‏ Psalms 43

Den .xliij. Psalm.

Deus auribus nostris.

1GOdt wy hebben met onsen ooren ghehoort, ons vaders hebbent ons vercondicht.

Het werck dat ghy ghewracht hebt in haren daghen, ende in die oude voerleden daghen.

2 V hant heeft die Heydenen vernielt, ende ghi hebt hen gheplant, ghy hebt die volcken ghepijnicht, ende wtghedreuen.

3 Want sij en hebben doer hen sweert dat lant niet beseten, ende haren arm en heeftse niet behouden.

Maer v rechte hant ende uwen arm, ende dat inlichten ws aensichts, want ghy hebt in hen v behaghen ghehadt.

4 Ghy sijt seluer mijn coninck ende mijn Godt, die ghebiedt Iacobs salicheden.

5 Doer v sullen wy ons vianden op worpen metten horn, ende doer uwen naem sullen wy versmaden die teghen ons opstaen.

6 Want ick en sal in mijnen boghe niet hopen, ende mijn sweert en sal my niet behouden.

7 Want ghy hebt ons behouden van die ghene die ons pijneghen, ende die ons haten hebdi bescaemt.

8 In Gode sullen wy ghepresen worden den gheheelen dach, ende in uwen naem sullen wy belijden inder eeuwicheyt.

9 Maer nu hebdi ons wechghestooten, ende bescaemt, ende ghy Godt en sult niet wtgaen in onse heyrcrachten.

10 Ghy hebt ons achterwaert aff ghekeert nae onse vianden, ende die ons haetten beroofden ons voer hen seluen.

11 Ghy hebt ons gheleuert als slachscapen om te eten, ende onder die Heydenen hebdi ons verstroyt.

12 Ghy hebt v volck vercocht sonder prijs, ende daer en was gheen menichte in hen verwisselinghen.

13 Ghy hebt ons ghestelt tot eenen scimp onsen ghebueren, een begecken ende bespotten den ghenen die rontsomme ons zijn.

14 Ghy hebt ons den Heydenen tot een ghemeyn sprake ghestelt, tot een hooftscuddinghe onder die volcken.

15 Alle den dach is mijn scaempte teghen my, ende die bescaemtheyt mijns aensichts heeft my bedect.

16 Van die stemme des verwijters ende lasteraers, van daensicht des viants ende veruolghers.

17 Alle dit is op ons ghecomen, nochtans en hebben wy v niet vergheten, ende wy en hebben niet ongoddelijck ghedaen in v testament.

18 Ende ons herte en is niet achterwaerts wech ghegaen, ende ghy hebt ons paden doen wijcken van uwen wech.

19 Want ghy hebt ons vernedert in die plaetse der pijnlijcheyt, ende ons heeft ouerdect die scaduwe des doots.

20 Eest sake dat wy vergheten hebben den naem ons Godts, ende hebben wy ons handen wtghesteken tot eenen vreemden Godt?

21 En sal Godt dit niet versueken? want hy kent die verborghentheden des herten.

Want om v worden wy ghedoot alle den dach, wy sijn gheacht als slachscapen.

22 Staet op waerom slaepti Heere? staet op, ende en verstoot niet tot eynde toe.

23 Waer om keerdi v aensicht aff, waerom vergheet ghy onse armoeden, ende onse tribulatie?

24 Want ons ziele is in dat stoff der aerden vernedert, onsen buyck cleeft aen die aerde.

25 Staet op Heere, ende helpt ons, ende verlost ons om ws naems wille.