‏ Psalms 134

Den .C.xxxiiij. Psalm.

Laudate nomen Domini.

1LOeft den naem des Heeren, loeft ghy dienaers den Heere.

2Die int huys des Heeren staet in die voerhouen des huys ons Godts.

3Loeft den Heere, want die Heere es goet, singhet loff sijnen name, want hy is suete.

4Want die Heere heeft Iacob voer hem vercoren, Israel tot sijnder besittinghen.

5Want ick heb bekent dat die Heere groot is, ende dat ons Godt es bouen alle goden.

6Alle dat die Heere ghewilt heeft dat heeft hy ghedaen inden hemele ende in die eerde, in die zee ende in alle die affgronden.

7Voerts brenghende die wolcken van duyterste der eerden, die blixemen heeft hy tot reghen ghemaect.

Die die winden voertbrengt wt sijnen verborghen scatten, 8die gheslaghen heeft dierste gheborene van Egypten vanden menschen totte beesten.

9Hy heeft wtghesonden teekenen ende wonderwercken int midden van v Egypte, op Pharao ende op alle sijn knechten.

10Die veel volcken verslaghen heeft, ende ghedoot stercke coninghen.

11Sehon den coninck vanden Amorrheen, ende Og den coninck van Basan, ende alle die coninrijcken van Chanaan.

12Ende hy heeft hen lant tot een erffenisse ghegheuen, een erffenisse Israel sijnen volcke.

13Heere uwen naem is inder eewicheyt, Heere v ghedenckenisse is van gheslachte tot gheslachte.

14Want die Heere sal sijnen volcke recht ordeel doen, ende ouer sijn knechten sal hy hem laten versoenen.

15Die affgodts beelden der Heydenen sijn siluer ende gout, wercken van der menschen handen.

16Eenen mont hebben sij, ende sij en sullen niet spreken, sij hebben ooghen, ende sij en sullen niet sien.

17Sij hebben ooren ende sij en sullen niet hooren, want daer en is ghenen adem in haren mont.

18Haers ghelijcke moeten sij worden diese maken, ende alle die in hen betrouwen.

19Ghy Huys van Israel ghebenedijt den Heere, ghy huys van Aaron ghebenedijt den Heeee.

20Ghy Huys van Leui ghebenedijt den Heere, die den Heere vreest ghebenedijt den Heere.

21Ghebenedijt den Heere wt Sion die in Ierusalem woont.