‏ 1 Corinthians 12

Сыгъдӕг Уды лӕвӕрттӕ

1Мӕн фӕнды, ме’фсымӕртӕ, цӕмӕй сымах зонат, Сыгъдӕг Уд кӕй дӕтты, уыцы курдиӕтты тыххӕй. 2Сымах зонут: муртаттӕгтӕ ма куы уыдыстут, уӕд уӕ цыма иставӕр тых сайдта, афтӕ куывтат ӕгомыг гуымирытӕн. ^a 3Уымӕ гӕсгӕ уын зӕгъын: Сыгъдӕг Удӕй хайджын чи у, уый Йесойы нӕ ралгъитдзӕн, ӕмӕ, Сыгъдӕг Удӕй хайджын чи нӕу, уый Йесойы Бардарӕг не схондзӕн. ^b

4Курдиӕттӕ алыхуызон сты, дӕтгӕ та сӕ уыцы иу Уд кӕны. ^c 5Хуыцауӕн алы хуызы балӕггадгӕнӕн ис, разӕнгардгӕнӕг та уыцы иу Бардарӕг у. 6Куыстытӕ алыхуызон сты, фӕлӕ не’ппӕты фӕрцы ӕппӕт дӕр уыцы иу Хуыцау аразы. 7Алкӕй удыхъӕды дӕр Сыгъдӕг Уд Йӕхи ӕвдисы сӕрмагонд хуызы, фӕлӕ — иумӕйаг хъуыддаджы пайдайӕн. ^d 8Иуӕн уд йӕ ныхасы бавӕры уӕлзонд, иннӕмӕн — зонынад, 9аннӕмӕ Уды руаджы фӕзыны уырнындзинад, кӕмӕндӕр та Уд схай кӕны низтӕ дзӕбӕх кӕныны курдиат. ^e 10Иуӕн — диссӕгтӕ аразыны, иннӕмӕн — пехуымпарады, ӕртыккагӕн — адӕймаг цавӕр удӕй хайджын у, уый иртасыны, цыппӕрӕмӕн — алыхуызон ӕвзӕгтыл дзурыны, фӕндзӕмӕн — уыцы ӕвзӕгтыл цы загъдӕуыд, уый ӕмбарын кӕныны курдиат. ^f 11Фӕлӕ ӕппӕт уыдӕттӕ уыцы иу, алкӕмӕн дӕр, Йӕхи куыд фӕнды, ахӕм лӕвӕрттӕ Чи кӕны, уыцы Уды архайдӕй цӕуынц.

Буар иу у, йӕ уӕнгтӕ та — бирӕ

12Буар иу у, йӕ уӕнгтӕ та — бирӕ. Фӕлӕ кӕд бирӕ сты, уӕддӕр се’ппӕт дӕр иу буар сты. Афтӕ у Чырысти дӕр. ^g 13Уымӕн ӕмӕ не’ппӕтыл дӕр — иудейӕгтӕ ӕмӕ бердзенӕгтыл, цагъартӕ ӕмӕ сӕрибар адӕмыл — иу Удӕй саргъуыдӕуыд ӕмӕ иу буар систӕм, не’ппӕтӕн дӕр уыциу Уд рардӕуыди. ^h

14Буар та иу уӕнгӕй нӕу, фӕлӕ бирӕ уӕнгтӕй. 15Къах куы зӕгъид: «Къух кӕй нӕ дӕн, уымӕ гӕсгӕ буары хай нӕ дӕн», уӕд уый тыххӕй буары хай нал уаид? 16Ӕмӕ хъус куы зӕгъид: «Цӕст кӕй нӕ дӕн, уымӕ гӕсгӕ буары хай нӕ дӕн», уӕд уый тыххӕй буары хай нал уаид? 17Кӕд ӕнӕхъӕн буар цӕст у, уӕд хъусгӕ та куыд кӕнид? Кӕд буар ӕнӕхъӕнӕй хъус у, уӕд ӕмбудгӕ та куыд кӕнид? 18Хуыцау та буары алы уӕнгӕн дӕр скодта бынат, куыд Ӕй фӕндыд, афтӕ. 19Уӕнгтӕ иууылдӕр иу уӕнг куы уаиккой, уӕд буар уӕвгӕ уаид? 20Ныр та уӕнгтӕ бирӕ сты, буар та иу у. 21Цӕст къухӕн нӕ зӕгъдзӕни: «Ницӕмӕн мӕ хъӕуыс». Сӕр къӕхтӕн нӕ зӕгъдзӕни: «Ницӕмӕн мӕ хъӕут». 22Уый нӕ, фӕлӕ нӕм лӕмӕгъдӕр цы уӕнгтӕ кӕсынц, уыдон ӕнӕмӕнг хъӕуынц. 23Иннӕтӕй нӕм къаддӕр чи кӕсы, нӕ буары уыцы уӕнгтыл фылдӕр мӕт кӕнӕм. 24Аив чи нӕу, нӕ уыцы уӕнгтӕ хуыздӕр ӕмбӕрзӕм; аив уӕнгты та ӕмбӕрзын нӕ хъӕуы. Хуыцау буар афтӕ скодта, цӕмӕй фылдӕр мӕт кӕнӕм, фаг нымад чи нӕу, уыцы уӕнгтыл, 25ӕмӕ буары уӕнгтӕ ма ныххицӕнтӕ уой, фӕлӕ кӕрӕдзиуыл мӕт кӕной ӕмхуызон. 26Уымӕ гӕсгӕ буары иу уӕнг куы фӕриссы, уӕд иннӕтӕ дӕр фӕриссынц йемӕ. Иу уӕнг куы скадджын уа, уӕд иннӕ уӕнгтӕ дӕр цин кӕнынц йемӕ.

27Сымах Чырыстийы буар стут, хицӕнтӕй та — Йӕ буары уӕнгтӕ. ⁱ 28Ӕмӕ Хуыцау уыдонӕй иуты аргъуаны сӕвӕрдта, фыццаджыдӕр, апостолтӕй, дыккаджы — пехуымпартӕй ▼

▼Ома Хуыцауы ныхас амонджытӕй.

, уый фӕстӕ — ахуыргӕнджытӕй. Уый иутӕн радта диссӕгтӕ ӕвдисыны тых, стӕй низтӕй дзӕбӕх кӕныны, ӕххуыс кӕныны, разамынд дӕттыны ӕмӕ алы ӕвзӕгтыл дзурыны курдиӕттӕ. ^k 29Се’ппӕт дӕр апостолтӕ сты? Се’ппӕт дӕр пехуымпартӕ сты? Се’ппӕт дӕр ахуыргӕнджытӕ сты? Се’ппӕтмӕ дӕр ис диссӕгтӕ ӕвдисыны тых? 30Се’ппӕтмӕ дӕр ис низтӕй дзӕбӕх кӕныны курдиат? Се’ппӕты бон у алыхуызон ӕвзӕгтыл дзурын? Се’ппӕт дӕр ӕвзӕгтӕ ӕмбарын кӕнынц?

31Тырнут уӕлдӕр курдиӕттӕм. Ӕз уын бацамондзынӕн тӕккӕ хуыздӕр фӕндаг.