‏ Psalms 29

Den .xxix. Psalm.

Exaltabo te Domine.

1ICk sal v verheffen Heere want ghy hebt my ontfanghen, noch ghy en hebt mijn vianden niet verblijdt ouer my.

2 Heere mijn Godt ick heb tot v gheroepen, ende ghy hebt my ghenesen.

3 Heere ghy hebt mijn ziele wtgheleyt vander hellen ghy hebt my behouden vanden ghenen die inden put nederdalen.

4 Singt den Heere lof ghy sijn heylighen, ende belijdt der ghedenckenissen van sijnder heylicheyt.

5 Want gramscap is in sijn verbolghentheyt, ende dleuen in sijnen wille.

Teghen den auont sal dat weenen dueren, ende tot die morghenstont die blijscap.

6 Maer ic heb gheseit in mijn oueruloedicheyt, ic en sal niet beroert worden inder eewicheyt.

7 Heere in uwen wille, hebdy mijnen cieraet cracht ghegheuen.

Ghy hebt v aensicht van my ghekeert, ende ic ben ontsteldt gheworden.

8 Tot v Heere sal ick roepen, ende tot mijnen Godt sal ick bidden.

9 Wat nutticheyt is in mijn bloet, als ick nederghedaelt sal wesen in die bederffenisse?

Sal het stof v belijden, oft v waerheyt vercondighen?

10 Die Heere heuet ghehoort, ende hy heeft mijnder ontfermt, die Heere is mijn helper gheworden.

11 Ghy hebt mijn screyinghe mi in blijscap verkeert, ghy hebt mijnen sack in stucken ghesneden, ende my omuanghen met blijscap.

12 Op dat v mijn glorie soude singhen, ende dat ick niet en soude tot druck beweecht worden.

Heere mijn Godt, inder eewicheyt sal ick v belijden.