‏ Psalms 30

Den .xxx. Psalm.

In te Domine speraui.

1IN v Heere heb ick ghehoept, ic en sal niet bescaemt worden inder eewicheyt, in v rechtuerdicheyt verlost my.

2 Buycht tot my v oore, haest v om my te verlossen.

Weest my tot eenen God eenen bescermer, ende tot een huys der toeulucht, op dat ghy my salich maket.

3 Want mijn stercheyt ende mijn toeulucht sijt ghy, ende om uwen naem suldi my voorts leyden, ende mi opuoeden.

4 Ghy sult my wtleyden van desen strick den welcken sij my verborghen hebben, want ghy sijt mijn bescermer.

5 In v handen beueel ick mijnen gheest, ghy hebt my verlost Heere die Godt der waerheyt.

6 Ghy hebtse ghehaedt die op ydelheyt achten, te vergheefs.

Maer ick heb inden Heere ghehoept, 7ic sal verhueghen ende blijde sijn in v bermherticheyt.

Want ghy hebt aensien mijn vernederinghe, ghy hebt mijn ziele behouden van die nooden.

8 Noch ghy en hebt my niet besloten in des viants handen, ghi hebt op een ruym plaetse mijn voeten ghestelt.

9 Ontfermt v mijns Heere want ick worde ghequelt, mijn ooghe is heel ontsteldt door die gramscap, mijn ziele, ende mijnen buyck.

10 Want mijn leuen is vergaen in pijnen, ende mijn iaren in suchtinghen.

Mijn cracht is in armoede cranck gheworden, ende mijn beenderen sijn verstoort.

11 Bouen alle mijn vianden ben ick gheworden een verwijdt mijnen ghebueren seer grootelijck, ende een vreese mijnen bekinden.

Die my saghen sijn buyten wech van my gheuloden, 12ick ben vergheten als eenen doode vander herten.

Ic ben worden als een bedoruen vat, 13want ic heb ghe-hoort dat verwijt van vele die rontsomme woonen.

Doen sij daer toe versaemden teghen my, soo hebben sij om mijn ziele te vanghen raet ghehouden.

14 Maer ick heb in v ghehoept Heere, ick heb gheseyt mijn God sijdi, 15in v handen sijn mijn auontueren.

Verlost my wt die hant mijnder vianden, ende van mijnen veruolghers.

16 Verlicht v aensicht op uwen knecht, maect my salich in uwe bermherticheyt.

17 Heere en laet my niet bescaemt sijn, want ick heb v aengheroepen.

Bescaemt moeten worden die ongoddelijcke, ende gheleydt in die helle, 18stom moeten worden die bedrieghelijcke lippen.

Die teghen den rechtuerdighe spreken ongherechticheyt, met houerdien ende misbruyck.

19 Hoe groot is die menichfuldicheyt van uwer sueticheyt Heere, die ghy verborghen hebt den ghenen die v vreesen.

Ghy hebbet voor hen volmaect die in v hopen, int aenscouwen van die kinderen der menschen.

20 Ghy sultse verberghen, in die verborghentheyt van uwen aensicht, van die verstooringhe der menschen.

Ghy sultse bescermen in v tabernakel, van dat wedersegghen der tonghen.

21 Ghebenedijt is die Heere, want hy heeft sijn bermherticheyt wonderlijck ghemaect voor my, in die bewaerde stadt.

22 Maer ic heb geseyt inden ouerganc mijns gemoets, ic ben verworpen van dat aenscouwen uwer ooghen.

Daerom hebdi verhoort die stemme van mijnen ghebede, als ick tot v riep.

23 Bemint den Heere alle sijn heylighen, want die Heere sal die waerheyt versoecken, ende oueruloedelijck betalen den ghenen die hoouerdie bedrijuen.

24 Doet manlijck ende laet v herte versterct worden, alle die inden Heere hopet.