Pro 29 | NldLeuv1548 | STEP | EEnen man die met harden necke versmaet den ghenen die hem straeft dien sal een haestighe verderffenisse ouercomen, ende die ghesontheyt en sal hem niet volghen.

‏ Proverbs 29

Dat .xxix. Capittel. 1 EEnen man die met harden necke versmaet den ghenen die hem straeft dien sal een haestighe verderffenisse ouercomen, ende die ghesontheyt en sal hem niet volghen. 2 Int vermenichfuldighen der rechtuerdigher sal tghemeyn volc hem verblijden, als die ongoddelijcke die heerscappie aen nemen dan sal tvolc suchten. 3 Een man die wijsheyt bemint verblijt sijnen vader, maer die hoeren voedt sal sijn goet verquisten. 4 Een rechtuerdich coninck sal dlant oprichten, een ghierich man sal dat verderuen. 5 Een mensch die met smeekende ende gheveynsde woerden sijnen vrient aenspreect die spraeyt een net sijnen voeten. 6 Den ongoddelijcken man sonde doende sal eenen strick omuanghen, ende die rechuerdighe salt louen ende blijde sijn. 7 Die rechtuerdighe kent die sake der armen, die ongoddelijcke en kent die wetentheyt niet. 8 Quaet doende menschen verderuen die stadt, maer die wijse keeren die rasende gramscap aff. 9 Een wijs man eest dat hy met eenen sot twistich kijuende is, tsij oft hy hem stoort oft dat hy lacht, hy en sal gheen ruste vinden. 10 Die bloetghierighe mannen haten den simpelen, maer die rechtuerdighe soecken sijn ziele. 11 Sijnen gheheelen gheest stort een sot wte, maer een wijs man stelt dien wt ende bewaerten tot namaels. 12 Een prince die gheerne hoort loghentalen, die heeft alle sijn dienaers ongoddelijck. 13 Een arme ende sijn scultheere hebben malcanderen ontmoet, haerder beyder verlichter is die Heere. 14 Een coninck die inder waerheyt den arme recht ordeel doet, diens throon sal inder eewicheyt gheuesticht worden. 15 Die roede ende die straffinghe gheeft wijsheyt, maer in een kint dat men sijnen wille laet ghebruycken bescaemt sijn moeder. 16 Int vermenichfuldighen der ongoddelijcker sullen die boosheden vermenichfuldicht worden, ende die rechuerdighe sullen hen nederuallinghen sien. 17 Onderwijst uwen sone, ende hy sal v vermaken, ende uwer zielen vruechden gheuen. 18 Als die prophetie vergaet, soe sal tvolck verstroyt worden, maer wie de wet bewaert die is salich. 19 Een knecht en mach met gheenen woerden gheleert worden, want hy verstaet wel dat ghy segghet, ende hy versmaet te antwoerden. 20 Hebdi eenen man ghesien haestich om te spreken? vander sotheyt is meer te hopen dan van sijn beternisse. 21 Wie sijnen knecht van ioncs leckerlijck op voedt, die sal hem namaels wederspannich ghevoelen. 22 Een grammoedich man verwect kijuagien, ende die seer gheneycht is tot stoornisse, sal ooc om te sondighen meer gheneycht sijn. 23 Den hoouerdighen volcht verneerderinghe, ende den oetmoedeghen van gheeste sal die glorie ontfanghen. 24 Wie met eenen dief deylt die haet sijn ziele, hy hoort den beswerende, ende hy en gheues niet te kennen. 25 Die den mensch vreest sal haestelijck vallen, die inden Heere hoept, sal op ghehauen worden. 26 Vele soecken des princen aensicht, ende vanden Heere coemt het ordeel van een ieghelijcken besonder. 27 Die rechtuerdighe vereysen den ongoddelijcken man, ende die ongoddelijcke vereysen de ghene die inden rechten wech sijn. Die sone diet twoert bewaert sal buyten die verderffenisse sijn.