‏ 1 Samuel 18

1Давид Саулимӕ куы ныхас кодта, уӕд Ионатаны зӕрдӕмӕ фӕцыди, йӕхи удау ӕй бауарзта. 2Уыцы бон Саул Давиды йӕхимӕ баурӕдта, йӕ фыдмӕ йӕ сӕ хӕдзармӕ нал ауагъта. 3Ионатан Давидӕй загъта ӕрдхорд, уымӕн ӕмӕ йӕ бауарзта йӕхи удау. 4Раласта йӕ пӕлӕз ӕмӕ йӕ ӕрдхорды лӕварӕн радта Давидӕн. Радта йын йӕ хотыхтӕ дӕр, уыимӕ йӕ кард, йе’рдын ӕмӕ йӕ рон.

Саул Давидӕй тӕрсын райдыдта

5Саул-иу Давиды кӕдӕм арвыста, уым-иу уый алкӕддӕр разынд ӕнтыстджын, ӕмӕ йӕ Саул сӕвӕрдта ӕфсады хицауӕй. Давиды бауарзтой ӕппӕт адӕм дӕр ӕмӕ Саулы дӕлдӕртӕ дӕр.

6Давид филистимаг богалы куы амардта ӕмӕ ӕфсӕдтимӕ куы раздӕхти, уӕд-иу Израилы алы сахарӕй дӕр паддзах Саулы размӕ, далатӕ ӕмӕ дзӕгъдзӕгъӕгтӕ сӕ къухы, афтӕмӕй цины хъӕртимӕ сылгоймӕгтӕ ракалдысты. Кафыдысты ӕмӕ фыр цинӕй зарыдысты: 7«Саул ныццагъта минтӕ,
Давид та — дӕсгай минтӕ!»

8Саулӕн йӕ маст фыхти, хъыг ын уыдысты уыцы ныхӕстӕ. Йӕхинымӕр загъта: «Давидӕн радтой дӕсгай минтӕ, мӕнӕн та — минтӕ. Паддзахы бынат хъуаг ма у ӕрмӕстдӕр». 9Ӕмӕ зулмӕ кӕсын райдыдта уӕдӕй фӕстӕмӕ Давидмӕ.

10Дыккаг бон та Саулыл, йӕхи хӕдзары уыди, афтӕмӕй Хуыцауы ӕрвыст фыдмон тых кӕнын байдыдта, ӕмӕ Саул феррайау ис. Давид ӕй раздӕрау сабыр кодта йӕ цагъдӕй. Саулы къухы уыди арц, 11ӕмӕ йыл ӕй фехста, къулмӕ йӕ ныххуыйон, зӕгъгӕ. Фӕлӕ Давидӕн дыууӕ хатты йӕхи фӕсайын бантыст.

12Саул тарсти Давидӕй, уымӕн ӕмӕ йыл Дунедарӕг аудыдта, Саулы та ныууагъта. 13Ӕмӕ Саул йӕхицӕй адард кодта Давиды. Йе’фсады йӕ миныхицауӕй сӕвӕрдта, ӕмӕ Давид ӕфсады сӕргъы цыди хӕстон балцыты. 14Йе’ппӕт хъуыддӕгты дӕр-иу разынд ӕнтыстджын, уымӕн ӕмӕ йыл Дунедарӕг аудыдта. 15Саул уыдта Давиды стыр ӕнтыстытӕ ӕмӕ дзы тарсти. 16Израилӕгтӕ ӕмӕ иудейӕгтӕ та йӕ се’ппӕт дӕр уарзтой, уымӕн ӕмӕ хӕстон балцыты лӕууыди сӕ сӕргъы.

