‏ Romans 15

Dat .xv. Capittel. 1MAer wy die vromer sijn, moeten die crancheden der crancken verdraghen, ende niet ons seluen behaghen. 2Een ieghelijck van v lieden behaghe sijnen naesten int goede, tot ghestichticheyt. 3Want Christus en heeft sij seluen niet behaecht. Maer als daer ghescreuen is, Die versmaetheden van die ghene die v versmaedden sijn op my gheuallen. ✣ 4Want alle datter ghescreuen is, dat is tot onser leeringhen ghescreuen, op dat wy doer verduldicheyt ende troost der scriftueren hope hebben souden. 5Ende die Godt der patientien ende des troosts ghene v lieden dat ghy een ghevuelen hebben moecht tot malcanderen nae Iesum Christum, 6op dat ghy eendrachtelijck met eenen monde moecht Godt eeren ende den vader ons Heeren Iesu Christi. 7Daer om ontfanct malcanderen, ghelijck Christus v oock ontfanghen heeft ter eeren Gods. 8Want ick segghe dat Christus Iesus een dienaer gheweest heeft der besnijdenissen om die waerheyt Godts, om vast te maken die beloften der vaderen, 9maer dat die heydenen van die bermherticheyt Godt eeren. Alsoe daer gescreuen is. Daer om sal ick v belijden onder die heydenen, Heere, ende uwen name sal ick singhen. 10Ende wederom seyt hy, Verblijt v ghy heydenen met sijnen volcke. 11Ende weder om, Loeft alle ghy heydenen den Heere, ende prijst hem grootelijc alle ghi natien. 12Ende weder om seyt Isaias, Het sal een wortel van Iesse sijn, ende die daer op staen sal om te regeren die heydenen, in hem sullen die heydenen hopen. 13Maer Godt der hopen wil v veruullen met alle blijscappen, ende vrede wt gheloouen dat ghy oueruloedich moecht wesen in die hope, ende cracht des heylijchs gheests. ✴ 14Maer ick selue ben seker, mijn broeders, van v, dat ghy selue oock vol liefden sijt, veruult met alle wetenheyt, alsoe dat ghy malcanderen moecht vermanen. 15Maer ick heb cloeckelijcker tot v lieden ghescreuen eens deels, als v lieden tot ghedenckenissen weder om brenghende, om die gratie die my ghegheuen is van Gode, 16dat ick een dienaer sijn soude Christi Iesu onder die heydenen. Heylichmakende dat Euangelium Godts, op dat die offerande der heydenen aenghenaem worde, ende gheheylicht inden heylighen gheest. 17Daer om heb ic glorie in Christo Iesu tot Gode. 18Want ick en derre niet spreken van dien dinghen die Christus doer my niet en werct, ter ghehoorsamheyt vanden heydenen, metten woerden ende wercken 19met cracht van teekenen ende wonderlijcke wercken in die cracht des heylichs gheests, alsoe dat ick van Ierusalem al rontsomme tot Illiricum toe veruult hebbe dat euangelie Christi. 20Ende ick heb dat euangelie alsoe ghepreect, niet daer Christus ghenoemt is gheweest, om dat ick niet en soude op een anders fundament timmeren, 21maer also daer gescreuen is. Den welcken van hem niet vercondicht en is die sullent sien, ende diet niet ghehoort en hebben sullent verstaen. 22Waer om dat ick oock seer beledt ben gheweest om tot v te comen. 23Maer nu voerts gheen plaetse meer hebbende in dese landen, ende begheerte hebbende tot v lieden te comen van veel nu voerleden iaren 24als ic in Hispanien sal beghinnen te reysen, soe hope ick dat ick voerbij gaende v lieden sien sal, ende van v lieden derwaerts gheleyt worden eest dat ick my te voren eensdeels met v sal vermaect hebben. 25Daer om sal ick nu reysen in Ierusalem den heyleghen te dienen. 26Want die van Macedonien ende Achaien hebben ghesloten een ghemeyn almisse te doen tot den armen der heyleghen die in Ierusalem sijn. 27Want dit heeft hem behaecht, ende sij sijnt hen sculdich. Want eest dat die heydenen haerder gheesterlijcker goeden deelachtich sijn, soe moeten sij oock in die lichamelijcke goeden hen dienen. 28Aldus wanneer ick dit sal volbracht hebben, ende hen gheleuert dese vrucht, soe sal ick doer v lieden reysen in Hispanien. 29Ende ick weet wel dat ick tot v lieden comende, in die ouervloedicheyt van Christus benedictie comen sal. 30Aldus bidde ick v ghy broeders doer onsen Heere Iesum Christum, ende doer die liefde des heylichs gheests, dat ghy my helpet met ghebeden voer my aen Godt, 31dat ick verlost mach worden van die ongheloouighe die int Ioetsche landt sijn, ende dat mijns dienst offerande mach ghenaem sijn in Ierusalem den heylighen 32op dat ick tot v lieden mach comen met blijscap, doer den wille Godts, dat ick met v lieden mach vermaect worden. 33Ende Godt des vreeds sij met v allen. Amen.