1Ch 14 | OssIBT2022 | STEP | Тиры паддзах Хирам Давидмӕ йӕ минӕвӕртты ӕрбарвыста, семӕ — кедр хъӕдӕрмӕг, ноджы — дурамайджытӕ ӕмӕ хъӕддӕснытӕ, цӕмӕй йын галуан саразой.

‏ 1 Chronicles 14

Давид Йерусалимы сахары

1 Тиры паддзах Хирам Давидмӕ йӕ минӕвӕртты ӕрбарвыста, семӕ — кедр хъӕдӕрмӕг, ноджы — дурамайджытӕ ӕмӕ хъӕддӕснытӕ, цӕмӕй йын галуан саразой. 2 Давид бамбӕрста, Израилӕн ӕй паддзахӕй Дунедарӕг кӕй сӕвӕрдта ӕмӕ йын йӕ паддзахад Израилы, Йӕ адӕмы, сӕраппонд кӕй скадджын кодта.

3 Давид ма Йерусалимы дӕр устытӕ скодта, ӕмӕ ма йын уыдонӕй дӕр рацыди фырттӕ ӕмӕ чызджытӕ. 4 Мӕнӕ, Йерусалимы йын чи райгуырд, уыдоны нӕмттӕ: Шаммуа, Шовав, Натан, Соломон, 5 Ивхар, Елишуа, Елпелет, 6 Ногах, Нефег, Йафиа, 7 Елишама, Беелйада, Елифелет.

Давид филистимӕгтыл фӕуӕлахиз

8 Филистимӕгтӕ фехъуыстой, Давиды ӕппӕт Израилӕн паддзахӕй кӕй байсӕрстой, уый ӕмӕ ӕмхуызонӕй йӕ агурӕг фӕраст сты, ӕрцахсӕм ӕй, зӕгъгӕ. Давид уый куы базыдта, уӕд сӕ размӕ рацыд. 9 Уалынмӕ филистимӕгтӕ ӕрбабырстой Рефаимы дӕлвӕзмӕ. 10 Давид Хуыцауы бафарста: «Филистимӕгты ныхмӕ цӕуон ӕви нӕ? Мӕ къухмӕ сӕ ратдзынӕ?» Дунедарӕг ын загъта: «Цу, ратдзынӕн сӕ дӕ къухмӕ». 11 Давид ссыди Баал-Перациммӕ ӕмӕ сӕ уым ныддӕрӕн кодта. Загъта: «Дон йӕ ауӕзт куыд атоны, афтӕ мын мӕ къухӕй ме знӕгты ӕнгом рӕнхъытӕ батыдта Хуыцау». Уымӕ гӕсгӕ ацы бынат схуыдтой Баал-Перацим ^{▼▼Кӕс 2 Пад. 5:20.}. 12 Филистимӕгтӕн сӕ хуыцӕуттӕ уым дзӕгъӕлӕй баззадысты, ӕмӕ сӕ Давид арты басудзын кодта.

13 Филистимӕгтӕ та ногӕй Рефаимы дӕлвӕзмӕ бабырстой. 14 Давид та Хуыцауы бафарста, ӕмӕ йын Уый дзуапп радта: «Сӕ ныхмӕ ма ссу, фӕлӕ сӕ иувӕрсты ӕрзил ӕмӕ тута бӕлӕсты къохы’рдыгӕй сӕ чъылдыммӕ баздӕх. 15 Ӕмӕ дӕм, цыма, тута бӕлӕсты цъуппытӕй къахуынӕр хъуысы, афтӕ куы фӕкӕса, уӕд-иу райдай хӕцын — уый Хуыцау рацыди дӕ разӕй филистимӕгты ӕфсад цӕгъдынмӕ». 16 Давид сӕххӕст кодта Хуыцауы фӕдзӕхст ӕмӕ филистимӕгты дӕрӕн кодта Гивонӕй суанг Гезеры онг.

17 Ӕмӕ айхъуысти Давиды ном ӕппӕт бӕстӕтыл, Дунедарӕджы фӕндонӕй дзы стъӕлфын байдыдтой ӕппӕт адӕмтӕ иууылдӕр.