‏ Psalms 139

Den .C.xxxix. Psalm.

Eripe me Domine.

1VErlost my Heere vanden quaden mensch, vanden boosen man verlost my.

2 Die boosheden ghedacht hebben int herte, alle den dach berocten sij strijden.

3 Sij hebben hen tonghe ghescerpt als serpenten, venijn der aderen es onder hen lippen.

4 Bewaert my Heere van die hant des sondaers, ende vanden boosen menschen verlost my.

Die ghedacht hebben mijn ganghen omme te stooten 5die houerdighe hebben my eenen strick verborghen.

Ende sij hebben seelen wtgherect tot eenen strick, by den wech hebben sij my een struycsel ghestelt.

6 Ick heb den Heere gheseyt, mijn Godt sijdi, verhoort Heere die stemme mijns smeekens.

7 Heere, Heere die cracht mijnder salicheyt, ghy hebt met een scaduwe mijn hooft ouerdect in den dach des strijdts.

8 En leuert my niet Heere teghen mijn begheerte den sondaer, sij hebben teghen my ghedacht, en verlaet my niet, op dat sij bij auontueren niet verheuen en worden.

9 Het hooft van haren ommeganck, den arbeyt van haren lippen sal hen ouerdecken.

10 Colen sullen op hen vallen, int vier suldise nederworpen in die allendicheden en sullen sij niet staende blijuen.

11 Een man van veel woerden en sal niet gheuordert worden op die aerde, den onrechtuerdighen man sullen die quade dinghen beuanghen in die doot.

12 Ick heb ghekent dat die Heere het recht vanden behoeuighen doen sal, ende die wrake vanden armen.

13 Maer nochtans sullen die rechuerdighe uwen naem belijden, ende die oprechte sullen woonen met uwen aenscijn.