1 Samuel 21
Давид ӕмӕ Ахимелех
1Давид ӕрхӕццӕ ис Новы сахармӕ, сауджын Ахимелехмӕ. Ахимелех тарстхуызӕй йӕ размӕ рауад ӕмӕ йӕ афарста: «Иунӕг цӕмӕн дӕ, демӕ куыд ничи ис?» 2Давид Ахимелехӕн дзуапп радта: «Паддзах мын иу хъуыддаг бахӕс кодта ӕмӕ мын загъта: „Цӕмӕ дӕ’рвитын ӕмӕ дын цы фӕдзӕхсын, уый мачи базонӕд“. Мӕ адӕмы та бӕрӕг ранмӕ барвыстон. 3Ныр, дӕ къух цы амоны, уый мын ратт: иу-фондз дзулы, кӕнӕ ма дӕм цы ис, уый». 4Сауджын загъта Давидӕн: «Ӕнӕуи дзул мӕм нӕй, фӕлӕ мӕм ис кувӕггаг дзул. Ӕрмӕст, кӕд дӕ адӕм сӕхиуыл фӕхӕцыдысты ӕмӕ сылгоймӕгтимӕ нӕ фесты, уӕд». 5Давид ын дзуапп радта: «Хӕстон балцы куы рацӕуӕм, уӕд сылгоймӕгтӕ тобӕгонд вӕййынц махӕн. Нӕ балц Хуыцауы номыл куы нӕ вӕййы, уӕд дӕр мӕ адӕм куы никуы фӕчъизи кӕнынц сӕхи, уӕд абон куыннӕ хъуамӕ баззадаиккой сыгъдӕгӕй?» 6Ӕмӕ йын сауджын радта кувӕггаг дзултӕ. Хуымӕтӕг дзул ӕм нӕ уыди, фӕлӕ, Дунедарӕджы раз кувӕндоны кӕй ӕрӕвӕрынц, ӕрмӕстдӕр ахӕм дзултӕ. Уыдон ист ӕрцӕуынц кувӕндоны фынгӕй ӕмӕ тӕккӕ уыцы бон сӕ бӕсты ӕрӕвӕрдӕуы ногконд дзултӕ. 7Уыцы бон уым, Дунедарӕджы хӕдзары, уыди Саулы дӕлдӕртӕй иу, йӕ фыййӕутты хицау, едомаг, йӕ ном — Доег. 8Давид Ахимелехы бафарста: «Ам дӕм арц кӕнӕ кард нӕ разындзӕни? Мемӕ нӕдӕр мӕ кард райстон, нӕдӕр мӕ иннӕ хотыхтӕ, уымӕн ӕмӕ мын паддзахы фӕдзӕхст ӕвӕстиатӕй ӕххӕстгӕнгӕ уыд». 9Сауджын загъта: «Мӕнӕ Теревинфы дӕлвӕзы кӕй амардтай, уыцы филистимаг Голиафы кард ефоды фӕстӕ кӕттаджы тыхтӕй лӕууы. Кӕд дӕ фӕнды, уӕд ӕй райс, ӕндӕр мӕм ницы ис». Давид загъта: «Амӕн дзы ӕмбал нӕй. Ратт мын ӕй».Давид алыгъди паддзах Ахишмӕ
10Тӕккӕ уыцы бон Давид, Саулӕй лидзгӕйӕ, араст ис дарддӕр, ӕмӕ Гаты паддзах Ахишмӕ бацыд. 11Ахишӕн йӕ дӕлдӕртӕ загътой: «Уый Давид куы у, амы паддзӕхтӕй иу! Ууыл зарыдысты, кафгӕйӕ: „Саул ныццагъта минтӕ,Давид та — дӕсгай минтӕ“?»
12Давид уыцы ныхӕстӕ йӕ зӕрдыл бадардта ӕмӕ тынг фӕтарсти Гаты паддзах Ахишӕй. 13Уымӕ гӕсгӕ сӕ цуры йӕхи зондцухӕй равдыста, кулдуарыл цыдӕртӕ хылы-мылы кодта ӕмӕ йӕ боцъойыл йӕ сӕт уагъта. 14Ахиш йӕ дӕлдӕртӕн загъта: «Ацы лӕг ӕрра у, уый нӕ уынут? Цы мӕм ӕй ӕрбакодтат? 15Ӕрратӕ хъуаг ма дӕн! Йе’рра митӕ мын цӕмӕй равдиса, уый тыххӕй мӕм ӕй ӕрбакодтат? Ӕмӕ йӕ ӕз хъуамӕ мӕ хӕдзармӕ бауадзон, нӕ?!»
Copyright information for
OssIBT2022