Psa 60 | NldLeuv1548 | STEP | VErhoort Godt mijn smekende bedinghe, hebt achte tot mijn ghebedt.

‏ Psalms 60

Den .lx. Psalm.

1 VErhoort Godt mijn smekende bedinghe, hebt achte tot mijn ghebedt.

2 Van die eynden der aerden heb ick tot v gheroepen doen mijn herte beanxt was, soo hebdi my opden steen verheuen.

Ghy hebt my gheleydt, 3 want ghy zijt mijn hope gheworden, eenen torre der stercheyt van des viants aensicht.

4 Ick sal woonen in v tabernakel, inder eewicheyt, ick sal bescermt worden onder tdecsele van uwen vloghelen.

5 Want ghy mijn Godt hebt mijn ghebedt verhoort, ghy hebt een erffenisse ghegheuen den ghenen die uwen naem vreesen.

6 Ghy sult daghen toedoen tot des conincs daghen, sijn iaren totten dach der gheboerten ende der gheboerten.

7 Hy blijft inder eewicheyt in daenscouwen Gods, wie sal soecken sijn bermherticheyt ende waerheyt?

8 Alsoo sal ick eenen loffsanck segghen uwen naem emmermeer ende eewelijck, op dat ick mijn beloften betalen mach van daghe te daghe.