden, ende een hongherighe ziele sal oock bitter dinghen voer suete innemen. 8Ghelijck eenen voghel ouervlieghende van sijnen neste, alsoe es een man die sijn plaetse verlaet. 9Vander saluen ende versceyden ruecken verhueget herte, ende doer goede raden eens vrients wort die ziele versuet. 10Vwen vrient ende ws vaders vrient en verlaet niet, ende in ws broeders huys en gaet niet opden dach ws lijdens. Beter es een ghebuer by, dan een broeder verre. 11Gheeft v naerstelijck ter wijsheyt mijn sone ende verblijt mijn herte, dat ick den verwijtende mach een reden antwoerden. 12Die listighe het quaet siende is verborghen gheweest, die cleyne kinderen voerby gaende hebben scade gheleden. 13Neemt sijn cleedt die borghe bleuen is voer eenen buyten man, ende voer die vreemde neemt hem eenen Pant aff. 14Die sijnen naesten ghebenedijt met een groote stemme des nachts opstaende, sal ghelijck wesen eenen die vermalendijt. 15Doerdruypende daken in den dach der couden ende een kijfachtighe vrouwe worden by een gheleken, 16die haer houdt es ghelijck die den wint houdt, ende olie van sijnder rechter hant sal hyse noemen. 17Yser wort met yser scerp ghemaect, ende een mensch maect scerp het aensicht van sijnen vrient. 18Die eenen vijchboom bewaert sal sijn vruchten eten, ende die sijns heeren bewaerder es sal gheglorificeert worden.

19Ghelijck int water claerlijck scijnen die aensichten der gheender die daer in sien, alsoo sijn der menschen herten openbaer den voersichtighen. 20Die helle ende die verderffenisse en worden nemmermeer veruult, desghelijcks sijn des menschen ooghen ooc onuersadelijck. 21Ghelijck tsiluer gheproeft wort in den smilt ouen, ende gout int forneys, alsoe wort een mensch gheproeft doer den mont des prijsers. Het herte vanden boosen soect quade dinghen, maer een recht herte suect wetenheyt. 22Al waert dat ghy eenen sot stiet in den mortier ghelijck vochtighe gherste met eenen stamper daer op stootende, soo en sal sijn sotheyt van hem niet ghenomen worden. 23Bekent neerstelijck het aensicht van uwen beesten ende aenmerct v cudden, 24want ghy en sult eewelijck die macht niet hebben, maer die croone sal ghegheven worden van gheslachte tot gheslachte. 25Die beemden sijn open, ende dat groeyende cruyt wort vertoont, ende dat hoy es vergadert van die berghen. 26Die lammeren sijn om v te cleeden, ende die ionghe boxkens totten prijs vanden acker. 27Laet v ghenoech wesen der gheyten melck tot uwer spijsen, ende tot den nootdruft ws huys, ende voer uwer dienstvrouwen cost.