‏ Psalms 144

Den .C.xliiij. Psalm.

Exaltabo te Deus.

1ICk sal v verheffen mijn Godt die coninck, ende ick sal uwen naem ghebenedijden in die eewicheyt der eewicheden.

2Van daghe te daghe sal ick v ghebenedijden, ende uwen naem louen inder eewicheyt ende in die eewicheyt der eewicheden.

3Groot es die Heere ende loffelijck bouen maten, ende sijnder grootheyt en is gheen eynde.

4Gheboerte ende gheboerte sullen v wercken prijsen, ende v machticheyt sullen sij voercondighen.

5Die heerlijcheyt van die glorie uwer heylicheyt sullen sij spreken, ende v wonderlijcke dinghen sullen sij vertellen.

6Ende die cracht van uwen veruaerlijcheden sullen sij segghen, ende v grootheyt sullen sij vertellen.

7Die ghedenckenisse van die ouervloedicheyt uwer soeticheyt sullen sij wtspreken, ende in v rechtuerdicheyt sullen sij hen verhueghen.

8Ghenadich ende bermhertich is die Heere, lijdtsamich ende seer bermhertich.

9Soet is die Heere eenen ieghelijcken, ende sijn bermherticheden sijn bouen alle sijn wercken.

10Alle v wercken moeten v belyden Heere, ende v heylighen moeten v ghebenedijden.

11Die glorie ws rijcs sullen sij segghen, ende v machticheyt sullen sij spreken.

12Op dat sij v machticheyt moghen bekent maken den kinderen der menschen, ende die glorie van die heerlijcheyt ws rijcs.

13V rijck is een rijck van allen eewen, ende v heerscappie in alle gheslachte ende gheslachte.

Ghetrouwe is die Heere in alle sijn woerden, ende heylich in alle sijn wercken.

14Die Heere heft op alle die daer vallen, ende hy recht op alle die neder ghestooten sijn.

15Die ooghen van allen hopen in v, ende ghy gheeft hen spijse ten bequamen tijde.

16Ghy opent v hant, ende veruult alle ghedierte met benedictie.

17Die Heere is rechtuerdich in alle sijn weghen, ende heylich in alle sijn wercken.

18Die Heere is by alle den ghenen die hem aenroepen, alle den ghenen die hem aenroepen inder waerheyt.

19Den wille der gheender die hem vreesen sal hy doen, ende hen ghebedt sal hy verhooren, ende hy salse salich maken.

20Die Heere bewaert alle die hem liefhebben, ende alle die sondaren sal hy heel te niet doen.

21Mijnen mont sal des Heeren loff spreken, ende ghebenedijden moet alle vleesch sijnen heyleghen naem, in der eewicheyt, ende in die eewicheyt der eewicheden.