Psa 51 | NldLeuv1548 | STEP | VVat glorieerdi in die quaetheyt, ghy die machtich sijt in boosheyt.

‏ Psalms 51

Den .li. Psalm.

Quid gloriaris.

1 VVat glorieerdi in die quaetheyt, ghy die machtich sijt in boosheyt.

2 Den gheheelen dach heeft v tonghe ghedacht onrechtuerdicheyt, ghelijck een scerp scaers hebdi bedroch ghedaen.

3 Ghy hebt bemint die quaetheyt bouen die goedertierenheyt, omgherechticheyt meer dan te spreken gherechticheyt.

4 Ghy hebt bemint alle haestighe nederstootende woerden, ghy bedrieghelijck tonghe.

5 Daerom sal v Godt verderuen totten eynde, hy sal v wt trecken, ende veruoeren tot uwen tabernakele, ende uwe wortele wt dat lant der leuender.

6 Die rechtuerdighe sullent sien ende vreesen, ende sullen ouer hem lachen, ende segghen 7 siet den mensch die Godt tot sijnen helper niet ghestelt en heeft.

Maer heeft ghehoept in die menichte van sijnen rijcdommen, ende hy is ouer machtich gheweest in sijn ydelheyt.

8 Maer ick als eenen vruchtbaren olijfboom int huys Gods, heb ghehoept in die bermherticheyt Gods inder eewicheyt, ende in die eewe der eewen.

9 Ick sal v belijden eewelijck om dat ghijt ghedaen hebt, ende ick sal uwen naem verwachten, want hy is goet int aenschijn uwer heylighen.