‏ 1 Kings 6

Соломон аразы Дунедарӕджы Кувӕндон

1Израилӕгтӕн Мысыры цагъарадӕй се ссӕрибарыл цыппарсӕдӕ ӕстай азы куы рацыд, уӕд Соломон йӕ паддзахиуӕджы цыппӕрӕм азы дыккаг мӕйы, зивы мӕйы, Дунедарӕгӕн Кувӕндон аразын райдыдта. 2Соломон Дунедарӕгӕн цы Кувӕндон саразын кодта, уымӕн йӕ дӕргъ уыдис ӕртиссӕдз ӕлмӕрины, йӕ уӕрх — ссӕдз ӕлмӕрины, йӕ бӕрзӕнд та — дӕс ӕмӕ ссӕдз ӕлмӕрины. 3Кувӕндонӕн йӕ тыргъы дӕргъ уыди сӕйраг агъуыстӕн йӕ уӕрхы йас — ссӕдз ӕлмӕрины, йӕ уӕрх та — дӕс ӕлмӕрины. 4Соломон Кувӕндонӕн скодта ӕмырӕхгӕд рудзгуытӕ куыд мидӕмӕ фӕтӕндӕргӕнгӕ фӕлгуыртимӕ. 5Кувӕндон ӕмӕ Рухсмонуаты алыварс быруйӕн йе’мкъул скодта ӕфтуанагъуыст фӕрссаг хатӕнтимӕ. 6Цӕмӕй ӕфтуанагъуыст Кувӕндоны къултыл ма ӕндзӕва, уый тыххӕй быру ӕддӕрдыгӕй кӕрӕй-кӕронмӕ конд ӕрцыди къӕпхӕнты хуызы; агъуыстӕн йӕ бинаг уӕладзыджы уӕрх уыди фондз ӕлмӕрины, дыккаг уӕладзыджы уӕрх — ӕхсӕз ӕлмӕрины, ӕртыккаджы уӕрх та — авд ӕлмӕрины. 7Кувӕндон арӕзт цыди цӕттӕкарст дуртӕй, ӕмӕ дзы уымӕ гӕсгӕ нӕдӕр дзӕбуджы, нӕдӕр сарты, нӕдӕр ӕндӕр исты ӕфсӕн кусӕнгарзы хъӕр хъуыст. 8Ӕфтуанагъуыстӕн йӕ бинаг уӕладзыгмӕ Кувӕндоны хуссарварсӕрдыгӕй уыди дуар. Бинаг уӕладзыгӕй дыккагмӕ, дыккагӕй та ӕртыккагмӕ цыди здыхсгӕ асин. 9Кувӕндоны къултӕ амад куы фесты, уӕд ын Соломон йӕ уӕлхӕдзар скӕнын кодта кедр хъайвантӕ ӕмӕ фӕйнӕгӕй. 10Ӕфтуанагъуысты уӕлхӕдзар дӕр конд ӕрцыди кедры хъӕдӕрмӕгӕй. Кувӕндоны къултимӕ йӕ бастой кедры хъӕдӕй конд аххӕрджытӕ. Ӕфтуанагъуысты уӕладзгуытӕн сӕ бӕрзӕнд дӕр уыди фӕйнӕ фондз ӕлмӕрины.

11Дунедарӕг Соломонӕн загъта: 12– 13«Мӕ уагӕвӕрдтӕ ӕмӕ Мын Мӕ амындтытӕм гӕсгӕ куы цӕрай, Мӕ фӕдзӕхстытӕ Мын иууылдӕр куы ӕххӕст кӕнай, уӕд Ӕз сӕххӕст кӕндзынӕн, дӕу тыххӕй дӕ фыд Давидӕн цы дзырд радтон, уый: цы Кувӕндон Мын аразыс, уым, израилӕгты’хсӕн, цӕрдзынӕн, Мӕ адӕмы ӕвӕгӕсӕгӕй нӕ ныууадздзынӕн».

Кувӕндоны арӕзт мидӕгӕй

14Соломон дарддӕр дӕр архайдта Кувӕндон аразыныл. Йӕ къултӕ ӕмӕ йӕ сӕр куы сцӕттӕ сты, 15уӕд паддзах бавнӕлдта мидагъуысты куыстытӕм. Йӕ къултыл ын астӕрдӕй цары онг бахуыдта кедр фӕйнӕг, йӕ астӕрдыл та кипарис фӕйнӕг. 16Фӕстаг къулӕй размӕ ссӕдз ӕлмӕрины ранымадта ӕмӕ уыцы ран кедры хъӕдӕй цӕхгӕрмӕ суагъта ног къул, цӕмӕй йын йӕ фӕстӕ сараза Рухсмонуат. 17Кувӕндоны раззаг хайӕн йӕ дӕргъ уыди дыууиссӕдз ӕлмӕрины. 18Кувӕндон мидӕджырдыгӕй иууылдӕр ӕмбӕрзт ӕрцыди кедрӕй, уый уӕлӕ та — алы дидинджытӕ ӕмӕ насӕнгӕс нывӕфтыдтӕ. Алцыдӕр уыди кедры хъӕдӕрмӕгӕй конд, дуртӕ никуыцӕй зындысты.

