‏ 1 Corinthians 11

1Мӕн бафӕзмут, ӕз Чырыстийы куыд фӕзмын, афтӕ. ^a

Кувыны ӕгъдау

2Разы уӕ дӕн, ӕфсымӕртӕ, алы хъуыддаджы дӕр уӕ зӕрдыл кӕй лӕууын ӕмӕ уӕм цы ахуырад ӕрхастон, ууыл иууылдӕр фидар кӕй хӕцут, уымӕй. ^b 3Ноджы ма мӕ фӕнды, цӕмӕй сымах зонат: алы нӕлгоймагӕн дӕр йӕ хицау Чырысти у, сылгоймаджы хицау нӕлгоймаг у, Чырыстийы хицау та Хуыцау у. ^c 4Кувгӕйӕ кӕнӕ пехуымпариуӕг кӕнгӕйӕ, бӕгъӕмсар цы нӕлгоймаг нӕ уа, уый йӕхи ӕмӕ йӕ Хицауы ӕгад кӕны. 5Бӕгъӕмсарӕй цы сылгоймаг кувы кӕнӕ пехуымпариуӕг кӕны, уый дӕр йӕхи ӕмӕ йӕ хицауы ӕгад кӕны — ахӕм сылгоймаг дастсӕрӕй уӕлдай нӕу. 6Кӕд сылгоймаг сӕрбӕттӕн нӕ дары, уӕд йӕ сӕр алвынӕд; фӕлӕ сылгоймагмӕ кӕд йӕ сӕр алвынын кӕнӕ адасын худинаг кӕсы, уӕд сӕрбӕттӕн дарӕд. 7Нӕлгоймаг бӕгъӕмсар хъуамӕ уа, уымӕн ӕмӕ йӕ Хуыцау Йӕхимӕ гӕсгӕ сфӕлдыста, ӕмӕ Хуыцауы кадӕй кадджын у; сылгоймаджы кад та нӕлгоймагӕй у. ^d 8Уымӕн ӕмӕ сылгоймаг нӕлгоймагӕй нӕ равзӕрди, фӕлӕ нӕлгоймаг — сылгоймагӕй. 9Нӕлгоймаджы не сфӕлдыстӕуыди сылгоймаджы тыххӕй, фӕлӕ сылгоймаджы сфӕлдыстӕуыди нӕлгоймаджы тыххӕй. 10Уымӕ гӕсгӕ хицаудзинады нысанӕн сылгоймаг йӕ сӕрыл хъуамӕ сӕрбӕттӕн дара — зӕдтӕн зонынӕн. 11Ӕниу ног царды, Бардарӕджы раз, сылгоймагӕн нӕлгоймаг куыд ахсджиаг у, афтӕ ахсджиаг у сылгоймаг дӕр нӕлгоймагӕн. 12Уымӕн ӕмӕ, кӕд сылгоймаг нӕлгоймагӕй равзӕрди, уӕддӕр нӕлгоймаг сылгоймагӕй райгуыры. О, фӕлӕ ӕппӕт дӕр сфӕлдыста Хуыцау.

13Ахъуыды-ма кӕнут уӕхӕдӕг, сылгоймагӕн бӕгъӕмсарӕй Хуыцаумӕ кувын фидауы? 14Ӕрдз уӕ йӕхӕдӕг ахуыр кӕны: нӕлгоймагӕн сӕрыхъуынтӕ уадзын ӕгад у, 15сылгоймаг та сӕрыхъуынтӕ куы уадза, уӕд ын уый кад у, уымӕн ӕмӕ йын сӕрыхъуынтӕ ӕрдзон ӕмбӕрзӕнау лӕвӕрд сты. 16Фӕлӕ кӕд уыдӕтты тыххӕй искӕй быцӕу кӕнын фӕнды, уӕд мах дӕр ӕмӕ Хуыцауы аргъуантӕ дӕр ахӕм ӕгъдауыл хӕст не стӕм.

