‏ Proverbs 8

Dat .viij. Capittel. 1EN roept die wijsheyt niet? ende die voorsienicheyt en gheeftse haer stemme niet? 2In die opperste ende hooghe toppen ouer die weghen int midden der paden 3staende by der stadt poorten, in die selfste doeren spreect sij segghende. 4O ghy mannen tot v lieden roep ic, ende mijn stemme is tot die kinderen der menschen. 5Verstaet ghy cleyn kinderen die cloecheyt, ende ghy onwijse aenmercket, 6Hoort want ic sal van groote dinghen spreken, ende mijn lippen sullen open ghedaen worden om dat recht te vercondighen 7Mijn kele sal die waerheyt bedencken ende mijn lippen sullen verfoeyen den ongoddelijcken. 8Rechtuerdich sijn alle mijn woorden, daer en is niet onrechts oft verkeerts in, 9sij sijn oprecht den ghenen diese verstaen, ende recht wt den ghenen die wetenheyt vinden, 10Ontfanct mijn onderwijsinghe, ende niet ghelt, verkiest die leeringhe meer dan gout, 11Want beter is die wijsheyt dan alle daldercostelijcste rijckdommen, ende alle dat begheerlijck is en mach by haer niet gheleken worden. 12Ick wijsheyt woone inden raet, ende ick ben in die gheleerde ghedachten. 13Die vreese Godts haettet quaet, vermetelijcheyt, ende hoouerdie, ende eenen quaden wech, ende eenen mont met twee tonghen verfoeye ic, 14Mijne is den raet ende die gherechticheyt, mijne is die voorsichticheyt, mijne is die stercheyt, 15Door my regneren die coninghen, ende die wetstelders ordineren dat recht is, 16Door my ghebieden die princen, ende die machtighe ondersceyden die rechtuerdicheyt. 17Ick beminne die my beminnen, Ende die vroech tot my waken sullen my vinden, 18Met my sijn rijcdommen ende glorie, ouertreffelijcke rijckdommen ende rechtuerdicheyt, 19Beter is mijn vrucht dan gout ende costelijcke ghesteente, ende mijn spruyten sijn beter dan ghecoert siluer. 20In die weghen der rechtuerdicheyt wandele ick, int midden van die paden des ordeels, 21op dat ick rijck maken soude die my beminnen, ende hen scatten veruullen, 22Die Heere heeft my beseten van tbeghin sijnder weghen, eer hy iet maecte vanden beghinne. 23Vander eewicheyt ben ick gheordineert, ende vanden ouden tijt eer die eerde ghemaect worde, 24Die afgronden en waren noch niet, ende ick was nv ontfanghen, die fonteynen en waren noch niet wtgheborsten, 25die berghen en stonden noch niet met hen sware grootheyt, voor die hoeuelen begonste ick ghebaert te worden, 26hy en hadde noch die eerde niet ghemaect, ende die vloeden ende die herren vanden omganck der eerden, 27Als hy die hemelen bereyde soo was ick daer by, als hy die afgronden met een seker wet ende met eenen ronden rinck die afgronden omleydt, 28als hy die locht bouen vast maecte, ende woech die fonteynen der wateren, 29doen hy der zee rontsomme stelde haer pale, ende een wet den wateren stelde, dat sij ouer haer eynden niet gaen en souden, als hy die fundamenten der eerden woech, 30Doen was ick met hem alle dinghen makende, ende ick hadde welluste daghelijcs spelende voor hem tot allen tijden, 31spelende inden omganck der eerden, ende mijn wellusticheyt is te sijn met die kinderen der menschen. 32Daer om kinderen hoort my. Salich sijn sij die mijn weghen bewaren, 33Hoort die onderwijsinghe ende weest wijs, ende en wiltse niet verworpen. 34Salich is die man die my hoort, die aen mijn doeren daghelijcs waect, ende wacht aen die stijlen van mijnder doeren, 35Die my vint sal dleuen vinden, ende hy sal salicheyt sceppen vanden Heere, 36maer die in my sondicht sal sijn ziele quetsen, Alle die my haten hebben die doodt lief.