1Ki 5 | OssIBT2022 | STEP | Тиры паддзах Хирам цӕрӕнбонты лымӕнӕй фӕцарди Давидимӕ. Ӕмӕ Соломон йӕ фыды фӕстӕ паддзах сси, уый куы фехъуыста, уӕд ӕм ӕрбарвыста йӕ минӕвӕрттӕ.

‏ 1 Kings 5

Соломоны фидыд Тиры паддзах Хирамимӕ

1 Тиры паддзах Хирам цӕрӕнбонты лымӕнӕй фӕцарди Давидимӕ. Ӕмӕ Соломон йӕ фыды фӕстӕ паддзах сси, уый куы фехъуыста, уӕд ӕм ӕрбарвыста йӕ минӕвӕрттӕ. 2 Соломон сын бафӕдзӕхста, цӕмӕй Хирамӕн зӕгъой: 3 «Ды зоныс, Мӕ фыд Давидӕн Дунедарӕджы Кувӕндон саразын нӕ бантыст, уымӕн ӕмӕ ӕдзух йӕ сыхаг адӕмтимӕ хӕцыди, йӕ фыдгултимӕ, цалынмӕ йын Дунедарӕг уӕлахиз нӕ радта, се’ппӕты дӕр ын йӕ къӕхты бын нӕ ныккодта, уӕдмӕ. 4 Ныр мӕнӕн та Дунедарӕг радта ӕнцой, фыдгул мын нал ис ӕмӕ сӕдас дӕн алырдыгӕй дӕр. 5 Гъемӕ, зӕгъын, Кувӕндон саразон Дунедарӕгӕн, Мӕ Хуыцауӕн. Кӕддӕр Дунедарӕг уый кой ракодта мӕ фыд Давидӕн дӕр, зӕгъгӕ, Мӕ номыл Мын хӕдзар сараздзӕни дӕ фырт, дӕ фӕстӕ дын дӕ къӕлӕтджыны кӕй сбадын кӕнон, уый. 6 Уымӕ гӕсгӕ дӕ курын, ливайнаг кедртӕ мын ракалын кӕн. Мӕ кусджытӕ кусдзысты дӕ кусджытимӕ, ӕмӕ дын ӕз сӕ куысты тыххӕй фиддзынӕн, цас мын зӕгъай, уый бӕрц мызд. Ды зоныс: махмӕ, сидойнӕгтау бӕлӕстӕ калынмӕ чи арӕхсы, ахӕм адӕм нӕй».

7 Хирам тынг бацин кодта, Соломоны курдиат ын куы рафӕзмыдтой, уӕд ӕмӕ загъта: «Арфӕгонд уӕд Дунедарӕг, Давидӕн ахӕм куырыхон фырт Чи радта, уыцы бирӕ адӕмӕн ӕй паддзах Чи скодта!» 8 Соломонӕн фехъусын кӕнын кодта: «Дӕ курдиат дын фехъуыстон ӕмӕ дын дӕ фӕндон сӕххӕст кӕндзынӕн. Ракалын дын кӕндзынӕн кедртӕ ӕмӕ кипаристӕ. 9 Мӕ кусджытӕ сӕ Ливанӕй денджызы былмӕ нылласдзысты, стӕй сӕ ӕз денджызыл тъиуибӕстытӕй бахӕццӕ кӕндзынӕн, кӕдӕм зӕгъай, уырдӕм, уым сӕ самайын кӕндзынӕн, ӕмӕ-иу сӕ ды уырдыгӕй алас. Ӕцӕг мын ды дӕр мӕ хъуыддаг араз, мӕ хӕдзарӕн мын ӕрвит хӕлц». 10 Ӕмӕ Хирам Соломонӕн радта кедртӕ ӕмӕ кипаристӕ, Соломоны куыддӕриддӕр фӕндыд, афтӕ.

11 Соломон дӕр ӕрвылаз Хирамы хӕдзарӕн ӕрвыста ссӕдз мин коры мӕнӕу ӕмӕ ссӕдз коры сыгъдӕг оливӕйы сой.

12 Дунедарӕг Соломонӕн радта куырыхон зонд, зӕрдӕ йын куыд бавӕрдта, афтӕ. Соломон ӕмӕ Хирамы’хсӕн уыди фидыд, сӕ кӕрӕдзиимӕ цардысты хӕларӕй.

Кувӕндон саразыны развӕлгъау куыстытӕ

13 Паддзах Соломон бегарайы хӕс ӕрӕвӕрдта Израилы адӕмыл ӕмӕ уый тыххӕй рахицӕн кӕнын кодта дӕс ӕмӕ ссӕдз мин лӕджы. 14 Уыдоны ӕртӕ ӕмхуызон къордыл фӕдих кодта ӕмӕ дзы ӕрвылмӕй Ливанмӕ йӕ рады ӕрвыста иу къорд — дӕс мин лӕджы. Афтӕмӕй дзы алы къорд дӕр Ливаны уыд иу мӕй, сӕхимӕ та — дыууӕ мӕйы. Сӕ сӕргъы лӕууыд Адонирам. 15 Уыдонӕй уӕлдай ма Соломонмӕ хӕххон дурсӕттӕнты куыста ӕвдай мин дурхӕссӕджы ӕмӕ ӕстай мин дурлӕгъзгӕнӕджы. 16 Соломон сын сӕ сӕргъы сӕвӕрдта цӕстдарджытӕ, нымӕцӕй — ӕртӕ мин ӕртӕсӕдӕ лӕджы. 17 Ӕмӕ сын паддзах бардзырд радта, цӕмӕй Кувӕндонӕн бындур ӕрӕвӕрынӕн ласой стыр ӕмӕ зынаргъ, биноныг карст дуртӕ. 18 Кӕрдгӕ та сӕ кодтой Соломоны ӕмӕ Хирамы кусджытӕ, стӕй — гевалӕгтӕ. Ноджы ма цӕттӕ кодтой хъӕдӕрмӕг ӕмӕ ӕндӕр дуртӕ дӕр Кувӕндон аразынӕн.