2Ch 26 | OssIBT2022 | STEP | Амациайы бӕсты ӕгас Иудейы адӕм паддзахӕй расидтысты йе’хсӕрдӕсаздзыд фырт Озиайы.

‏ 2 Chronicles 26

Паддзах Озиа

1 Амациайы бӕсты ӕгас Иудейы адӕм паддзахӕй расидтысты йе’хсӕрдӕсаздзыд фырт Озиайы. 2 Йӕ фыды амӕлӕты фӕстӕ Озиа фӕстӕмӕ байста Елоты сахар ӕмӕ йӕ ногӕй бакодта Иудейы дӕлбар.

3 Озиа паддзах куы сси, уӕд ыл цыди ӕхсӕрдӕс азы ӕмӕ Йерусалимы паддзахиуӕг фӕкодта дыууадӕс ӕмӕ дыууиссӕдз азы. Йӕ мад уыди йерусалимаг чызг, йӕ ном — Йехоли. 4 Озиа, Дунедарӕджы раз раст цы уыди, уыдӕттӕ кодта, йӕ фыд Амациа куыддӕриддӕр уыдис, афтӕ. 5 Цалынмӕ Захариа ӕгас уыд ӕмӕ йӕ Хуыцауы тасыл ахуыр кодта, уӕдмӕ агуырдта Хуыцауы, ӕмӕ йын йӕ алы хъуыддаг дӕр ӕнтысти.

6 Иуахӕмы Озиа филистимӕгтимӕ схӕцыди, Гат, Йавне ӕмӕ Ашдоды сахартӕн сӕ систӕ ныззыгуым кодта. Ашдоды алфамбылай ӕмӕ филистимӕгты зӕххы иннӕ рӕтты сахартӕ сарӕзта. 7 Филистимӕгтимӕ, стӕй Гур-Баалы цӕрӕг араббӕгтӕ ӕмӕ меунӕгтимӕ куы хӕцыди, уӕд ын Хуыцау ӕххуыс кодта. 8 Аммонӕгтӕ Озиайӕн фыстой хъалон, ӕмӕ йӕ номы кой айхъуысти суанг Мысыры арӕнтӕм, уымӕн ӕмӕ тынг хъомысджын сси.

9 Озиа Йерусалимы мӕсгуытӕ сарӕзта: Фисыны кулдуары раз, Дӕлвӕзы кулдуары раз ӕмӕ Къуымы фисыны раз, бафидӕрттӕ сӕ кодта. 10 Мӕсгуытӕ сарӕзта ӕдзӕрӕг быдыры дӕр, ноджы скъахта бирӕ донуӕттӕ, уымӕн ӕмӕ йӕм уӕлвӕзты дӕр ӕмӕ дӕлвӕзты дӕр бирӕ фос уыди. Хӕхбӕсты ӕмӕ йӕм дӕлвӕзы уыди зӕхкусджытӕ ӕмӕ сӕндонгӕстӕ, уымӕн ӕмӕ зӕххы куыст уарзта.

11 Озиамӕ уыди хӕстхъом ӕфсад дӕр, дихгонд уыди хицӕн къордтыл. Номхыгъдтӕ сын скодтой писыр Йеиел ӕмӕ цӕстдарӕг Маасеа. Сӕ дыууӕйӕн та разамынд лӕвӕрдта Хананиа, паддзахы сӕйраг барджынтӕй иу. 12 Ӕхсарджын ӕфсады сӕргъы лӕууыдысты дыууӕ мин ӕхсӕзсӕдӕ лӕджы. 13 Ӕфсадӕн йӕхи мидӕг та уыди ӕртӕсӕдӕ авд мин фондзсӕдӕ хӕстоны, уыдон тохмӕ ӕмӕ паддзахы знӕгты ныхмӕ хӕстмӕ рацӕуынмӕ уыдысты цӕттӕ. 14 Озиа йе’ппӕт ӕфсадӕн дӕр ӕрцӕттӕ кодта уартытӕ, ӕрцытӕ, такатӕ, згъӕрхӕдӕттӕ, ӕрдынтӕ ӕмӕ дуртӕ дурӕхсӕнтӕн. 15 Йерусалимы скӕнын кодта диссаджы дӕсны арӕзт ӕхсӕнгӕрзтӕ дӕр, мӕсгуытӕй ӕмӕ сахары систы тигътӕй фӕттӕ ӕмӕ стыр дуртӕ ӕхсынӕн. Йӕ кой дардыл айхъуысти, уымӕн ӕмӕ бирӕ ӕххуыс райста, цалынмӕ йӕ хъомыс нӕ сырӕзти, уӕдмӕ.

