Pro 11 | NldLeuv1548 | STEP | EEn bedrieghelijcke waghe is ee n afgrijselijcheyt bi Gode, en de ee n rechtuerdich ghewicht is sijnen wille.

‏ Proverbs 11

Dat .xi. Capittel. 1 EEn bedrieghelijcke waghe is een afgrijselijcheyt bi Gode, ende een rechtuerdich ghewicht is sijnen wille. 2 Soo waer houerdicheyt is, daer sal oock laster sijn, maer waer ootmoedicheyt is, daer is ooc wijsheyt. 3 Die simpelheyt der rechtuerdigher salse wel leyden, ende die vertredinghe der verkeerder sal hen ter neder bringhen. 4 Die rijckdommen en sullen niet baten inden dach der wraken, maer die rechtuerdicheyt sal vander doot verlossen. 5 Die rechtuerdicheyt vanden simpelen sal sijnen wech bescicken, ende door sijn ongoddelijcheyt sal die ongoddelijcke vallen, 6 Die rechtuerdicheyt der oprechter sal hen verlossen, ende in hen laghen sullen die boose gheuanghen worden. 7 Als die ongoddelijcke mensche doot is, soo en sal daer voorts gheen hope wesen, ende tverbeyden vanden sorchuuldighen sal vergaen. 8 Die rechtuerdighe is vander benautheyt verlost, ende die ongoddelijcke sal voor hem gheleuert worden, 9 Die gheueynsde bedriecht metten monde sijnen vrint, maer die rechtuerdighe sullen door die wetenheyt verlost worden. 10 In die goeden der rechtuerdighen sal een stadt verheuen worden, ende in dat vergaen van die ongoddelijcke, sal lof wesen, 11 Door die benedijdinge der rechtuerdigher sal een stadt verheuen worden, ende door den mont der ongoddelijcker sal die omgheworpen worden. 12 Die sijnen vrint versmaedt die is arm van herten, maer een verstandich man sal swijghen, 13 Die bedriechelijck wandelt, ontdect die heymelijcke dinghen, maer die ghetrouwe is houdt verholen dat hem van sijnen vrint betroudt is. 14 Waer gheen regeerder en is daer sal tvolck vallen, maer salicheyt is daer veel raden sijn. 15 Hy sal met quade ghequelt worden die voor eenen vreemden borghe blijft, maer wie hem voor stricken wach die sal vrij sijn. 16 Een gratieuse vrouwe sal eere vinden, ende die vrome sullen rijckdommen hebben. 17 Een bermhertich man doet sijnder zielen wel, maer die wreet is verworpt oock sijn naeste maghen. 18 Die ongoddelijcke doet een onghestadich werck, maer die ghene die rechtuerdicheyt saeyt sal ghetrouwen loon hebben. 19 Die goedertierenheyt bereydt dat leuen, ende het naeuolghen vanden quaden die doodt. 20 Afgrijselijck is den Heere een quaet herte, ende sijnen wille is in die ghene die simpelijck wandelen. 21 Al is deen hant in dander hant, soo en sal nochtans die quade niet onnoosel sijn, maer tsaet der rechtuerdigher sal behouden worden. 22 Eenen gulden rinck inden nuese vander soch, is een schoon vrouwe ende dwaes. 23 Die begheerte der rechtuerdigher is alle goet, tverbeyden der ongoddelijcker is rasernie. 24 Die andere deylen hen eyghen goet, ende sij worden rijcker, die ander roouen dat hen niet toe en behoort, ende sijn altijt in armoeden. 25 Een ziele die ghebenedijt sal vet worden, ende die droncken maect sal selue oock droncken worden. 26 Die tcoren verborght sal vermalendijt worden onder die luyden, maer die ghebenedijdinghe sal wesen opt hooft der gheender diet vercoopen. 27 Wel staet hy smorghens vroech op die goede dinghen soect, maer die een ondersoecker der quader dinghen is sal daer af verdruct worden. 28 Wie sijn betrouwen steldt op sijn rijckdommen die sal vallen, maer die rechtuerdighe sullen als een groen bladt groeyen. 29 Die sijn huys verstoort sal winden besitten, ende die sot is sal den wijse dienen. 30 Die vrucht des rechtuerdighens is thout des leuens, ende wie die zielen ontfanct die is wijs. 31 Eest dat een rechtuerdich op die eerde gheloont wordt, hoe veel te meer die ongoddelijcke ende sondaer.