‏ Psalms 106

Den .C.vi. Psalm.

Confitemini Domino

1BElijdt den Heere want hy is goet, want inder eewicheyt is sijn bermherticheyt.

2Laetse segghen die verlost sijn vanden Heere, die hy verlost heeft wt des viants haut, die hy van den lantscappen vergadert heeft.

3Vanden opganck der sonnen ende vanden onderganck, vanden noorden ende vander zee.

4Sij hebben ghedoelt in die woestijne in die plaetsen sonder water, si en hebben gheenen wech van een bewoonde stadt gheuonden.

5Hongherich ende dorstich, hen ziele verghinck in hen seluen.

6Ende sij hebben gheroepen totten Heere doen si in lijden waren, ende van haren benautheden heeft hijse verlost.

7Ende hy heeftse gheleyt tot in eenen rechten wech, dat sij gaen souden tot in die woonstadt.

8Laet den Heere belijden sijn bermherticheden, ende sijn wonder wercken den kinderen der menschen.

9Want hy heeft die ydel ziele versaet, ende die hongherighe ziele heeft hy met goeden versaet.

10Sittende in duysternissen ende in die scaduwe des doots, ghebonden in allendicheyt ende int yser.

11Want sij hebben Godts woorden versmaet, ende den raet vanden alderhoochsten hebben si wederstaen.

12Ende hen herte is vernedert in arbeyden, si sijn cranc gheworden, ende daer en was niemant diese hielp.

13Ende sij hebben gheroepen toten Heere als si ghepijnicht worden, ende van haren nooden heeft hijse verlost.

14Ende hy heeftse wtgheleydt wt die duysternissen, ende scaduwe des doots, ende hen banden heeft hy in stucken ghebroken.

15Belijden moeten den Heere sijn bermherticheden, ende sijn wonderlijcheden den kinderen der menschen.

16Want hy heeft die metalen poorten vernielt, ende die yseren grendelen ghebroken.

17Hy heeftse ontfangen vanden wech haerder boosheden, want om hen onrechtuerdicheden sijn sij vernedert.

18Van alle spijse heeft hen ziele ghewalghet, ende sij sijn comen tot die poorten des doots.

19Ende sij hebben totten Heere gheroepen doen sij verdruct worden, ende van haren benautheden heeft hijse verlost.

20Hy heeft sijn woert ghesonden, ende hem ghenesen, ende hy heeftse verlost van haren verderffenissen.

21Belijden moeten den Heere sijn bermherticheden, ende sijn wonder wercken den kinderen der menschen.

22Ende laetse offeren den offer des loefs, ende vercondighen sijn wercken met verhueghen.

23Die ter zee nederdalen met schepen, doende hen wercken in veel wateren.

24Die hebben des Heeren wercken ghesien, ende sijn wonderen in die diepte.

25Hy heeft ghesproken ende den wint des onweders is op ghestaen, ende haer baren worden op ghehauen.

26Sij climmen op totten hemel, ende dalen neder totten affgront, hen ziele verdwijnde in die quaden.

27Sij sijn verbaest, ende beroert gheweest als een droncken mensch, ende allen hen wijsheyt is verslonden.

28Ende sij hebben totten Heere gheroepen als sij verdruct waren, ende van haren nooden heeft hijse verlost.

29Ende hy heeft haer onweder ghestelt tot een stille locht, ende haer baren sijn ghestilt gheweest.

30Ende sij hebben hen verblijt om dat die ghestilt sijn gheweest, ende hy heeftse gheleyt tot die hauene van haren wille.

31Belijden moeten den Heere sijn bermherticheden, ende sijn wonderen den kinderen der menschen.

32Ende verheffen moeten sij hem in die vergaderinghen des gheloouighen volcs, ende in den setel der ouderen moeten sij hem louen.

33Hy heeft vloeden ghestelt in die woestijne, ende loopen der wateren in den dorst.

34Dat vruchtbarich lant in een soutpekel lant, van die quaetheyt der gheender die daer in woonden.

35Hy heeft die woestijne ghestelt tot staende wateren, ende dlant sonder water tot loopen der wateren.

36Ende hy heeft daer ghestelt die hongherighe, ende sij hebben daer een woonstadt ghestelt.

37Ende sij hebben ackers besaeyt, ende wijngaerden gheplant, ende voortsbrocht vruchten haerder natuerlijker gheboorten.

38Ende hy heeftse ghebenedijt, ende sij sijn wter maten zeer vermenichfuldicht, ende hen vee en heeft hy niet ghemindert.

39En sij sijn luttel gheworden, ende ghequelt van dat verdrucken der quader dinghen ende van pijnen.

40Daer is eenen twist wtghestort ouer die princen, ende hy heeftse doen dolen in die onbewandelde plaetse ende niet inden wech.

41Ende hy heeft den armen gheholpen vander armoeden, ende hy heeft die familien ghelijck scapen ghestelt.

42Die oprechte sullent sien ende hen verblijden, ende alle boosheyt sal haren mont stoppen.

43Wie isser wijs, ende sal dese dinghen bewaren? ende verstaen die bermherticheden des Heeren?