‏ Proverbs 5

Dat .v. Capittel. 1MYn sone hoort toe nae mijn wijsheyt, ende tot mijn voorsichticheyt neycht v oore, 2op dat ghy bewaren moecht die ghedachten, ende dat v lippen moghen die onderwijsinghe bewaren, 3Want druypende honichraten sijn der hoeren lippen, ende blinckender dan olie is haer kele, 4maer haer wterste sijn bitter, ghelijck alsem, ende scerp als een sweert op beyde sijden snijdende. 5Haer voeten gaen nederwaerts ter doot, ende totter hellen gaen haer ganghen doere, 6Door den padt des leuens en wandelen die niet onghestadich sijn haer ganghen, ende onvindelijck, 7Daerom nv mijn sone hoort my, ende en sceydt niet van die woorden mijns monts. 8Maect verre van haer uwen wech, ende en ghenaect die doeren van haren huyse niet, 9En gheeft den vreemden v eere niet, ende v iaren den wreeden, 10dat by auontueren die vreemde niet veruult en worden van uwen vermoghen, ende dat v arbeyden niet en sijn in een vreemt huys, 11ende dat ghy dan suchtet in die wterste daghen als ghi v vleesch ende lichaem verteert sult hebben 12ende segghen. Waerom heb ic die onderwijsinghe versmaet? ende waerom en heeft mijn herte den straffinghen gheen ghehoor ghegheuen? 13noch en heb niet ghehoort die stemme der gheender die my leerden, ende den meesters en heb ic mijn oore niet gheneycht? 14By nae heb ic gheweest in alle tquaet int midden der kercken ende Sinagogen. 15Drinct water wt uwe cisterne, ende die vloeden van uwen put, 16Laet v fonteynen buyten vlieten, ende op die straten deylt v wateren, 17Hebt die alleene, noch en laet die vreemde met v niet deylen. 18V adere si ghebenedijt, ende verblijdt v metter vrouwen van uwer iongher iuecht, 19Seer lieflijc is die hinde, ende dat rhee dalder ghenaemste, laet haer borsten v droncken maken tallen tijden, in haer liefde hebt v wellust altoos. 20Waerom wordi verleydt (mijn sone) van een vreemde, ende wort verwermt inden schoot van eender ander. 21Die Heere aensiet des menschen weghen, ende alle sijn ganghen aenmerct hy, 22Sijn eyghen boosheyden vanghen den ongoddelijcken, ende met die zeelen sijnder sonden wort hy ghebonden, 23Hy sal steruen, om dat hy gheen onderwijs en heeft ghehadt, ende in die menichte sijnder dwaesheyt sal hy bedroghen worden.