‏ Psalms 88

Den .lxxxviij. Psalm.

Misericordias Domini.

1DIe bermherticheden Godts sal ick inder eewicheyt singhen.

Van gheslachte tot gheslachte, sal ick vercondighen v waerheyt met mijnen mont.

2 Want ghy hebt gheseyt. Inder eewicheyt sal die bermherticheyt ghetimmert worden, in die hemelen sal v waerheyt bereydt worden.

3 Ick heb een verbont ghemaect met mijnen wtuercorenen, ick heb Dauid mijnen knecht ghesworen, 4tot inder eewicheyt sal ick v saet bereyden.

Ende ick sal op stichten van gheslachte tot gheslacte, uwen stoel.

5 Die hemelen sullen v wonderlijcheden belijden Heere, ende ooc voorwaer v warachticheyt in die vergaderinghe der heylighen.

6 Want wie sal in die wolcken den Heere ghelijck worden? wie sal Godts ghelijck sijn onder die kinderen Godts?

7 Godt die gheglorificeert wort inden raet der heylighen, groot ende veruaerlijck bouen alle die rontsom hem sijn.

8 Heere Godt der heyrcrachten wie is ws ghelijck? machtich sijdy Heere, ende v waerheyt is rontsomme omtrent v.

9 Ghy hebt heerscappie ouer die macht der zee, maer ghy stilt die beroerte van haer baren.

10 Ghy hebt vernedert als eenen ghewonden den houerdighen, inden arm uwer cracht hebdy v vianden verstroyt.

11 Vwe is den hemel ende uwe is die eerde, den omganck der aerden ende haer volheyt hebt ghy ghefundeert, dat noorde ende die zee hebdi ghescapen.

12 Thabor ende Hermon sullen in uwen naem verhueghen, uwe is den arm metter machticheyt.

13 Laet gheuesticht worden uwe hant, ende verhauen werde v rechte hant, 14rechtuerdicheyt ende ordeel sijn het bereytsel van uwen stoel.

Bermherticheyt ende waerheyt sullen voor v aensicht gaen, 15salich is tvolck dat iolijt maken can.

Heere in dlicht van uwen aensicht sullen sij wandelen, 16ende in uwen naem sullen sij hen verhueghen den gheheelen dach, ende door v rechtuerdicheyt sullen si verhauen worden.

17 Want die glorie van haerder cracht sijt ghy, ende in v welbehaghen sal onsen horn verheuen worden.

18 Want des Heeren is ons opneminghe, ende des heylichs van Israel ons conincs.

19 Doen hebdi ghesproken in een visioen tot uwen heylighen, ende ghy hebt gheseyt.

Ick heb helpe ghestelt in eenen machtighen, ende ic heb verheuen eenen wtuercoren wt mijnen volcke.

20 Ic heb gheuonden Dauid mijnen knecht, met mijn heylighe olie heb ick hem ghesalft.

21 Want mijn hant sal hem helpen, ende mijnen arm sal hem verstercken.

22 Die viant en sal gheen voorspoet teghen hem hebben, ende die sone der boosheyt en sal daer niet toe doen om hem te hinderen.

23 Ende ick sal te samen verslaen van sijnen aensicht sijn vianden, ende die hem haten sal ick ter vlucht keeren.

24 Ende mijn waerheyt, ende mijn bermherticheyt sullen met hem sijn, ende in mijnen naem sal sinen horn verhauen worden.

25 Ende ick sal in die zee sijn hant stellen, ende in die vloeden sijn rechte hant.

26 Hy heeft my aenroepen mijn vader sijdi, mijn God ende die ontfangher mijnder salicheyt.

27 Ende ick sal hem stellen tot eenen iersten gheborene, verhauen bouen die coninghen der eerden.

28 Inder eewicheyt sal ick hem bewaren mijn bermherticheit, ende mijn verbont sal voor hem getrouwe sijn.

29 Ende ick sal inder eewicheyt der eewicheden sijn saet stellen, ende sijnen throon ghelijc die daghen des hemels.

30 Maer eest dat sijn kinderen mijn wet verlaten, ende dat sij in mijn ordeelen niet en wandelen.

31 Eest dat sij mijn rechtuerdicheden ontheylighen, ende mijn gheboden niet en houden.

32 Soo sal ic metter roede hen boosheden versuecken, ende met slaghen hen sonden.

33 Maer mijn bermherticheyt en sal ic van hem niet verstroyen, noch ick en sal hem niet hinderen in mijn waerheyt.

34 Noch ic en sal mijn verbont niet ontheylighen, ende dat van mijnen lippen wtgaet en sal ick niet van onweerden maken.

35 Eens heb ick ghesworen in mijnen heylighen, ick en sal Dauid niet lieghen, 36saet sal inder eewicheyt blijuen.

37 Ende sijnen throon sal ghelijc die sonne voor mijn aensicht sijn, ende ghelijck die volle mane inder eewicheyt, ende een ghetrouwe ghetuyghe is inden hemel.

38 Maer ghi hebt verstooten ende versmaet, ghi hebt wtghestelt uwen ghesalfden.

39 Ghy hebt afghekeert dat verbont ws knechts, ghi hebt ontheylicht opder eerden sijn heylighe plaetse.

40 Ghy hebt alle sijn thuynen verdoruen, ghi hebt sijn vasticheyt tot anxt ghestelt.

41 Hem hebben berooft alle die ouer den wech ghinghen, hy is gheworden een verwijt sijnen ghebueren.

42 Ghy hebt verhauen die rechte hant vanden ghenen die hem verdrucken, ghi hebt verblijt alle sijn vianden.

43 Ghy hebt die helpe van sijnen sweerde afghekeert, ende ghy en hebt hem niet gheholpen inden strijdt.

44 Ghy hebt hem verdoruen van sijn suyueringhe, ende sijnen stoel hebdi ter eerden in stucken gheworpen.

45 Ghy hebt die daghen sijns tijts vermindert, ghy hebt hem ouergoten met bescaemtheyt.

46 Hoe langhe Heere suldi totten eynde v afkeeren, hoe lange sal v gramscap als een vier seer ontsteken worden?

47 Weest ghedachtich wat mijn substancie is, hebdi ooc ydelijc alle die kinderen der menschen ghestelt?

48 Wie is die mensche die leuen sal, ende die doot niet sien, die sijn ziele sal verlossen van die hant der hellen?

49 Waer sijn v oude bermherticheden Heere, ghelijc ghy Dauid ghesworen hebt in v waerheyt?

50 Weest ghedachtich Heere des verwijts van uwen dienaren (dwelck ick ghehouden heb in mijnen schoot) van veel Heydenen.

51 Dat v vianden verweten hebben Heere, dat si verweten hebben die veranderinghe van uwen ghesalfden.

52 Ghebenedijt sij die Heere inder eewicheyt, dat moet ghescieden, dat moet ghescieden.