‏ Psalms 44

Den .xliiij. Psalm.

Eructauit.

1MYn herte heeft wtghesproken een groot wort, ick segghe mijn wercken den coninck.

Mijn tonghe is die penne vanden scrijuer, die rasschelijck scrijft.

2 Schoon sijt ghy van ghedaenten bouen die kinderen der menschen, die gratie is ghestort in v lippen, daer om heeft v Godt bemint inder eewicheyt.

3 Gordt v sweert aen v dgye, ghy aldermachtichste.

4 Met v ghedaente ende schoonheyt nemet waer gaet voerspoedelijck voerts, ende regneert.

Om die waerheyt ende saechtmoedicheyt, ende rechtuerdicheyt, ende v rechte hant sal v wonderlijck leyden.

5 V pijlen zijn scerp, sij sullen vallen in die herten van des conincs vianden, die volcken sullen v onderworpen worden.

6 Vwen stoel Godt is inder eewichheyt der eewicheden den scepter ws rijck is eenen scepter der gherechticheyt.

7 Ghy hebt bemint die rechtuerdicheyt ende ghehaedt die boosheyt, daer om heeft Godt uwe Godt v ghesalft met die olie der blijscappen bouen v mede v ghesellen

8 Mirrha ende aloes ende cassie van uwen cleederen van die yuooren huysen wt die welcke v vervruecht hebben 9die dochteren der coninghen in uwer eeren.

Die coninghinne heeft ghestaen aen v rechte sijde in vergulden habijt, al ombehanghen met menigherande cieraert.

10 Hoort dochter ende siet, ende neycht neder v oore, ende vergheet v volck ende ws vaders huys.

11 Ende die coninck sal begheren v schoonheyt, want hy is die Heere v Godt, ende hem sullen sij aenbidden.

12 Ende die dochteren van Tyrien sullen met ghiften v aensicht bidden, alle die rijcke des volcks.

13 Alle die glorie van des conincs dochter is van binnen in die gulden boorden 14al om ghecleedt met menigherande verwe.

Den coninck sullen maechden aenghebracht worden nae haer, haer naeste sullen voer v ghebracht worden.

15 Sij sullen ghebrocht worden met blijscap ende verhueghen, sij sullen ghebrocht worden in des conincs tempel.

16 In die stede van uwen vaderen sijn v sonen gheboren, ghy sultse princen stellen ouer gheheel aertrijck.

17 Sij sullen ghedachtich sijn ws naems in alle gheslachte ende gheslachte.

Daer om sullen die volcken v belijden inder eewicheyt, ende tot die eewe der eewen.