‏ Proverbs 28

Dat .xxviij. Capittel. 1DIe ongoddelijcke vliet als hem niemant en veruolcht, maer die rechtuerdighe sal als eenen leeuw betrouwende sonder veruaertheyt sijn. 2Om des lants sonden sullender veele princen int lant sijn, ende om des menschen wijsheyt ende kennisse van tghene dat men seyt, sal dleuen vanden vorst verlingt worden. 3Een arm man bedrieghelijck onrecht doende den armen, es ghelijck eenen crachtighen slach reghen waer doer den dieren tijt coemt. 4Die de wet verlaten prijsen den ongoddelijcken, diese bewaren worden onsteken teghen hem. 5Quade mannen en dencken opt ordeel niet, maer die den Heere soecken, aenmercken alle dinghen. 6Beter is een arme wandelende in sijn simpelheyt, dan een rijcke in verkeerde weghen. 7Soe wie die wet bewaert is een wijs sone, maer wie brasseerders voet die bescaemt sijnen vader. 8Wie rijcdommen vergadert met woeckerien ende doer ouersettinghe die vergadertse tot der armen profijte. 9Die sijn ooren aff keert dat hy die wet niet en hoore, diens ghebet sal affgrijselijck wesen. 10Wie die rechtuerdighe bedriecht in eenen quaden wech, die sal in sijn verderffenisse vallen, ende die simpele sullen sijn goeden besitten. 11Een rijck man laet hem duncken dat hy wijs is, maer een voersichtich arm mensch sal dien ondersoecken. 12Int verhueghen der rechtuerdigher is veel glorien, als die ongoddelijcke regneren soe vallen die menschen. 13Wie sijn groote misdaden verberghet, die en sal niet voerspoedich sijn, Maer diese belijdt, ende laet, sal bermherticheyt vercrijghen. 14Salich es die man die altijt bevreest is, maer die hart van herten is sal gheheel int quaet vallen. 15Eenen briesschende leuw, ende eenen hongherighen beyr, is een prince ouer een arm volck. 16Een vorst die ghebreck van voersienicheyt heeft die salder veel verdrucken doer valsche versieringhe, maer wie ghiericheyt haet diens daghen sullen langhe worden. 17Den mensche die valschelijck veruolcht eender zielen bloet, al eest dat hy vliedt totten poel toe, niemant en wederhout hem. 18Die simpelijck wandelt sal salich worden, die verkeerde weghen wandelt sal eens tehoopevallen. 19Wie sijn lant bouwet, die sal met brooden versaet worden, maer wie ledicheyt volcht die sal met armoede veruult worden. 20Een ghetrou man sal seer ghepresen worden, maer wie hem haest om rijck te wesen die en sal niet onnoosel wesen. 21Wie int oordeel iemants persoon kent, die en doet niet wel, dese verlaet oock om een bete broots die waerheyt. 22Die man die hem haest om rijck te worden, ende die andere benijdt, die en weet niet dat hem die aermoede ouercomen sal. 23Die eenen man straft sal namaels meer gratie by hem vinden, dan die ghene die doer smeekinghen der tonghen bedriecht. 24Die iet heymelijck ontneemt sijnen vader ende sijnder moeder, ende seyt dat dat gheen sonde en is, die is een medegheselle eens dootslaghers. 25Wie sij seluen beroemt ende breedt maect, die verwect kijuagien, maer die inden Heere hoept sal ghenesen worden. 26Wie hem op sijn herte betroudt die es sot, maer wie wijselijck wandelt die sal ghepresen worden. 27Die den armen gheeft en sal gheen ghebreck hebben, wie den biddenden versmaet die sal armoede lijden. 28Als die ongoddelijcke op staen sullen, soe sullen hen die menschen verberghen, als die vergaen sullen sijn, dan sullen die rechtuerdighe vermenichfuldicht worden.