2Ch 7 | OssIBT2022 | STEP | Соломон куывд куы фӕци, уӕд арвӕй арт ӕрцыди ӕмӕ аныхъуырдта иууылсудзинаг дӕр ӕмӕ иннӕ нывӕндтӕ дӕр. Кувӕндон байдзаг ис Дунедарӕджы кадӕй.

‏ 2 Chronicles 7

Кувӕндон срухс кӕныны бӕрӕгбон

1 Соломон куывд куы фӕци, уӕд арвӕй арт ӕрцыди ӕмӕ аныхъуырдта иууылсудзинаг дӕр ӕмӕ иннӕ нывӕндтӕ дӕр. Кувӕндон байдзаг ис Дунедарӕджы кадӕй. 2 Сауджынтӕн сӕ бон нӕ уыди Кувӕндонмӕ бацӕуын, уымӕн ӕмӕ Дунедарӕджы кадӕй дзаг уыди.

3 Израилӕгтӕ, арвӕй арт ӕрцыд, Кувӕндон та Дунедарӕджы кадӕй байдзаг ис, уый куы федтой, уӕд дурын астӕрдыл ныддӕлгом сты. Дунедарӕгмӕ бакуывтой ӕмӕ Йӕ стыдтой: «Дунедарӕг хӕрзаудӕнгӕнаг у, Йӕ хорзӕх мыггагмӕ нӕ сӕфы!»

4 Паддзах ӕмӕ ӕппӕт адӕм Дунедарӕджы раз ӕрхастой нывӕндтӕ. 5 Паддзах Соломон стурвосӕй нывондӕн ӕрхаста дыууӕ ӕмӕ ссӕдз мин сӕры, лыстӕг фосӕй та — ӕхсӕзыссӕдз мин сӕры. Афтӕмӕй паддзах ӕмӕ адӕм иууылдӕр Хуыцауы хӕдзар срухс скодтой.

6 Сауджынтӕ ӕххӕст кодтой сӕ хӕстӕ, левиттӕ дӕр сӕ бынӕтты ӕрлӕууыдысты, кӕддӕр Давид Дунедарӕджы стауынӕн кӕй саразын кодта, уыцы зӕлуадзӕнтимӕ. Уыдон дӕр ӕй Давидау стыдтой: «Йӕ хорзӕх нӕ сӕфы мыггагмӕ!» Сауджынтӕ сӕ разы хӕтӕлтӕй цагътой, Израилы адӕм та уырдыг лӕууыдысты уыцы ран. 7 Соломон срухс скодта кӕрты астӕуккаг хай — Дунедарӕджы Кувӕндоны раз — ӕмӕ уым нывондӕн ӕрхаста иууылсудзинӕгтӕ ӕмӕ фидыды нывӕндты фиу, уымӕн ӕмӕ, Соломон кӕй сарӕзта, уыцы ӕрхуы нывондхӕссӕн утӕппӕт иууылсудзинӕгтӕ, хойраджы хуынтӕ ӕмӕ фидыды нывӕндты фиуӕн ӕгӕр гыццыл уыди. 8 Уыцы заман Соломон авд боны дӕргъы бӕрӕгбон скодта. Ӕгас Израил, ӕнӕнымӕц адӕм ӕрӕмбырд ис, Лево-Хаматӕй Мысыры тӕрфы онг чи царди, уыдон се’ппӕт дӕр. 9 Ӕстӕм бон бӕрӕгбонӕн скодтой кӕрон. Нывондхӕссӕн срухс кӕныныл ӕдӕппӕтӕй ацыди авд боны, уый фӕстӕ та авд боны — бӕрӕгбоныл. 10 Ӕвдӕм мӕйы дыууын ӕртыккӕгӕм бон паддзах Соломон адӕмы сӕ хӕдзӕрттӕм ауагъта. Уыдон цин кодтой, сӕ зӕрдӕтӕ фыр цинӕй радысты, Дунедарӕг Давидӕн, Соломонӕн ӕмӕ Йӕ адӕм Израилӕн уый бӕрц хӕрзтӕ кӕй ракодта, уый тыххӕй.

