‏ 1 Samuel 22

Давид аразы гӕрзифтонг къорд

1Давид уырдыгӕй Адулламы лӕгӕтмӕ алыгъд. Уый куы фехъуыстой йе’фсымӕртӕ ӕмӕ йе’ппӕт хионтӕ, уӕд ӕм уырдӕм ӕрцыдысты. 2Ӕрӕмбырд ӕм сты алы ӕфхӕрд, алы хӕсджын, алы зӕрдӕрыст адӕм, иу цыппарсӕдӕ лӕджы, ӕмӕ Давид сӕ раздзог сси.

3Уырдыгӕй Давид ацыди моаваг сахар Мицпамӕ ӕмӕ Моавы паддзахӕн загъта: «Мӕ мад ӕмӕ уал мӕ фыд сымахмӕ фӕуӕнт, цалынмӕ, Хуыцау мын цы сныв кодта, уый базонон, уӕдмӕ». 4Ӕмӕ сӕ моаваг паддзахмӕ ӕрбакодта, ӕмӕ уымӕ баззадысты, цалынмӕ Давид йӕ фидары цард, уӕдмӕ.

5Пехуымпар Гад загъта Давидӕн: «Мауал бад ацы фидары, Иудӕйы зӕхмӕ ацу». Давид араст ис ӕмӕ Хереты хъӕдмӕ бацыди.

Саул амардта Новы сауджынты

6Саул базыдта Давид ӕмӕ йӕ адӕмы тыххӕй, уымӕн ӕмӕ сӕ кой кодтой алы ран дӕр. Уӕд Саул уыди Гевӕйы, къуыбырыл бадти тамариск бӕласы бын. Йӕ арц уыди йӕ къухы, йӕ дӕлдӕртӕ ӕмбырдӕй лӕууыдысты йӕ алыварс. 7Саул сын загъта: «Байхъусут-ма, Бениамины байзӕддаг! Йессейы фырт уе’ппӕтӕн дӕр быдыртӕ ӕмӕ сӕндӕттӕ, мыййаг, ратдзӕн, уе’ппӕты дӕр миныхицӕуттӕ ӕмӕ сӕдӕйыхицӕуттӕ скӕндзӕни? 8Мӕ ныхмӕ сусӕгвӕнд цӕмӕн скодтат? Куыд ничи мын фехъусын кодта, мӕ фырт ӕмӕ Йессейы фырт кӕрӕдзийӕ ӕрдхӕрдтӕ загътой, уый? Уӕ иу дӕр мын нӕ фӕтӕригъӕд кодта ӕмӕ нӕ радзырдта, мӕ фырт мӕ цагъары мӕ ныхмӕ кӕй сардыдта, цӕмӕй мын абон знаггад кӕна».

9Дзуапп ын радта едомаг Доег (уый уым Саулы иннӕ дӕлдӕртимӕ лӕууыд): «Ӕз федтон, Йессейы фырт Новы сахармӕ, Ахитувы фырт Ахимелехмӕ, куыд ӕрцыд, уый. 10Ахимелех Дунедарӕджы бафарста, Давид куыд хъуамӕ бакӕна, уымӕй, ӕмӕ йын радта фӕндаггаг, стӕй филистимаг Голиафы кард».

11Уӕд паддзах арвыста сауджын Ахимелехмӕ, Ахитувы фыртмӕ, стӕй уымӕн йе’ппӕт хӕстӕджытӕм, Новы сауджынтӕм. Уыдон иууылдӕр паддзахмӕ ӕрцыдысты, 12ӕмӕ Саул загъта: «Байхъус-ма, Ахитувы фырт!» Уый дзуапп радта: «Хъусын дӕм, мӕ паддзах». 13Саул ӕй бафарста: «Йессейы фыртимӕ мыл сусӕгвӕнд цӕмӕн скодтат? Ды йын дзул ӕмӕ кард радтай ӕмӕ йын цы кӕнгӕ у, уымӕй Хуыцауы бафарстай, цӕмӕй мӕ ныхмӕ рацӕуа ӕмӕ мын абон знаггад кӕна».

14Ахимелех дзуапп радта паддзахӕн: «Де’ппӕт дӕлдӕртӕй дыл Давидау иузӕрдион чи у? Паддзахы сиахс дӕр у ӕмӕ дӕ хъахъхъӕнджыты хицау дӕр. Дӕ хӕдзаронтӕ дӕр ӕй тынг нымайынц. 15Хуыцауы дӕр Давиды тыххӕй фыццаг хатт бафарстон, мыййаг? Кӕй зӕгъын ӕй хъӕуы, нӕ! Паддзах мацӕмӕй аххосджын кӕнӕд нӕдӕр йӕ цагъары, нӕдӕр мӕ хӕстӕджыты. Ацы хъуыддаджы дӕ цагъар мур дӕр ницы зонӕг у».

16Паддзах ын загъта: «Ӕнӕ амӕлгӕ нӕй, Ахимелех, дӕуӕн дӕр ӕмӕ де’ппӕт хӕстӕджытӕн дӕр».

17Ӕмӕ, йӕ разы чи лӕууыд, уыцы хъахъхъӕнджытӕн бардзырд радта: «Цӕугӕут ӕмӕ Дунедарӕджы сауджынты амарут! Уыдон дӕр Давидимӕ ӕмдзӕхдон сты. Зыдтой, кӕй алыгъди, уый ӕмӕ мын нӕ фехъусын кодтой». Фӕлӕ хъахъхъӕнджыты нӕ фӕндыди Дунедарӕджы сауджынтӕм сӕ къух сисын.

18Уӕд паддзах загъта Доегӕн: «Цу уӕдӕ ды амар сауджынты». Ӕмӕ едомаг Доег сауджынты ныццагъта. Уыцы бон уый амардта ӕстай фондз лӕджы, гӕнӕй уафт ефод чи дардта, ахӕмты. 19Саул карды амӕттаг бакодта сауджынты сахар Нов дӕр: нӕлгоймагӕй, сылгоймагӕй, сабийӕ, дзидзидайӕ, галӕй, хӕрӕгӕй ӕмӕ фысӕй — се’ппӕты дӕр ныццагъта. 20Аирвӕзт ма ӕрмӕст Ахитувы фырт Ахимелехы фырттӕй иу, йӕ ном — Авиафар. Алыгъди ӕмӕ Давидимӕ баиу.

21Радзырдта, Саул Дунедарӕджы сауджынты кӕй амардта, уый. 22Давид Авиафарӕн загъта: «Уыцы бон едомаг Доег уым уыд, ӕмӕ йӕ зонгӕ кодтон, Саулмӕ ӕнӕмӕнг дзырд кӕй бахӕсдзӕн, уый. Мӕн аххос у дӕ мыггаджы сӕфт. 23Баззай мемӕ, тӕрсгӕ ма кӕн. Уымӕн ӕмӕ, дӕу амарын кӕй зӕрды ис, мӕн амарын дӕр уый зӕрды ис. Фыдбылызӕй хызт уыдзынӕ мӕнмӕ».