‏ 1 Chronicles 15

Фидыды Чырын хаст ӕрцыди Йерусалиммӕ

1Давид йӕ сахары йӕхицӕн саразын кодта хӕдзӕрттӕ, Хуыцауы Фидыды Чырынӕн равзӕрста бынат ӕмӕ йын ныссагъта цатыр. 2Стӕй Давид загъта: «Ӕрмӕстдӕр левиттӕн ис Хуыцауы Фидыды Чырын хӕссыны бар, уымӕн ӕмӕ Дунедарӕг уыдоны равзӕрста Фидыды Чырын хӕссынӕн ӕмӕ Дунедарӕгӕн мыггагмӕ лӕггад кӕнынӕн». 3Давид ӕппӕт Израилы адӕммӕ дӕр фӕсидт Йерусалиммӕ, цӕмӕй Дунедарӕджы Фидыды Чырын ӕрбахӕссой, цы бынат ын равзӕрста, уырдӕм. 4Фӕдзырдта Аароны байзӕддӕгтӕм ӕмӕ левиттӕм: 5Кехаты мыггаджы раздзог Уриел ӕмӕ йе’рвадӕлтӕм — ӕхсӕзыссӕдз лӕгмӕ; 6Мерарийы мыггаджы раздзог Асайа ӕмӕ йе’рвадӕлтӕм — дыууӕсӕдӕ дыууын лӕгмӕ; 7Гершоны мыггаджы раздзог Иоел ӕмӕ йе’рвадӕлтӕм — дӕс ӕмӕ ӕхсӕзыссӕдз лӕгмӕ; 8Елицафаны мыггаджы раздзог Шемайа ӕмӕ йе’рвадӕлтӕм — дыууӕсӕдӕ лӕгмӕ; 9Хевроны мыггаджы раздзог Елиел ӕмӕ йе’рвадӕлтӕм — цыппарыссӕдз лӕгмӕ; 10Уззиелы мыггаджы раздзог Аминадав ӕмӕ йе’рвадӕлтӕм — дыууадӕс ӕмӕ фондзыссӕдз лӕгмӕ.

11Давид фӕдзырдта сауджынтӕ Цадок ӕмӕ Авиафармӕ, левиттӕй — Уриел, Асайа, Иоел, Шемайа, Елиел ӕмӕ Аминадавмӕ 12ӕмӕ сын загъта: «Левитты мыггӕгты хистӕртӕ! Уӕхи ссыгъдӕг кӕнут, уӕхӕдӕг дӕр ӕмӕ уе’фсымӕртӕ дӕр, ӕмӕ Дунедарӕджы, Израилы Хуыцауы, Фидыды Чырын ӕрбахӕссут, цы бынат ын равзӕрстон, уырдӕм. 13Амӕй размӕ Фидыды Чырын хӕсджытӕ сымахӕй кӕй нӕ уыдысты, куыд ӕмбӕлы, афтӕ ӕнувыд ыл кӕй нӕ уыдыстӕм, уый тыххӕй нӕ бафхӕрдта Дунедарӕг, нӕ Хуыцау». 14Уӕд сауджынтӕ ӕмӕ левиттӕ ссыгъдӕг кодтой сӕхи, цӕмӕй ӕрбахӕссой Дунедарӕджы, Израилы Хуыцауы, Фидыды Чырын. 15Ӕмӕ, Дунедарӕджы дзырдмӕ гӕсгӕ кӕддӕр Моисей куыд фӕдзӕхста, афтӕ левиттӕ Хуыцауы Фидыды Чырын хъилтыл ӕвӕрдӕй се уӕхсчытыл рахастой.

