1Cor 15 | OssIBT2022 | STEP | Ноджы ма уын иу хатт уӕ зӕрдыл лӕууын кӕнын, ӕфсымӕртӕ, ӕз уӕм цы Фарны Уац ӕрхастон, уый; сымах ӕй райстат уӕ зӕрдӕмӕ, сси уӕ царды бындур.

‏ 1 Corinthians 15

Чырыстийы райгас

1 Ноджы ма уын иу хатт уӕ зӕрдыл лӕууын кӕнын, ӕфсымӕртӕ, ӕз уӕм цы Фарны Уац ӕрхастон, уый; сымах ӕй райстат уӕ зӕрдӕмӕ, сси уӕ царды бындур. 2 Уыцы Уацы фӕрцы фервӕздзыстут, кӕд ӕмӕ, цы уын фехъусын кодтон, ууыл фидар хӕцат, уӕд; кӕд нӕ — уӕд дзӕгъӕлы баууӕндыдыстут.

3 Уымӕн ӕмӕ уӕм ӕз ӕрхастон, мӕхӕдӕг цы райстон, уыцы тӕккӕ сӕйрагдӕр: Сыгъдӕг Фысты куыд загъдӕуы, афтӕ Чырысти амарди нӕ тӕригъӕдты тыххӕй; 4 бавӕрдтой Йӕ, ӕмӕ ӕртыккаг бон райгас ис, Фысты куыд загъд ис, афтӕ. ^a 5 Йӕхи раргом кодта Кифӕмӕ, уый фӕстӕ та дыууадӕс апостолмӕ дӕр. ^b 6 Стӕй уыцы иу рӕстӕг Йӕхи равдыста фондзсӕдӕ ӕфсымӕрӕй фылдӕрмӕ. Уыдонӕн сӕ фылдӕр, иуӕй-иутӕй фӕстӕмӕ, абон дӕр ма сӕрӕгас сты. 7 Уый фӕстӕ Йӕхи равдыста Йаковмӕ, фӕстӕдӕр — ӕппӕт апостолтӕм. 8 Се’ппӕты фӕстӕ, ӕфтыддагмӕ фӕзынӕгау, фӕзынди мӕнмӕ дӕр. ^c 9 Уымӕн ӕмӕ ӕз апостолтӕн сӕ тӕккӕ къаддӕр дӕн ӕмӕ апостолы ном хӕссыны аккаг дӕр нӕ дӕн, Хуыцауы аргъуан кӕй ӕфхӕрдтон, уый тыххӕй. ^d 10 Фӕлӕ ӕз, цы дӕн, уый Хуыцауы хорзӕхӕй дӕн. Ӕмӕ Йӕ хорзӕхӕй хайджын дзӕгъӕлы нӕ фӕдӕн: ӕз се’ппӕтӕй дӕр фылдӕр бакуыстон — ӕниу, ӕз нӕ, фӕлӕ мемӕ чи ис, Хуыцауы уыцы хорзӕх. ^e 11 Уӕдӕ мах — ӕз дӕр ӕмӕ иннӕ апостолтӕ дӕр — уыцы Фарны Уац хъусын кӕнӕм, ӕмӕ йыл сымах баууӕндыдыстут.

Мӕрдты райгасы тыххӕй

12 Чырысти мӕрдтӕй кӕй райгас, кӕд Фарны Уац ууыл дзуры, уӕд сымахӕй иуӕй-иутӕ куыд зӕгъынц, мӕрдтӕн райгасы амал нӕй, зӕгъгӕ? ^f 13 Кӕд мӕрдтӕн райгасы амал нӕй, уӕд Чырысти дӕр нӕ райгас. ^g 14 Ӕмӕ кӕд Чырысти нӕ райгас, уӕд, цы уац хъусын кӕнӕм, уый дӕр дзӕгъӕлы у, ӕмӕ уӕ уырнындзинад дӕр дзӕгъӕлы у. 15 Ӕмӕ, кӕд мӕрдтӕн райгасы амал нӕй, уӕд мах дӕр Хуыцауӕн разыниккам мӕнгӕвдисӕнтӕ, уымӕн ӕмӕ Хуыцауы тыххӕй дзуриккам, зӕгъгӕ, Уый райгас кодта, Кӕй нӕ райгас кодта, уыцы Чырыстийы. 16 Уымӕн ӕмӕ, кӕд мӕрдтӕн райгасы амал нӕй, уӕд Чырысти дӕр нӕ райгас. 17 Ӕмӕ, Чырысти кӕд нӕ райгас, уӕд уӕ уырнындзинадӕй пайда нӕй ӕмӕ нырма уӕ тӕригъӕдтӕй не ссӕрибар стут. ^h 18 Уӕд, Чырыстийыл ӕууӕндгӕйӕ чи амард, уыдон дӕр бабын сты. 19 Ӕмӕ, кӕд Чырыстийыл ӕрмӕстдӕр ацы царды дарӕм нӕ зӕрдӕ, уӕд ӕппӕт адӕмы’хсӕн махӕй ӕнамонддӕр нӕй.