Давид ракуырдта Саулы чызг Мелхолӕйы

17Саул Давидӕн загъта: «Мӕ хистӕр чызг Меравы дын ратдзынӕн. Ӕрмӕст мын ӕхсарджын у ӕмӕ Дунедарӕджы хӕстыты архай». Йӕхинымӕр та дзырдта: «Мӕхи къухӕй нӕ, фӕлӕ филистимӕгты къухӕй амӕлӕд». 18Давид Саулӕн загъта: «Чи дӕн ӕз, ӕмӕ чи у мӕ хъӕстӕ ӕмӕ мӕ фыды мыггаг Израилы? Куыд хъуамӕ суон паддзахы сиахс?» 19Фӕлӕ Саулы чызг Меравы Давидӕн раттыны афон куы ӕрцыд, уӕд ӕй мехолайаг Адриелӕн радтой.

20Ныр Давиды та бауарзта Саулы иннӕ чызг, Мелхолӕ. Саул уый куы фехъуыста, уӕд ын ӕхсызгон уыди. 21Саул ахъуыды кодта: «Цӕй ӕмӕ йын раттон мӕ чызджы. Уый йын уыдзӕни къӕппӕг, ӕмӕ филистимӕгты къухӕй амӕлдзӕн».

Саул загъта Давидӕн: «Ныр мӕ сиахс бауыдзынӕ». 22Ӕмӕ йӕ дӕлдӕртӕн бафӕдзӕхста: «Давидӕн хибарӕй зӕгъут: „Ды зоныс, паддзах дыл куыд ауды ӕмӕ дӕ йе’ппӕт дӕлдӕртӕ дӕр куыд уарзынц, уый. Паддзахы сиахс дын ӕнӕ суӕвгӕ нӕй“». 23Саулы дӕлдӕртӕ уыцы ныхӕстӕ Давидмӕ фӕхӕццӕ кодтой. Уый сын дзуапп радта: «Сымахмӕ гӕсгӕ, паддзахы сиахс суӕвын ӕнцон у? Ӕз мӕгуыр дӕн, адӕмы’хсӕн — ӕнӕрӕгъыдзыд».

24Саулмӕ йӕ дӕлдӕртӕ фӕхабар кодтой, афтӕ ӕмӕ афтӕ загъта Давид, зӕгъгӕ. 25Саул сын бафӕдзӕхста: «Зӕгъут Давидӕн: паддзахы ирӕд нӕ хъӕуы, ӕрмӕст ын йе знӕгтӕй йӕ маст райс — амар сӕдӕ филистимаджы, сунӕт сын скӕн ӕмӕ сын сӕ лыггӕгтӕ паддзахмӕ ӕрбахӕсс».

Саул йӕ зӕрдӕ дардта, ныр Давид филистимӕгты къухӕй амӕлдзӕн, зӕгъгӕ. 26Саулы дӕлдӕртӕ Давидӕн йӕ ныхӕстӕ куы рафӕзмыдтой, уӕд йӕ зӕрдӕмӕ фӕцыд паддзахы сиахс суӕвыны хъуыды. Ӕмгъуыды бонмӕ ма рӕстӕг уыди, 27афтӕ Давид йӕ адӕмимӕ фӕраст ӕмӕ дыууӕсӕдӕ филистимаджы амардта. Сӕ сунӕты лыггӕгтӕ сын ӕрбахаста ӕмӕ сӕ паддзахы раз ӕрӕвӕрдта, цӕмӕй йӕ уый йӕ сиахс бакӕна. Ӕмӕ йын Саул радта йӕ чызг Мелхолӕйы.

28Саул федта, Дунедарӕг Давидыл кӕй ауды, йӕ чызг Мелхолӕ дӕр ӕй кӕй уарзы, уый 29ӕмӕ дзы ноджы тынгдӕр старсти. Цӕрӕнбонтӕм ын знаг сси.

30Филистимаг ӕлдӕрттӕ-иу рацыдысты хӕцынмӕ, ӕмӕ-иу Давид алы хатт дӕр Саулы иннӕ дӕлдӕртӕй ӕнтыстджындӕр разынд, ӕмӕ йӕ ном тынг скадджын ис.