1Ch 13 | OssIBT2022 | STEP | Давид уынаффӕ кодта миныхицӕуттимӕ, сӕдӕйыхицӕуттимӕ ӕмӕ ӕппӕт иннӕ раздзӕуджытимӕ.

‏ 1 Chronicles 13

Фидыды Чырын рахастой Кирйат-Иаримӕй

1 Давид уынаффӕ кодта миныхицӕуттимӕ, сӕдӕйыхицӕуттимӕ ӕмӕ ӕппӕт иннӕ раздзӕуджытимӕ. 2 Израилы адӕмы ӕмбырдӕн загъта: «Кӕд разы стут ӕмӕ Дунедарӕгӕн, нӕ Хуыцауӕн, фӕндон у, уӕд ардӕм ӕрсидӕм, Израилы алы рӕтты нын чи баззад, уыцы ӕфсымӕртӕм, уыдонимӕ сӕ сахарты ӕмӕ сӕ уӕтӕрты цӕрӕг сауджынтӕ ӕмӕ левиттӕм дӕр, 3 ӕмӕ нӕхимӕ рахӕссӕм нӕ Хуыцауы Фидыды Чырын, уымӕн ӕмӕ йыл Саулы заман нӕ сагъӕс кодтам». 4 Ӕмбырды адӕм сразы сты Давидимӕ, се’ппӕтмӕ дӕр раст фӕкаст йӕ фӕндон.

5 Афтӕмӕй, Кирйат-Иаримӕй Хуыцауы Фидыды Чырын ӕрбахӕссыны охыл Давид ӕрӕмбырд кодта ӕппӕт израилӕгты дӕр — Мысыры арӕныл Шихоры цӕугӕдонӕй райдайгӕйӕ Ливаны дӕлвӕзмӕ цӕгатӕрдыгӕй, Хаматы сахарӕй, бахизӕны онг чидӕриддӕр царди, уыдоны. 6 Давид ӕппӕт израилӕгтимӕ ацыд иудейаг сахар Бааламӕ (ома Кирйат-Иариммӕ), цӕмӕй уырдыгӕй ӕрбахӕссой Хуыцауы Фидыды Чырын, херувимтыл Ӕнцайӕг Дунедарӕджы ном хӕссӕг Чырын. 7 Хуыцауы Фидыды Чырын ног уӕрдоны раластой Авинадавы хӕдзарӕй. Уӕрдон Узза ӕмӕ Ахйойы бар бакодтой. 8 Давид ӕмӕ ӕппӕт израилӕгтӕ та Хуыцауы раз фыр цинӕй кафыдысты, зарыдысты ӕмӕ цагътой хъисфӕндыртӕй, дыууадӕстӕнонтӕ, далатӕ, ӕмдзӕгъдгӕнӕнтӕ ӕмӕ хӕтӕлтӕй. 9 Кидоны мусы цурмӕ куыд бахӕццӕ сты, афтӕ ифтыгъд галтӕ уӕрдон фӕкъул кодтой, ӕмӕ Узза Фидыды Чырынмӕ къухӕй февнӕлдта, ма рахауа, зӕгъгӕ. 10 Фидыды Чырынмӕ къухӕй кӕй февнӕлдта, уый тыххӕй Дунедарӕг смӕсты ис Уззамӕ ӕмӕ йӕ ӕрцавта. Узза уыцы ран, Хуыцауы раз, мардӕй ӕрхауди. 11 Давидӕн стыр маст уыди, Дунедарӕг Уззайы кӕй ӕрцавта, уый, ӕмӕ уыцы бынат Перец-Узза рахуыдта. Абон дӕр ӕй афтӕ хонынц.

12 Уыцы бон Давид тынг фӕтарсти Хуыцауӕй ӕмӕ загъта: «Цы ныфсӕй ма бахӕссон Хуыцауы Фидыды Чырын мӕхимӕ?» 13 Давид Фидыды Чырын Давиды сахармӕ нал аласта, гатаг Овед-Едомы хӕдзармӕ йӕ арвыста. 14 Хуыцауы Фидыды Чырын Овед-Едомы хӕдзары фӕци ӕртӕ мӕйы, ӕмӕ Дунедарӕгӕй арфӕгонд фесты йӕ хӕдзаронтӕ дӕр ӕмӕ йе’ппӕт исбон дӕр.