20 Фӕлӕ Чырысти мӕрдтӕй райгас — чи амарди, уыдонӕй фыццаг Уый райгас. ⁱ 21 Уымӕн ӕмӕ, мӕлӕт адӕймаджы руаджы куыд у, афтӕ Адӕймаджы руаджы у мӕрдтӕй райгас дӕр. ^j 22 Адамимӕ иууылдӕр куыд мӕлынц, афтӕ иууылдӕр райгас уыдзысты Чырыстиимӕ, 23 алчидӕр йӕ рӕстӕджы: фыццаг Чырысти, Чырысти куы’рцӕуа, уӕд та — йӕхионтӕ. ^k 24 Уый фӕстӕ ӕрцӕудзӕн кӕрон. Чырысти ӕппӕт ӕнӕбуар хицӕутты, барджынты ӕмӕ тыхджынты куы басӕтта, уӕд Паддзахад ратдзӕни Фыдмӕ — Хуыцаумӕ. ^l 25 Уымӕн ӕмӕ Чырысти хъуамӕ паддзахиуӕг кӕна, цалынмӕ Йын Хуыцау ӕппӕт знӕгты Йӕ къӕхты бын ӕрӕвӕра, уӕдмӕ. ^m 26 Бабын уыдзӕн фӕстаг знаг — мӕлӕт. ⁿ 27 Уымӕн ӕмӕ Чырыстийӕн Хуыцау «ӕппӕт Йӕ къӕхты бын ӕрӕвӕрдта». Кӕд загъд у «ӕппӕт Ын Йӕ къӕхты бын ӕрӕвӕрдта», уӕддӕр бӕлвырд у — ам ныхас нӕ цӕуы Чырыстийы къӕхты бын ӕппӕт ӕрӕвӕрӕг Хуыцауӕн Йӕхиуыл. ^o 28 Хуыцау Ын ӕппӕт Йӕ дӕлбар куы бакӕна, уӕд Фырт Йӕхӕдӕг дӕр бацӕудзӕн, ӕппӕт Ын Йӕ дӕлбар Чи бакодта, Уый дӕлбар, ӕмӕ Хуыцау алцӕмӕн дӕр ӕмӕ алкӕмӕн дӕр уыдзӕн иунӕг Хицау. ^p

29 Науӕд мӕрдты сӕраппонд цӕй охыл райсынц аргъуыд? Кӕд мӕрдтӕн райгасы амал нӕй, уӕд цӕмӕн райсынц аргъуыд мӕрдты сӕраппонд? 30 Ӕмӕ мах дӕр ӕрвылсахат цӕй тыххӕй вӕййӕм тӕссаг уавӕрты? ^q 31 Ӕфсымӕртӕ, ӕз алы бон дӕр мӕлгӕ кӕнын: нӕ Бардарӕг Йесо Чырыстийы руаджы сымахӕн цы сарӕзтон, ӕз уымӕй буц дӕн, ӕмӕ мын уый дӕтты афтӕ зӕгъыны бар. ^r 32 Ӕз Эфесы хъӕддаг сырдтимӕ куы тох кодтон, уӕд мӕ нысан кӕд зӕххон уыди, уӕд мын уымӕй цы пайда ис? Кӕд мӕрдтӕ ӕгас нӕ кӕнынц, уӕд «байдайӕм хӕрын ӕмӕ нуазын, уӕддӕр райсом мӕлгӕ кӕндзыстӕм!»

33 Ма фӕсайды ут: «Ӕвзӕр ӕмбӕлттӕ хорз миниуджытӕ сафӕг сты».

34 Куыд ӕмбӕлы, афтӕ уӕхи ӕрӕмбарут ӕмӕ тӕригъӕды мауал ӕфтут. Уӕ худинаджы тыххӕй уын ӕй зӕгъдзынӕн: сымахмӕ ис, Хуыцауы чи нӕ зоны, ахӕмтӕ. ^s

Зӕххон ӕмӕ уӕларвон буар

35 Исчи бафӕрсдзӕн: «Куыд райгас уыдзысты мӕрдтӕ? Ӕмӕ цавӕр буары ӕрцӕудзысты?» 36 Ӕнӕзонд, ды цы тауыс, уый нӕ райгас уыдзӕни, куынӕ амӕла, уӕд. ^t 37 Ӕмӕ, ды куы фӕтауыс, уӕд фидӕны буар нӕ тауыс, фӕлӕ бӕгънӕг нӕмыг, мӕнӕуы нӕмыг уа ӕви ӕндӕр истӕй нӕмыг. 38 Фӕлӕ йын Хуыцау дӕтты, цавӕр Ӕй фӕнды, ахӕм буар, ӕмӕ афтӕ алы нӕмыгӕн дӕр — йӕхи буар. 39 Буӕрттӕ та ӕмхуызон не сты. Адӕмӕн иу буар ис, цыппӕркъахыг цӕрӕгойтӕн — ӕндӕр буар, мӕргътӕн — ӕндӕр, кӕсӕгтӕн — ӕндӕр. 40 Ис ӕрвон буӕрттӕ ӕмӕ зӕххон буӕрттӕ: ӕрвонтӕн иу кад ис, зӕххонтӕн — ӕндӕр, 41 ӕндӕр кад ис хурӕн, ӕндӕр кад — мӕйӕн, ӕндӕр кад — стъалытӕн. Сӕ кадмӕ гӕсгӕ иу стъалы иннӕйы хуызӕн нӕу.

