‏ Proverbs 2

Dat .ij. Capittel. 1MYn sone eest dat ghy mijn redenen ontfanghet, ende mijn gheboden by v verborght, 2op dat v oore wijsheyt hoore, so neycht v herte om te bekennen die verstandicheyt, 3eest dat ghy die soect ghelijck ghelt, ende dat ghy die als scatten wtgraeft, 4dan suldi verstaen die vreese Gods, ende Gods kennisse vinden, 5want die Heere gheeft wijsheyt, ende wt sijnen mont comen verstandicheyt ende wetenheyt. 6Hy sal bewaren die salicheyt vanden oprechten, ende bescermen die ghene die simpelijck wandelen, 7onderhoudende die paden der rechtuerdicheyt, ende der heylighen weghen bewarende, 8dan suldy verstaen die rechtuerdicheyt ende dat ordeel ende gherechticheyt, ende alle goede paden. 9Eest dat die wijsheit in v herte gaet ende dat die kennisse uwer zielen behaghet, 10soo sal den raet v bewaren, ende die voorsichticheyt v behouden, 11dat ghy sult verlost worden vanden quaden wech, 12ende vanden mensche die verkeerde dinghen spreect, die daer verlaten die rechte bane, ende wandelen door duyster weghen, 13die hen verblijden als sij qualijc ghedaen hebben, ende verhueghen hen in die quaetste dinghen, 14der welcker weghen verkeert sijn, ende hen ganghen van quade famen, 15Op dat ghy moecht verlost worden vander vreemder vrouwen, ende die van buyten is, die haer woorden saechte maect, 16ende verlaet den leytsman van haerder iongher iuecht, 17ende die tverbont haers Gods vergheten heeft, want haer huys is ter doot gheneycht, ende ter hellenwaerts haer paden, 18alle die tot haer ingaen die en sullen niet wederkeeren, noch sij en sullen die paden des leuens niet aennemen, 19Op dat ghy moecht wandelen inden goeden wech, ende die paden der rechtuerdigher bewaren, 20want die oprecht sijn sullen op die aerde woonen, ende die simpele sullen daer op blijuen woonende, 21Maer die ongoddelijcke sullen vander eerden vernielt worden, ende die booslijc doen sullen daer af ghenomen worden.