11 Афтӕмӕй Соломон арӕзт фӕци Дунедарӕджы Кувӕндон ӕмӕ йӕ паддзахы галуан, йӕ зӕрды цыдӕриддӕр саразын уыди, уыдон иууылдӕр йӕ къухы бафтыдысты.

12 Ӕхсӕвы Дунедарӕг раргом ис Соломонмӕ ӕмӕ йын загъта: «Ӕз дын дӕ куывд фехъуыстон. Ӕз ацы бынат равзӕрстон, цӕмӕй ам нывӕндтӕ хӕссой. 13 Арвы дуӕрттӕ куы сӕхгӕнон ӕмӕ зӕхмӕ доны’ртах куынӕуал ӕруадзон, тыллӕг мӕтыхтӕн куы бахӕрын кӕнон, кӕнӕ Мӕ адӕмы рыны амӕттаг куы бакӕнон, 14 ӕмӕ Мӕ адӕм, Мӕ ном чи хӕссы, уыдон, сӕрныллӕгӕй куы кувой, куы Мӕ агурой ӕмӕ сӕ фыдвӕндӕгтӕ куы ныууадзой, уӕд сӕ Ӕз фехъусдзынӕн уӕларвӕй, сӕ тӕригъӕд сын ныббардзынӕн ӕмӕ сын сӕ зӕхх сӕнӕниз кӕндзынӕн. 15 Ацы бынатӕй Мӕм чидӕриддӕр скува, уымӕ Ӕз ӕркӕсдзынӕн, йӕ куывдмӕ йын байхъусдзынӕн лӕмбынӕг. 16 Ӕз ацы Кувӕндон Мӕхицӕн равзӕрстон ӕмӕ йӕ срухс кодтон. Мыггагмӕ дзы цӕрдзӕни Мӕ ном, Мӕ цӕстытӕ ӕмӕ Мӕ зӕрдӕ ӕдзухдӕр уыдзысты уым. 17 Ды та Мын дӕ фыд Давидау куы лӕггад кӕнай, цы дын бафӕдзӕхстон, уыдон иууылдӕр куы ӕххӕст кӕнай, Мӕ уагӕвӕрдтӕ ӕмӕ Мӕ амындтытӕм гӕсгӕ куы цӕрай, 18 уӕд дын дӕ паддзахы бадӕн сфидар кӕндзынӕн, кӕддӕр дӕ фыд Давидимӕ цы фидыд сарӕзтон, уымӕ гӕсгӕ. Ӕз ын загътон: „Дӕ байзӕддӕгтӕ кӕддӕриддӕр Израилы паддзахиуӕг кӕндзысты“. 19 Фӕлӕ уын цы уагӕвӕрдтӕ ӕмӕ цы фӕдзӕхстытӕ радтон, уыдоныл уӕ къух куы ауигъат, куынӕуал сӕ ӕххӕст кӕнат, ӕндӕр хуыцӕуттӕн лӕггад кӕнын ӕмӕ кувын куы райдайат, 20 уӕд Ӕз Израилы адӕмы сӕ бындзарӕй срӕдувдзынӕн Мӕ зӕххӕй, кӕй сын радтон, уымӕй. Стӕй Мӕ номыл цы Кувӕндон срухс кодтон, ууыл дӕр Мӕхи атигъ кӕндзынӕн, ӕппӕт адӕмтӕ йыл худдзысты ӕмӕ йыл цъыфкалӕн кӕндзысты. 21 Ацы бӕрзонд Кувӕндонӕн-иу йӕ цурты чи фӕцӕйцӕуа, уый-иу стыр дисы бафтдзӕн ӕмӕ фӕрсдзӕн: „Ацы зӕхх ӕмӕ ацы Кувӕндонӕн Дунедарӕг афтӕ цӕй тыххӕй бакодта?“ 22 Ӕмӕ-иу ын дзуапп ратдзысты: „Мысырӕй сӕ чи ракодта, уыцы Дунедарӕджы, сӕ фыдӕлты Хуыцауы, кӕй ныууагътой, ӕндӕр хуыцӕутты фӕдыл кӕй ацыдысты, лӕггад кӕнын ӕмӕ сын кувын кӕй райдыдтой, уый тыххӕй сын Дунедарӕг ацы бӕллӕхтӕ бавзарын кодта“».