Pro 19 | NldLeuv1548 | STEP | BEter is een arme die in sijn simpelheyt wandelt, dan een rijck man sijn lippen wringhe n de ende onwijs.

‏ Proverbs 19

Dat .xix. Capittel. 1 BEter is een arme die in sijn simpelheyt wandelt, dan een rijck man sijn lippen wringhende ende onwijs. 2 Daer gheen wetenheyt der zielen en is, daer en is gheen goet, ende die haestich is metten voeten sal hem stooten. 3 Eens menschen sotheyt sal sijn ganghen omworpen, ende teghen Godt wort hy hittich met sijnen moede. 4 Die rijckdommen brenghen veel vrinden aen, maer vanden arme worden ghescheyden ooc die hy hadde. 5 Een valsch ghetuych en sal niet onghepijnt sijn, ende die loghenen spreect en sal niet ontulieden. 6 Vele eeren den persoon vanden machtighen, ende sijn vrinden des gheens die ghiften gheeft. 7 Die broeders van eenen armen mensch haten hem, daer toe oock sijn vrinden sijn verre van hem ghescheyden. 8 Die alleen die woorden volcht, en sal niet hebben, maer wie een besitter des verstantds is, die bemint sijn ziele, ende die bewaerder der voorsichticheyt sal goede dinghen vinden. 9 Een valsch ghetuyghe en sal niet onghepuniert sijn, ende die loghenen spreect die sal verghaen. 10 Den dwasen en betamen gheen wellusticheden, noch eenen knecht heerschappie te hebben ouer princen. 11 Die leeringhe eens mans woort door verduldicheyt bekent, ende sijn glorie is boosheden voorby te ghaen.

12 Ghelijck dat briesschen des leeuws, alsoo is die gramscap des conincs, ende ghelijck den dauwe op tcruyt, alsoo is sijn vrolijcheyt. 13 Een dwaes kint is des vaders rouwe, ende daken altijt doordruppende, is een kijfachtighe vrouwe. 14 Huys ende rijckdommen worden vanden ouders ghegheuen, maer van-den Heere sonderlinghe een verstandighe huysvrouwe. 15 Traecheyt brengt slapen in, ende een slappe ziele sal hongher lijden. 16 Die tghebodt bewaert, die bewaert sijn ziele, maer die sijnen wech veronachsaemt sal ghedoot worden. 17 Hy woekert den Heere die bermherticheyt doet den armen, ende hy sal hem sijnen wederloon verghelden. 18 Onderwijst uwen sone, en wilt niet mishopen, maer om hem te dooden en steldt v ziele niet. 19 Die onlijdsaem is sal scade lijden, ende als hy gherooft heeft, soo sal hy daer een ander toe legghen. 20 Hoort raet ende ontfanct castijende leeringhe, op dat ghy wijs moecht sijn in v wtersten. 21 Vele ghedachten sijn in eens mans herte, maer den wille des Heeren sal altijt blijuen. 22 Een mensch die ghebrec lijdet is bermhertich, ende beter is een arme dan een loghenachtich man. 23 Die vreese des Heeren dient totten leuen, ende in die volheyt sal die woonen sonder dat besoecken des alderquaetsten. 24 Die traghe verberght sijn hant onder sijn ocsele, ende hi en brengtse aen sijnen mont niet. 25 Als die boose ghegheesselt wordt, soo sal een dwaes wijser sijn, maer eest dat ghy eenen wijsen berispt, soo sal hy die castijnghe verstaen. 26 Wie sijnen vader lijden aendoet, ende vliet sijn moeder, die sal scandelijc wesen ende onsalich. 27 Sone en houdt niet op van leeringhe te hooren, noch en sijt niet onwetende die woorden der wetenheyt. 28 Een onrechtuerdich ghetuyghe beghect dat ordeel, ende den mont der ongoddelijcker verslint die boosheyt. 29 Die ordeelen sijn den bespotters bereydt, ende staende hameren der sotten lichamen.