1Sa 27 | OssIBT2022 | STEP | Давид йӕ мидзӕрдӕйы загъта: «Искуы Саулы къухӕй сӕфдзынӕн, ӕмӕ мын филистимӕгты бӕстӕм алидзынӕй хуыздӕр амал нӕй. Уӕд йӕ ныфс асӕтдзӕни Саулӕн ӕмӕ мӕ нал агурдзӕн Израилы алы къуымты, ӕмӕ дзы афтӕмӕй фервӕздзынӕн».

‏ 1 Samuel 27

Давид ӕмӕ йӕ адӕм Гаты паддзах Ахишмӕ

1 Давид йӕ мидзӕрдӕйы загъта: «Искуы Саулы къухӕй сӕфдзынӕн, ӕмӕ мын филистимӕгты бӕстӕм алидзынӕй хуыздӕр амал нӕй. Уӕд йӕ ныфс асӕтдзӕни Саулӕн ӕмӕ мӕ нал агурдзӕн Израилы алы къуымты, ӕмӕ дзы афтӕмӕй фервӕздзынӕн».

2 Уыйадыл Давид йӕ адӕмимӕ, ӕхсӕзсӕдӕ лӕгимӕ, бацыди Маохы фырт Ахишмӕ, Гаты паддзахмӕ. 3 Давид ӕмӕ йӕ адӕм ӕрцардысты Гаты, Ахишмӕ, алчидӕр — ӕд бинонтӕ. Давид царди йӕ дыууӕ усимӕ — изреелаг Ахиноамимӕ ӕмӕ Навалы идӕдз кармелаг Авигеамӕ. 4 Саулмӕ фӕхабар чындӕуыд, Давид Гатмӕ алыгъди, зӕгъгӕ, ӕмӕ йӕ нал агуырдта.

Давиды лӕггад Ахишӕн

5 Давид Ахишмӕ бахатыд: «Кӕд мӕ дӕ хорзӕхы аккаг кӕныс, уӕд мын чысыл сахартӕй иуы ратт бынат, ӕмӕ дзы ӕрцӕрдзынӕн. Дӕ цагъар демӕ, паддзахы сахары, цӕмӕн хъуамӕ цӕра?» 6 Ахиш ын тӕккӕ уыцы бон радта Циклагы сахар. Уымӕ гӕсгӕ ныронг дӕр Циклаг у иудейаг паддзӕхты сахар. 7 Давид филистимӕгтӕм фӕци афӕдз ӕмӕ цыппар мӕйы.

8 Давид-иу йӕ адӕмимӕ стӕры ацыд, ӕмӕ-иу бабырстой гешурӕгтӕм, гирзӕгтӕм ӕмӕ амалекӕгтӕм (уыдон цӕрынц Телаимӕй Шуры ӕдзӕрӕг быдыры онг, стӕй уырдыгӕй суанг Мысыры онг). 9 Давид гӕныстон кодта уыцы бӕстӕ ӕмӕ — нӕлгоймагӕй, сылгоймагӕй — се’ппӕты дӕр мардта. Байста-иу сын сӕ фыстӕ, се стуртӕ, сӕ хӕрджытӕ, сӕ теуатӕ, сӕ дарӕс.

Куы-иу раздӕхт ӕмӕ-иу Ахишмӕ куы бацыди, 10 уӕд-иу ӕй уый бафарста: «Кӕмӕ бабырстат ныр та?» Давид-иу ын дзуапп радта: «Негевмӕ, Иудейы зӕхмӕ», кӕнӕ: «Негевмӕ, йерахмеелонты зӕхмӕ», кӕнӕ та: «Негевмӕ, кенӕгты зӕхмӕ». 11 Давид-иу нӕлгоймагӕй, сылгоймагӕй се’ппӕты дӕр амардта. Гатмӕ-иу дзы никӕй ӕрбакодта, науӕд, дам, нӕ банымудздзысты ӕмӕ зӕгъдзысты: «Афтӕ ӕмӕ афтӕ бакодта Давид». Ахӕм хъуыддӕгтыл хӕст уыд ӕдзухдӕр Давид, филистимӕгты зӕххыл куы царди, уӕд. 12 Ахиш ӕууӕндыди Давидыл ӕмӕ йӕхинымӕр загъта: «Уый ахӕм уӕнгӕл фестад йӕ адӕмӕн, Израилӕн, ӕмӕ мын мыггагмӕ уыдзӕни лӕггадгӕнӕг».