19Рухсмонуат Соломон уый тыххӕй скодта, цӕмӕй дзы Дунедарӕджы Фидыды Чырын сӕвӕра. 20Рухсмонуатӕн йӕ дӕргъ, йӕ уӕрх ӕмӕ йӕ бӕрзӕнд уыдысты ӕмиӕстӕ — ссӕдзгай ӕлмӕринтӕ. Соломон ӕй иууылдӕр састӕрдта сыгъдӕг сыгъзӕринӕй. Стӕй, кедр хъӕдӕй цы нывондхӕссӕн скодта, уый дӕр састӕрдта сыгъдӕг сыгъзӕринӕй. 21– 22Кувӕндоны раззаг уат дӕр Соломон иууылдӕр састӕрдта сыгъдӕг сыгъзӕринӕй, уыимӕ — Рухсмонуаты къул, ӕмӕ уыцы къулыл цӕхгӕрмӕ айвӕзта сызгъӕрин рӕхыстӕ. Сызгъӕринӕй састӕрдта, Рухсмонуаты раз цы нывондхӕссӕн лӕууыд, уый дӕр.

23Рухсмонуаты мидӕг оливӕ бӕласы хъӕдӕй скодта дыууӕ херувимы, сӕ бӕрзӕнд уыди фӕйнӕ дӕс ӕлмӕрины. 24– 25– 26Сӕ иуӕн дӕр ӕмӕ иннӕмӕн дӕр йӕ базыртӕ уыдысты фӕндзгай ӕлмӕринты дӕргъӕн, афтӕмӕй базыртыгъд херувимтӕй алкӕцыйӕн дӕр йӕ иу базыры кӕронӕй йӕ иннӕ базыры кӕронмӕ уыди дӕс ӕлмӕрины. Сӕ дыууӕ дӕр уыдысты ӕмиӕстӕ, ӕмхуызӕттӕ. 27Соломон базыртыгъд херувимты сӕвӕрдта Рухсмонуаты мидӕг, кӕрӕдзийы фарсмӕ. Сӕ кӕройнаг базырты кӕрӕттӕ ӕндзӕвыдысты Кувӕндоны фӕйнӕ къулыл, сӕ иннӕ базырты кӕрӕттӕ та — кӕрӕдзиуыл. 28Херувимты дӕр Соломон састӕрдта сыгъзӕринӕй.

29Кувӕндоны ӕппӕт къултыл, мидӕггаг агъуысты дӕр ӕмӕ ӕддаг агъуысты дӕр, скъахта херувимты, пальмӕты ӕмӕ дидинджыты нывӕфтыдтӕ. 30Кувӕндонӕн йӕ астӕрдыл дӕр скодта сыгъзӕрин цъар — рӕбинаг уаты дӕр ӕмӕ раззаг уаты дӕр. 31Рухсмонуатмӕ бацӕуӕны скодта дывӕлдах дуар оливӕ бӕласы хъӕдӕй, Уыдис ын фондзкъӕпхӕнон тарвӕзтӕ, иу тарваз — иннӕйы мидӕг. 32Соломон дуарӕн йӕ дыууӕ хайыл дӕр скъахта херувимты, пальмӕты ӕмӕ дидинджыты нывӕфтыдтӕ, ӕмӕ херувимтӕ ӕмӕ пальмӕты састӕрдта сыгъзӕринӕй. 33Кувӕндонмӕ бацӕуӕны дӕр Соломон оливӕ бӕласы хъӕдӕй скодта дывӕлдах дуар, уыдис ын цыппаркъӕпхӕнон тарвӕзтӕ, иу тарваз — иннӕйы мидӕг. 34Кипарис хъӕдӕй йын скодта дыууӕ дывӕлдах дуары, алы дуарӕн йӕ дыууӕ ӕрдӕджы дӕр кодтой гом. 35Уыцы дуӕрттыл дӕр Соломон скъахта херувимты, пальмӕты ӕмӕ дидинджыты нывӕфтыдтӕ ӕмӕ сӕ нывӕфтыдты уӕле биноныг састӕрдта сыгъзӕринӕй.

36Мидӕггаг кӕрты, ома сауджынты кӕрты, астӕрд скодта карст дуртӕ ӕртӕ фӕлтӕры ӕвӕрдӕй. Сӕрӕй ма сыл иу фӕлтӕр бафтыдта кедрӕй конд амадхъӕдтӕ.

37Афтӕмӕй, Соломон Дунедарӕджы Кувӕндонӕн бындур ӕрӕвӕрдта йӕ паддзахиуӕджы цыппӕрӕм азы дыккаг мӕйы, зивы мӕйы, 38арӕзт та йӕ фӕци иуӕндӕсӕм азы ӕстӕм мӕйы, булы мӕйы. Кувӕндон арӕзт фӕци йе’ппӕт агъуыстытимӕ, куыд хъуыди, афтӕ. Соломон ӕй фӕцарӕзта ӕнӕхъӕн авд азы.