42 Афтӕ уыдзӕн, мӕрдтӕ куы райгас уой, уӕд дӕр: байтыдӕуы ӕмбигӕйӕ, райгас вӕййы ӕнӕмӕлгӕйӕ; 43 байтыдӕуы ницӕйагӕй, райгас вӕййы кадджынӕй; байтыдӕуы лӕмӕгъӕй, райгас вӕййы тыхджынӕй; ^u 44 байтыдӕуы ӕрдзон буар, райгас вӕййы монон буар. Ис ӕрдзон буар, ис монон буар.

45 Сыгъдӕг Фыст дӕр афтӕ зӕгъы: «Фыццаг адӕймаг — Адам — сси удгоймаг», фӕстаг Адам та сси царддӕттӕг Уд. ^v 46 Раздӕр вӕййы монон нӕ, фӕлӕ ӕрдзон, монон та — ӕрмӕстдӕр уый фӕстӕ. 47 Фыццаг адӕймаг у зӕххон, сыджытӕй конд, дыккаг Адӕймаг та — уӕларвон. ^w 48 Сыджытӕй конд фыццаг адӕймаг цавӕр у, ахӕм сты ӕппӕт зӕххонтӕ дӕр, ӕмӕ Уӕларвон цавӕр у, ахӕм уыдзысты уӕларвонтӕ дӕр. ^x 49 Ӕмӕ мах, сыджытӕй конд адӕймаджы хуызӕн куыд уыдыстӕм, афтӕ уыдзыстӕм Уӕларвоны хуызӕн дӕр. ^y

50 Зӕгъын уын, ӕфсымӕртӕ: фыд ӕмӕ тугӕн Уӕларвон Паддзахадмӕ бацӕуын сӕ бон нӕу, ӕмӕ, мӕлӕт тых цӕуыл кӕны, уый ӕнӕмӕлгӕ нӕ уыдзӕн. ^z 51 Зӕгъын уын сусӕгдзинад: мах не’ппӕт дӕр нӕ амӕлдзыстӕм, фӕлӕ не’ппӕт дӕр фендӕрхуызон уыдзыстӕм. ^aa 52 Уайтӕккӕ, цӕсты фӕныкъуылдмӕ, куыддӕр фӕстаг сыкъауадындз ныууаса, афтӕ. Сыкъауадындзы уастмӕ мӕрдтӕ райгас уыдзысты, мӕлӕт сын нал уыдзӕн, мах та фендӕрхуызон уыдзыстӕм. ^ab 53 Уымӕн ӕмӕ, чи ӕмбийы, нӕ уыцы буар хъуамӕ суа ӕнӕмбигӕ, ӕмӕ, мӕлӕт тых цӕуыл кӕны, уый хъуамӕ суа ӕнӕмӕлгӕ. 54 Ацы ӕмбигӕ буар ӕнӕмбигӕ куы суа ӕмӕ мӕлӕт тых цӕуыл у, уый ӕнӕмӕлгӕ куы суа, уӕд сӕххӕст уыдзӕни, Сыгъдӕг Фысты цы загъд ис, уый: «Мӕлӕт сӕфт ӕрцыд! Уӕлахиз!
55 Мӕлӕт! Кӕм ис дӕ уӕлахиз?
Мӕлӕт! Кӕм ис дӕ маргӕйдзаг фат?» ^{▼▼Фӕстӕдӕры къухфыстыты ацы бынат у афтӕ: «Мӕлӕт! Кӕм ис дӕ маргджын фат? Мӕрдты бӕстӕ! Кӕм ис дӕ уӕлахиз?»}

56 Тӕригъӕд — уый у мӕлӕты маргӕйдзаг фат; тӕригъӕд та хъару Ӕгъдауӕй райсы. ^ad 57 Бузныг Хуыцауӕй — Уый нын нӕ Бардарӕг Йесо Чырыстийы руаджы дӕтты уӕлахиз! ^ae

58 Уӕдӕ, мӕ уарзон ӕфсымӕртӕ, ут фидар, ӕнӕфӕцудгӕ, иудадзыг ӕмӕ зӕрдиагӕй кусут Бардарӕгӕн; уӕ фӕллойы тыххӕй Бардарӕгӕй ӕнӕ хӕрзиуӕгӕй кӕй нӕ баззайдзыстут, уый зонут. ^af