16 Фӕлӕ куы схъомысджын ис, уӕд йе’намондӕн йӕ сӕр ӕгӕр бӕрзӕндты хӕссын байдыдта ӕмӕ Дунедарӕджы, йӕ Хуыцауы ныхмӕ, сарӕзта фыдракӕнд. Дунедарӕджы Кувӕндонмӕ бацыди, цӕмӕй будсудзӕн нывондхӕссӕныл хӕрздӕфгӕнӕнтӕ ссудза. 17 Йӕ фӕдыл мидӕмӕ бацыд алчер Азариа, йемӕ ма — Дунедарӕджы сауджынтӕй цыппарыссӕдз лӕджы, ӕхсарджын адӕм. 18 Озиайӕн йӕ размӕ ӕрлӕууыдысты ӕмӕ загътой:

— Озиа, дӕуӕн не’мбӕлы Дунедарӕгӕн буд судзын! Уый сауджынты, Аароны байзӕддӕгты, куыст у — уыдон уыцы куыстӕн сӕрмагондӕй сыгъдӕггонд ӕрцыдысты. Кувӕндонӕй ӕддӕмӕ рацу, уымӕн ӕмӕ фыдракӕнд сарӕзтай, ӕмӕ дын уый Дунедарӕджы раз кады хос нӕ уыдзӕн.

19 Озиайы къухы уыди будсудзӕн, ӕмӕ ныридӕгӕн буд ссудзынмӕ уыди цӕттӕ. Йӕ маст рафыхти сауджынтӕм, ӕмӕ, куыддӕр рамӕсты ис, афтӕ сауджынты цӕстыты раз, Дунедарӕджы Кувӕндоны, будсудзӕн нывондхӕссӕны цур, йӕ тӕрныхыл фӕзынди хъотыр. 20 Алчер Азариа ӕмӕ йӕм иннӕ сауджынтӕ куы бакастысты, уӕд ын йӕ ныхыл хъотыр федтой ӕмӕ йӕ рӕвдз уырдыгӕй ӕддӕмӕ ракодтой. Йӕхӕдӕг дӕр тагъд кодта рацӕуыныл, уымӕн ӕмӕ йӕ Дунедарӕг ӕрцавта.

21 Озиа йӕ амӕлӕты бонмӕ йӕ хъотырӕй не сдзӕбӕх ис. Царди хибарӕй, хицӕн хӕдзары, ӕмӕ йын Кувӕндонмӕ цӕуыны бар нал уыди. Йӕ фырт Йотам паддзахы галуанӕн уыди уагдар, бӕстӕйы адӕмӕн та хицауиуӕг кодта.

22 Озиайы хъуыддӕгтӕ иууылдӕр, райдианӕй кӕронмӕ, ныффыста пехуымпар Исайа, Амоцы фырт. 23 Озиа куы амарди, уӕд ӕй йӕ хъотыры тыххӕй бавӕрдтой паддзӕхты зӕппӕдзты нӕ, фӕлӕ, уыдоны фарсмӕ паддзӕхтӕн цы зӕххы хай уыди, уым, йӕ фыдӕлты зӕппадзы. Йӕ фӕстӕ паддзах сси йӕ фырт Йотам.