2Ch 30 | OssIBT2022 | STEP | Езекиа фӕсидти ӕгас Израил ӕмӕ Иудейы цӕрджытӕм. Ефрем ӕмӕ Менассиайы мыггӕгтӕм дӕр фыстӕджытӕ арвыста, фӕхуыдта сӕ Йерусалиммӕ, Дунедарӕджы Кувӕндонмӕ

‏ 2 Chronicles 30

1 Езекиа фӕсидти ӕгас Израил ӕмӕ Иудейы цӕрджытӕм. Ефрем ӕмӕ Менассиайы мыггӕгтӕм дӕр фыстӕджытӕ арвыста, фӕхуыдта сӕ Йерусалиммӕ, Дунедарӕджы Кувӕндонмӕ — Дунедарӕджы, Израилы Хуыцауы, Куадзӕнмӕ. 2 Паддзах, йӕ барджынтӕ ӕмӕ Йерусалимы дзыллӕйы ӕппӕт минӕвӕрттӕ бауынаффӕ кодтой Куадзӕны бӕрӕгбон дыккаг мӕйы саразын. 3 Йӕ афоныл ын нӕ уыди скӕнӕн, уымӕн ӕмӕ уӕд нырма, цас ӕмбӕлди, уый бӕрц сауджынтӕ нӕма ссыгъдӕг кодтой сӕхи, стӕй адӕм дӕр се’ппӕт нӕма ӕрӕмбырд сты Йерусалиммӕ. 4 Афтӕ бакӕнын паддзахмӕ дӕр ӕмӕ’ппӕт ӕмбырдмӕ дӕр раст фӕкасти. 5 Ӕмӕ сфӕнд кодтой фехъусын кӕнын ӕгас Израилӕн, Беер-Шевӕйӕ Даны онг, цӕмӕй иууылдӕр ӕрбацӕуой Йерусалиммӕ, Дунедарӕджы, Израилы Хуыцауы, Куадзӕнмӕ. Уымӕн ӕмӕ, Ӕгъдауы чиныджы куыд фыст ис, афтӕ йӕ рагӕй нал сбӕрӕг кодтой.

6 Паддзах ӕмӕ йӕ барджынты номӕй фидиуджытӕ ӕгас Израил ӕмӕ Иудейыл фыстӕджытимӕ ӕрзылдысты ӕмӕ паддзахы бардзырд хъусын кодтой: «Израилы адӕм! Уе’ргом раздахут Дунедарӕгмӕ, Авраам, Исаак ӕмӕ Израилы Хуыцаумӕ, ӕмӕ уӕд Уый дӕр Йе’ргом раздахдзӕни сымахмӕ, Ассирийы паддзӕхтӕй ма уӕ чи аирвӕзти, уыдонмӕ. 7 Уӕ фыдӕлтӕ ӕмӕ уе’фсымӕртӕ Дунедарӕгыл, уӕ фыдӕлты Хуыцауыл, иузӕрдион кӕй нал уыдысты, уый тыххӕй сӕ Уый гӕныстонмӕ ӕркодта. Уымӕн уӕхӕдӕг стут ӕвдисӕн. 8 Ӕмӕ уӕ фыдӕлтау хиваст ма ут, Дунедарӕджы коммӕ кӕсут. Ӕрбацӕут Ын Йӕ Кувӕндонмӕ, мыггагмӕ кӕй ссыгъдӕг кодта, уырдӕм. Лӕггад кӕнут уӕ Дунедарӕг Хуыцауӕн, ӕмӕ уӕ иуварс аздаха Йӕ судзгӕ маст. 9 Уе’ргом Дунедарӕгмӕ куы раздахат, уӕд уын уӕ хӕстӕджытӕ ӕмӕ уӕ цоты уацары чи райста, уыдон сӕ нал ӕфхӕрдзысты, ӕмӕ фӕстӕмӕ ацы бӕстӕм ӕрбаздӕхдзысты, уымӕн ӕмӕ Дунедарӕг, уӕ Хуыцау, бараг ӕмӕ тӕригъӕдгӕнаг у. Уе’ргом ӕм куы раздахат, уӕд уыл Уый дӕр Йӕхи нал атигъ кӕндзӕн».

10 Фидиуджытӕ цыдысты иу сахарӕй иннӕмӕ, Ефрем ӕмӕ Менассиайы зӕххытыл ӕрзылдысты, суанг Зевулоны арӕнтӕм дӕр бахӕццӕ сты, фӕлӕ сыл адӕм худӕгӕй сӕхи хастой, хынджылӕг сӕ кодтой. 11 Фӕлӕ уӕддӕр Асир, Менассиа ӕмӕ Зевулоны хӕдзарвӕндӕгтӕй чидӕртӕ ӕрныллӕг кодтой сӕхи ӕмӕ ӕрбацыдысты Йерусалиммӕ. 12 Дунедарӕг Иудейы цӕрджытыл Йӕ арм дардта, иу зондахаст сын радта, ӕмӕ сӕххӕст кодтой, паддзах ӕмӕ сын йӕ барджынтӕ Дунедарӕджы фӕдзӕхстмӕ гӕсгӕ цы бардзырд радтой, уый.

