‏ Tob 13

Dat .xiij. Capittel. 1ENde den ouden Tobias sijnen mont open doende heeft den Heere ghebenedijt, ende gheseyt, Groot sijdi Heere inder eewicheyt ende v rijck is tot allen eewen, 2want ghij gheesselt, ende maect ghesont, ghij leydt ter hellen, ende brengt wederom, ende daer en is niemant die v hant ontvlieden mach. 3Belijdt den Heere kinderen van Israel, ende int aensicht der heydenen soo loeft hem, 4want daerom heeft hy v lieden verstroyt onder die heydenen, die hem niet en kennen, dat ghij vertellen soudt sijn wonderlijcheden, ende hen doen weten, datter anders gheen almachtich Godt en is, sonder hem. 5Hij heeft ons ghecastijt om onse onrechtuerdicheden, ende hy sal ons behouden om sijn bermherticheyt. 6Daer om besiet wat hij met ons ghedaen heeft ende met vreese ende beuinghe so belijdt hem, ende den coninck der eewen verheft in v wercken, 7ende ick sal in dlant mynder gheuanckenissen hem belyden, want hy heeft sijn maiesteyt ghetoont in een sondich volck. 8Daer om bekeert v ghij sondaers, ende doet rechtuerdicheyt voor Gode, gheloouende dat hy met v sijn bermherticheyt doen sal, 9maer ick ende myn ziele sullen in hem verblyden. 10Ghebenedijt den Heere alle sijn wtuercorenen, houdt die daghen der blyscappen, ende belydt hem. 11Ierusalem stadt Gods, die Heere heeft v ghecastijdt doer die wercken uwer handen. 12Belydt den Heere in v goeden, ende ghebenedijdt Godt der eewen, dat hy in v sijn tabernakel wederom op timmere, ende roep weder om tot v alle die gheuanghenen, ende dat ghij moecht blyde sijn eewelijck ende ymmermeer. 13Met een blinckende licht suldi blincken, 14ende alle die eynden der werelt sullen v aenbidden. Die natien van verre sullen tot v comen, ende ghiften brenghende sullen sij in v den Heere aenbidden, ende v lant sullen sij tot heylichmakinghe hebben, 15Want den grooten naem sullen sij in v aenroepen. 16Vermalendijt sullen sij zijn die v versmaden, ende verdoemt sullen sij wesen, die v lasteren, ende ghebenedijt sullen sij zijn die v optimmeren sullen. 17Maer ghy sult v verblyden in v kinderen, want sij sullen alle ghebenedijt worden, ende vergadert totten Heere, 18Salich sijn zij alle die v lief hebben, ende die hen verblijden van uwen vrede. 19Mijn ziele ghebenedijt den Heere, want die Heere onse Godt heeft Ierusalem sijn stadt verlost van allen haer tribulacien. 20Salich sal ick sijn, eest dat daer achter ghebleuene myns saets sijn sullen om te sien die claricheyt van Ierusalem. 21Die poorten van Ierusalem sullen van Saphiren ende Smaragden ghetimmert worden, ende van costelijcken ghesteenten alle den omganck van haren mueren. 22Van witten ende suyueren steenen sullen allen haer straten ghepaueyt worden, ende doer haer straten sal Halleluia ghesonghen worden. Ghebenedijt is die Heere die haer verhauen heeft, dat sijn rijck soude sijn in die eewicheyt der eewicheden ouer haer. Amen. 23