Psa 74 | NldLeuv1548 | STEP | VVy sullen v belijden Godt, wy sullen belijden, ende aenroepen uwen naem. Wy sullen vertellen v wonderlijcke dinghen,

‏ Psalms 74

Den .lxxiiij. Psalm.

Confitebimur tibi.

1 VVy sullen v belijden Godt, wy sullen belijden, ende aenroepen uwen naem.

Wy sullen vertellen v wonderlijcke dinghen, 2 als ick tijt sal ghenomen hebben, soo sal ick die rechtuerdicheden ordeelen.

3 Ghesmolten is die eerde ende alle die daer op woonen, ick heb haer columnen vast ghemaect.

4 Ick heb den boosen gheseyt en wilt niet booslijck doen, ende den misdadighen, en wilt den horn niet verheffen.

5 En wilt niet int hooch opheffen uwen horn, en wilt tseghen Godt gheen boosheyt spreken.

6 Want noch van oosten noch van westen noch vanden woesten berghen, 7 want Godt is die richter.

Desen vernedert hy, ende desen verheft hy, 8 want den kelck es in des Heeren handt van pueren wijn vol mencsels.

Ende hy heeften gheneycht van desen inden ghenen, maer nochtans sijnen ghift en is niet gheydelt daer aff sullen drincken alle die sondaers der eerden.

9 Maer ick salt vercondighen inder eewicheyt, ick sal singhen van Iacob.

10 Ende alle die hornen der sondaren sal ick breken, ende die hornen vanden rechtuerdighen sullen verhauen worden.