1Sa 7 | OssIBT2022 | STEP | Кирйат-Иаримы цӕрджытӕ ӕрбацыдысты ӕмӕ Дунедарӕджы Фидыды Чырын сӕхимӕ ахастой. Уым ӕй къуылдымыл цӕрӕг Авинадавы хӕдзармӕ схастой, ӕмӕ йын Авинадавы фырт Елеазары хъахъхъӕнӕг сӕвӕрдтой.

‏ 1 Samuel 7

1 Кирйат-Иаримы цӕрджытӕ ӕрбацыдысты ӕмӕ Дунедарӕджы Фидыды Чырын сӕхимӕ ахастой. Уым ӕй къуылдымыл цӕрӕг Авинадавы хӕдзармӕ схастой, ӕмӕ йын Авинадавы фырт Елеазары хъахъхъӕнӕг сӕвӕрдтой.

Израилӕгтӕ раздӕхтысты Дунедарӕгмӕ

2 Фидыды Чырын Кирйат-Иаримы куы баззади, уӕдӕй рацыди ссӕдз азы. Израилы адӕм иууылдӕр, кӕугӕйӕ, Дунедарӕгмӕ се’ргом аздӕхтой. 3 Самуел сын загъта: «Кӕд зӕрдиагӕй раздӕхтыстут Дунедарӕгмӕ, уӕд ӕцӕгӕлон хуыцӕутты ӕмӕ Астартӕты уӕхицӕй аиуварс кӕнут, уӕ зӕрдӕ Дунедарӕгӕн раттут ӕмӕ иунӕг Уымӕн лӕггад кӕнут, ӕмӕ уӕ Уый филистимӕгтӕй фервӕзын кӕндзӕн». 4 Израилӕгтӕ Баалтӕ ӕмӕ Астартӕты раппӕрстой ӕмӕ ӕрмӕстдӕр Дунедарӕгӕн лӕггад кӕнын райдыдтой.

5 Самуел загъта: «Ӕппӕт израилӕгтӕ дӕр Мицпамӕ ӕрӕмбырд уӕнт, ӕмӕ уын ӕз Дунедарӕгмӕ скувдзынӕн». 6 Израилӕгтӕ ӕрӕмбырд сты Мицпамӕ, ӕвгӕдтой дон ӕмӕ йӕ Дунедарӕджы раз калдтой. Уыцы бон уым ком фӕдардтой ӕмӕ фӕсмонӕй сӕхи хордтой: «Дунедарӕджы раз фӕтӕригъӕдджын стӕм». Самуел Мицпайы сси израилӕгты фӕтӕг.

7 Мицпайы ӕрӕмбырд сты, уый филистимӕгтӕ куы базыдтой, уӕд се’лдӕрттӕ ӕд ӕфсад абырстой израилӕгты ныхмӕ. Уый фехъусгӕйӕ, израилӕгтӕ фӕтарстысты филистимӕгтӕй 8 ӕмӕ загътой Самуелӕн: «Дунедарӕгмӕ нын, нӕ Хуыцаумӕ, ӕнӕрӕнцойӕ кув, ӕмӕ нӕ филистимӕгтӕй фервӕзын кӕна».

9 Самуел райста, нырма фӕдӕгӕй иртӕст чи нӕма уыд, ахӕм уӕрыкк ӕмӕ йӕ Дунедарӕгӕн иууылсудзинаг нывондӕн ӕрхаста. Израилы тыххӕй Дунедарӕгмӕ скуывта, ӕмӕ йын Дунедарӕг йӕ куывд айста. 10 Самуел иууылсудзинаг нывонд куы хаста, уӕд филистимӕгтӕ ӕрбацӕйбырстой Израилмӕ. Уыцы бон Дунедарӕг филистимӕгты тыхджын ӕрвнӕрдӕй удаист фӕкодта, ӕмӕ дӕрӕнгонд ӕрцыдысты израилӕгты къухӕй. 11 Израилӕгтӕ рацыдысты Мицпайӕ ӕмӕ филистимӕгты суанг Бет-Кары онг сӕ разӕй цӕгъдгӕ айстой. 12 Самуел Мицпа ӕмӕ Шены ӕхсӕн ныссагъта дур ӕмӕ йӕ схуыдта Евен-Езер ^{▼▼Ома ӕххуысы дур.}. Загъта: «Ацы бынаты онг нын Дунедарӕг ӕххуыс кодта».

13 Афтӕ саст ӕрцыдысты филистимӕгтӕ ӕмӕ Израилы арӕнтӕм нал бырстой. Дунедарӕг сӕ суанг Самуелы амӕлӕты онг уӕлӕмӕ скӕсын нал суагъта. 14 Филистимӕгтӕ сӕ Екронӕй Гаты’хсӕн цыдӕриддӕр сахартӕ байстой, уыдон фӕстӕмӕ израилӕгты баисты. Израил филистимӕгтӕй ссӕрибар кодта уыцы сахартӕн сӕ алфамбылай зӕххытӕ дӕр. Уӕд Израил ӕмӕ аморӕгтӕ дӕр кӕрӕдзийы хъыгдардтой.

Самуел — Израилы фӕтӕг

15 Самуел йӕ цард-цӕрӕнбонты Израилӕн уыди сӕ фӕтӕг. 16 Алы аз дӕр-иу ӕрзылди Вефил, Гилгал ӕмӕ Мицпайыл ӕмӕ ӕппӕт уыцы рӕтты тӕрхон кодта Израилӕн. 17 Уый фӕстӕ-иу ӕрыздӕхти Рамамӕ, уымӕн ӕмӕ йӕ хӕдзар уым уыд. Уым дӕр тӕрхон кодта Израилӕн. Дунедарӕгӕн дзы сарӕзта нывондхӕссӕн.