Бардарӕджы ӕхсӕвӕры тыххӕй

17Ныр та уын цы зӕгъдзынӕн, уымӕй уӕ ӕппӕлгӕ нӕ кӕнын, уымӕн ӕмӕ уе’мбырдтӕ пайдайы бӕсты зиан ӕрхӕссынц. 18Фыццаджыдӕр, ӕз хъусын, зӕгъгӕ, аргъуанмӕ куы ӕрцӕут, уӕд фӕкъордтӕ вӕййут, ӕмӕ афтӕ кӕй у, уый мӕ иуӕрдыгӕй уырнгӕ дӕр кӕны. ^e 19Ӕцӕг уӕм алыхуызон зондахаст дӕр хъуамӕ уа, уе’хсӕн фӕлтӕрд чи у, уыдон куыд сбӕлвырд уой, афтӕ. ^f

20Сымах иумӕ куы ӕрӕмбырд вӕййут, уӕд уын дзы Бардарӕджы ӕхсӕвӕр нӕ рауайы — 21алчидӕр февналы йе’хсӕвӕр ахӕрынмӕ, ӕмӕ иу ӕххормагӕй баззайы, иннӕ та ӕфсӕст ӕмӕ расыг вӕййы. 22Хӕдзӕрттӕ уын нӕй, цӕмӕй хӕргӕ ӕмӕ нуазгӕ уым кӕнат? Ӕви Хуыцауы Аргъуан ницӕмӕ дарут? Кӕнӕ уӕм мӕгуыртыл дӕлӕмӕ хӕцын хорз кӕсы? Цы уын загъдӕуа? Ӕппӕлгӕ уӕ ракӕнон? Нӕ, уый тыххӕй уӕ нӕ раппӕлдзынӕн.

23Уымӕн ӕмӕ, Бардарӕгӕй цы базыдтон, ӕз уый сымахӕн дӕр бацамыдтон: гадзрахатӕй Йыл куы рацыдӕуыд, уыцы ӕхсӕв Бардарӕг Йесо райста дзул, ^g 24арфӕ ракодта Хуыцауӕн, асаста йӕ ӕмӕ загъта: «[Айсут ӕмӕ хӕрут] — уый Мӕ Буар у, ӕмӕ саст цӕуы уӕ сӕраппонд. Афтӕ кӕнут Мӕ ӕрымысынӕн». 25Ӕхсӕвӕры фӕстӕ райста сӕны кӕхц дӕр ӕмӕ загъта: «Ацы кӕхц у Мӕ Тугӕй фидаргонд ног фидыд. Кӕдфӕнды дӕр дзы ма нуазат — Мӕ ӕрымысынӕн нуазут». 26Уӕдӕ ацы дзулӕй куы фӕхӕрут ӕмӕ ацы сӕнӕй куы бануазут, уӕд уымӕй хъусын кӕнут Бардарӕджы мӕлӕты тыххӕй — цалынмӕ ӕрцӕуа, уӕдмӕ.

27Аккаг аргъ сын нӕ кӕны, афтӕмӕй ацы дзул ӕмӕ ацы сӕнӕй чидӕриддӕр ахода, уый бацӕудзӕни Бардарӕджы Буар ӕмӕ Туджы тӕригъӕды. ^h 28Уӕдӕ алы адӕймаг дӕр ныккӕсӕд йӕ зӕрдӕмӕ ӕмӕ уый фӕстӕ хӕрӕд ацы дзулӕй ӕмӕ нуазӕд ацы сӕнӕй. ⁱ 29Бардарӕджы буарӕн аргъ чи нӕ кӕны, афтӕмӕй чи хӕры ӕмӕ нуазы, уый уыцы дзул ӕмӕ сӕнӕй йӕхи тӕрхойнаг кӕны. 30Уымӕн сты сымахӕй бирӕтӕ ӕнӕбон ӕмӕ рынчын; мӕлгӕ дӕр уӕ дзӕвгар акодта. 31Нӕхӕдӕг рагацау нӕхицӕн тӕрхонгӕнӕг куы уаиккам, уӕд-иу тӕрхойнаг нӕ кӕниккам. 32Фӕлӕ нын Бардарӕг тӕрхон куы фӕкӕны ӕмӕ нӕ куы бафхӕры, уӕд нӕ Уый афтӕмӕй сраст кӕны, цӕмӕй нын иннӕ дунеимӕ иумӕ тӕрхон ма кӕна.

33Уымӕ гӕсгӕ, ме’фсымӕртӕ, ӕхсӕвӕрмӕ куы ӕрӕмбырд вӕййут, уӕд-иу кӕрӕдзимӕ банхъӕлмӕ кӕсут. 34Кӕд исчи ӕххормаг у, уӕд йӕ хӕдзары бахӕрӕд. Уе’мбырдтӕ уын хъуамӕ сӕ фӕдыл тӕрхон ма сайой. Иннӕ хъуыддӕгтӕ банывыл кӕндзынӕн, мӕхӕдӕг уӕм куы ӕрцӕуон, уӕд.