13 Дыккаг мӕй Йерусалимы Донгонд дзулты бӕрӕгбонмӕ ӕрӕмбырд ис тынг бирӕ адӕм. 14 Йерусалимы ӕцӕгӕлон хуыцӕуттӕн цы нывондхӕссӕнтӕ уыди, уыдон иууылдӕр, стӕй будсудзӕн нывондхӕссӕнтӕ ныппырх кодтой ӕмӕ сӕ Кедроны тӕрфмӕ ныппӕрстой. 15 Уый фӕстӕ, дыккаг мӕйы цыппӕрдӕсӕм бон, аргӕвстой Куадзӕны уӕрыччы. Сауджынтӕ ӕмӕ левиттӕ сӕхиуыл ӕрхудтысты, ссыгъдӕг кодтой сӕхи ӕмӕ Дунедарӕджы Кувӕндонмӕ иууылсудзинаг нывӕндтӕ’рбахастой. 16 Алчидӕр дзы йӕ бынаты ӕрлӕууыди, Хуыцауы ӕвзӕрст лӕг Моисейӕ сын цы Ӕгъдау баззад, уымӕ гӕсгӕ. Сауджынтӕ левитты къухӕй истой нывондӕгты туг ӕмӕ йӕ пырх кодтой нывондхӕссӕныл. 17 Бӕрӕгбонмӕ’рцӕуӕг адӕмӕй сыгъдӕггонд чи нӕма уыд, уыдон тынг бирӕ уыдысты, ӕмӕ левиттӕн бабар кодтой, ӕнӕсыгъдӕг чи уыд ӕмӕ уымӕ гӕсгӕ йӕ бон Дунедарӕгӕн уӕрыкк снывонд кӕнын кӕмӕн нӕ уыди, уыдонӕй алкӕй тыххӕй дӕр аргӕвдын Куадзӕны уӕрыччытӕ. 18 Адӕмӕй бирӕтӕ, фылдӕр та Ефрем, Менассиа, Иссахар ӕмӕ Зевулоны хӕдзарвӕндӕгтӕй, сӕхи не ссыгъдӕг кодтой, фӕлӕ уӕддӕр хордтой Куадзӕны фынгӕй, кӕд Ӕгъдаумӕ гӕсгӕ афтӕ не’мбӕлдис, уӕддӕр. 19 Езекиа уыдоны тыххӕй скуывта: «Хӕрзаудӕнгӕнаг Дунедарӕг ныххатыр кӕнӕд, Дунедарӕгмӕ, йӕ фыдӕлты Хуыцаумӕ, ӕппӕт зӕрдӕйӕ чи тырны, фӕлӕ Кувӕндоны ӕгъдаумӕ гӕсгӕ йӕхи ссыгъдӕг кӕнын кӕмӕн нӕ бантысти, уыдонӕн!» 20 Дунедарӕг фехъуыста Езекиайы куывд ӕмӕ ныббарста адӕмӕн.

21 Къуырийы дӕргъы Израилы адӕм, Йерусалимы чи ӕрӕмбырд ис, уыдон, тынг хъӕлдзӕгӕй ӕрвыстой Донгонд дзулты бӕрӕгбон. Левиттӕ ӕмӕ сауджынтӕ Дунедарӕгӕн алы бон дӕр кады зарджытӕ кодтой, Дунедарӕджы стауынӕн цы зӕлуадзӕнтӕ сарӕзтӕуыд, уыдонӕй цӕгъдгӕйӕ. 22 Езекиа левиттӕн се’ппӕтӕн дӕр арфӕтӕ ракодта, Дунедарӕгӕн, куыд ӕмбӕлы, афтӕ кӕй лӕггад кодтой, уый тыххӕй. Уыдон къуырийы дӕргъы кусӕртты дзидзайӕ хордтой, фидыды нывӕндтӕ хастой ӕмӕ кад кодтой Дунедарӕгӕн, сӕ фыдӕлты Хуыцауӕн. 23 Адӕмы ма бафӕндыди бӕрӕгбоныл иу къуыри бафтауын, ӕмӕ та уыцы къуыри дӕр хъӕлдзӕгӕй арвыстой. 24 Уымӕн ӕмӕ ма сын Иудейы паддзах Езекиа мин галы раттын кодта, авд мины та — лыстӕг фос. Барджынтӕ дӕр сын мин галы рахицӕн кодтой, дӕс мины та — лыстӕг фос. Сауджынтӕй дӕр ма бирӕтӕ сӕхи ссыгъдӕг кодтой.

25 Чи ӕрӕмбырд ис, уыцы адӕм иууылдӕр цин кодтой: иудейӕгтӕ, сауджынтӕ, левиттӕ ӕмӕ израилӕгтӕ, стӕй Израил ӕмӕ Иудейы ӕрцӕуӕггагӕй чи царди, уыдон. 26 Израилы паддзах Давиды фырты, Соломоны, заманӕй Йерусалимы ахӕм хъӕлдзӕг бӕрӕгбон никуыуал уыди. 27 Сауджынтӕ ӕмӕ левиттӕ адӕмӕн арфӕтӕ кодтой, ӕмӕ сын Хуыцау сӕ куывд айста, уымӕн ӕмӕ сӕ куывд ссыди уӕларвмӕ, Йӕ уаз цӕрӕнмӕ.