Psa 10 | NldLeuv1548 | STEP | INden Heere heb ick betrouwen, hoe segt ghi mijnder zielen, Vaert ouer opden berch als een mussche.

‏ Psalms 10

Den .x. Psalm.

In Domino confido.

1 INden Heere heb ick betrouwen, hoe segt ghi mijnder zielen, Vaert ouer opden berch als een mussche.

2 Want siet die sondaers hebben den boghe ghespannen, sij hebben hen scichten bereydt inden pijlkoker, om te scieten int doncker die recht van herten sijn.

3 Want dat ghy volmaect hadt hebben sij bedoruen, maer wat heeft die rechtuerdighe ghedaen?

4 Die Heere is in sijnen heylighen tempel, die Heere inden hemel is sijnen stoel.

Sijn ooghen sien op die arme, sijn oochscelen onderuraghen die kinderen der menschen.

5 Die Heere onderuraecht den rechtuerdighen ende ongoddelijcken, maer wie boosheyt bemint die haet sijn ziele.

6 Hy sal op die sondaren stricken reghenen, vier ende solfer ende den wint vanden onwederen is tdeel van haren kelck.

7 Want die Heere is rechtuerdich, ende rechtuerdicheden heeft hy lief ghehadt, gherechticheyt heeft sijn aensicht aenghesien.