16Давид левитты хистӕртӕн бафӕдзӕхста, цӕмӕй зарӕггӕнджытӕ сӕвӕрой се’рвадӕлтӕй, уа сӕм алы цӕгъдӕнтӕ: дыууадӕстӕнонтӕ, хъисфӕндыртӕ, ӕмдзӕгъдгӕнӕнтӕ, ӕмӕ дардыл азӕлой цины зарджытӕ. 17Левиттӕ сӕвӕрдтой Иоелы фырт Хеманы ӕмӕ уый ӕрвад Асафы, Варахийы фырты; адонӕн се’рвадӕлтӕй та, Мерарийы байзӕддӕгтӕй — Кушаиайы фырт Етаны. 18Уыдонимӕ — сӕ иннӕ ӕрвадӕлты, левитты куысты дӕлдӕр къӕпхӕныл чи лӕууыд, уыдон: Захариа, Йаазиел, Шемирамот, Йехиел, Унни, Елиав, Бенайа, Маасеа, Маттитиа, Елифле, Микнеа, Овед-Едом ӕмӕ Йеиелы. 19Зарӕггӕнджытӕ Хеман, Асаф ӕмӕ Етан цагътой ӕрхуы ӕмдзӕгъдгӕнӕнтӕй; 20Захариа, Азиел, Шемирамот, Йехиел, Унни, Елиав, Маасеа ӕмӕ Бенайа — дыууадӕстӕнонтӕй, цъӕхснаг хъӕлӕсӕй; 21Маттитиа, Елифле, Микнеа, Овед-Едом, Йеиел ӕмӕ Азазиа та цагътой хъисфӕндыртӕй, бӕзджын хъӕлӕсӕй. 22Зарӕг амыдта левитты зарӕггӕнджыты разамонӕг Кенаниа, уымӕн ӕмӕ уыцы курдиатӕй хайджын уыд. 23Варахи ӕмӕ Елкана Фидыды Чырынӕн хъахъхъӕнджытӕ уыдысты. 24Сауджынтӕ Шеваниа, Иосафат, Нетанел, Амасай, Захариа, Бенайа ӕмӕ Елиезер, Хуыцауы Фидыды Чырыны разӕй цӕугӕйӕ, цагътой хӕтӕлтӕй. Овед-Едом ӕмӕ Йехиа дӕр хъахъхъӕнджытӕ уыдысты Фидыды Чырынӕн.

25Давид, Израилы хистӕртӕ ӕмӕ миныхицӕуттӕ ацыдысты ӕмӕ Овед-Едомы хӕдзарӕй Дунедарӕджы Фидыды Чырын ӕрбахастой. 26Хуыцау баххуыс кодта, Дунедарӕджы Фидыды Чырын чи хаста, уыцы левиттӕн, ӕмӕ Йын авд галы ӕмӕ авд фыры нывондӕн ӕрхастой.

27Давидӕн йӕ уӕлӕ уыди пӕлӕз, лыстӕг гӕнӕй уафт хъуымацӕй; ахӕм пӕлӕзтӕ уыди Фидыды Чырын хӕссӕг левиттӕн се’ппӕтыл дӕр, стӕй ма зарӕггӕнджытӕ ӕмӕ сӕ разамонӕг Кенаниайыл. Давидыл ма ноджы уыди гӕн хъуымацӕй ефод дӕр. 28Афтӕ, цины хъӕртӕ, сыкъауадындзтӕ, хӕтӕлтӕ, дыууадӕстӕнонтӕ ӕмӕ хъисфӕндырты цагъд ӕмӕ ӕмдзӕгъдгӕнӕнты къӕрцц-къӕрццимӕ, ӕрбахастой Дунедарӕджы Фидыды Чырын ӕгас Израил.

29Дунедарӕджы Фидыды Чырын Давиды сахары къӕсӕрӕй куы бахызти, уӕд Саулы чызг Мелхолӕ рудзынгӕй ракаст, паддзах Давиды фыр цинӕй гӕппытӕгӕнгӕ ӕмӕ кафгӕ федта ӕмӕ йыл йӕ мидзӕрдӕйы бабылысчъил.