‏ 2 Kings 17

1Иудейаг паддзах Ахазы паддзахиуӕджы дыууадӕсӕм аз Самарийы сахары Израилӕн паддзах сси Елайы фырт Осиа. Йӕ паддзахиуӕг ахаста фараст азы. 2Йӕ размӕ чи уыди, Израилы уыцы паддзӕхтау, Дунедарӕджы зӕрдӕмӕ цы нӕ цӕуы, уыдӕттӕ кодта, фӕлӕ бынтон уыдоны хуызӕн нӕ.

3Ассирийы паддзах Салманесер ӕд ӕфсад Израилмӕ куы ӕрбабырста, уӕд Осиа йӕ дӕлбар ныллӕууыд, йӕ хъалондар сси.

4Иуахӕмы Салманесер бафиппайдта, Израилы паддзах йӕ ныхмӕ архайы, уый. Зӕгъӕм, Осиа йӕ минӕвӕртты ӕрвитын райдыдта Мысыры паддзах Со, зӕгъгӕ, уымӕ, Ассирийы паддзахӕн та ӕрвылазы хъалон нал фыста. Уӕд ӕй Салманесер ӕрцахсын кодта ӕмӕ йӕ ахӕстоны бакодта. 5Уӕд Ассирийы паддзах бабырста ӕгас Израилы зӕхмӕ, ӕрхъула кодта Самарийы сахарыл ӕмӕ йӕ ӕртӕ азы фӕстӕ, 6Осиайы паддзахиуӕджы фарӕстӕм аз, бацахста. Израилы адӕмы атардта Ассиримӕ ӕмӕ сӕ уым ӕрцӕрын кодта Халахы зӕххыл, Гозаны зӕххыл Хаворы доны былгӕрӕтты, стӕй Мидийы сахарты.

7– 8Израилӕгтӕ сӕ Хуыцауы, Дунедарӕджы, раз тӕригъӕды цӕуын байдыдтой. Кӕддӕр сӕ Уый ракодта Мысыры зӕххӕй, суӕгъд сӕ кодта фараоны ӕфсондзы бынӕй. Фӕлӕ адон фӕзмын райдыдтой, кӕддӕр сын Дунедарӕг сӕ цурӕй цы адӕмты фӕсырдта, уыдоны ӕгъдӕуттӕ, стӕй Израилы паддзӕхты ӕнаккаг митӕ. 9Дунедарӕгӕн, сӕ Хуыцауӕн, ӕхсызгон цы нӕ уыд, уыдӕттӕ кодтой, се’ппӕт сахарты, хъахъхъӕнӕн мӕсгуытӕй фидаргонд сахарты онг, кувӕн къуыбыртӕ арӕзтой сӕхицӕн. 10Алы бӕрзонд къуыбыр ӕмӕ алы къабузджын бӕласы бын табуйаг дуртӕ ӕмӕ Ашерӕйы номыл дурцӕджындзтӕ ӕвӕрдтой. 11Буд сыгътой ӕппӕт кувӕн къуыбыртыл, Дунедарӕг сын сӕ цурӕй кӕй фӕсырдта, уыцы адӕмты фӕзмгӕйӕ. Дунедарӕгӕн масты хос чи уыд, ахӕм ӕнаккаг митӕ кодтой. 12Табу кодтой, Дунедарӕг сын тобӕ кӕй тыххӕй загъта, уыцы гуымирытӕн.

13Уӕд Дунедарӕг израилӕгтӕн дӕр ӕмӕ иудейӕгтӕн дӕр фӕдзӕхсын райдыдта Йӕ алы пехуымпар ӕмӕ йӕ алы зонынджыны уылты: «Ныууадзут уе’наккаг хъуыддӕгтӕ ӕмӕ Мын ӕххӕст кӕнут Мӕ фӕдзӕхстытӕ, Мӕ уагӕвӕрдтӕ ӕмӕ Ме’гъдӕуттӕ, кӕддӕр уӕ фыдӕлтӕн, ныр та сымахӕн дӕр Мӕ пехуымпарты фӕрцы кӕй бафӕдзӕхстон, уыдон». 14Фӕлӕ адон сӕ фыдӕлтау систы хиваст. Нӕ хъуыстой Дунедарӕгмӕ, сӕ Хуыцаумӕ, сӕ зӕрдӕ Йыл нӕ дардтой. 15Суӕлӕхох Ын сты Йӕ уагӕвӕрдтыл, кӕддӕр сын сӕ фыдӕлтимӕ цы фидыд сарӕзта, ууыл, Йӕ уынаффӕтыл. Табу кӕнын байдыдтой ницӕйаг гуымирытӕн. Сӕ ницӕйаг хъуыддӕгтӕй фӕзмыдтой, Дунедарӕг сын кӕй тыххӕй фӕдзӕхста, ма сӕ бафӕзмут, зӕгъгӕ, уыдоны — сӕ алыварс цӕрӕг адӕмты. 16Сӕхи атигъ кодтой Дунедарӕджы, сӕ Хуыцауы, фӕдзӕхстытыл ӕмӕ сӕхицӕн скодтой джиппыуагъд дыууӕ уӕныджы, стӕй Ашерӕйы цӕджындз. Кувын райдыдтой арвы стъалытӕм ӕмӕ табу кодтой Баалӕн. 17Арты нывондӕн хастой сӕ фыртты ӕмӕ сӕ чызджыты, дӕсны фарстой ӕмӕ кӕлӕнтӕ кодтой. Дунедарӕджы зӕрдӕмӕ цы нӕ цӕуы, уыдӕттыл бафтыдысты, ӕмӕ Йӕ мӕсты кодтой.

18Дунедарӕгӕн Йӕ маст ссыгъд Израилы адӕммӕ ӕмӕ сыл хъоды бакодта. Сӕ зӕххыл ма цӕргӕйӕ ныууагъта ӕрмӕст Иудӕйы хӕдзарвӕндаджы. 19Фӕлӕ иудейӕгтӕ дӕр не’ххӕст кодтой Дунедарӕджы, сӕ Хуыцауы, фӕдзӕхстытӕ. Сӕ хъуыддӕгтӕй фӕзмыдтой израилӕгты. 20Ӕмӕ Дунедарӕг Йӕхи атигъ кодта Израилы ӕппӕт байзӕддагыл дӕр. Ӕрӕлхъывта сӕ, ӕцӕгӕлон адӕмтӕн-иу сӕ бастигъын кодта. Ӕппынфӕстаг сӕ фӕсырдта Йӕ цурӕй. 21Израилӕгтӕ Давиды хӕдзарвӕндагимӕ байуӕрстой ӕмӕ сӕхицӕн паддзахӕй равзӕрстой Наваты фырт Йоровамы. Уый сын се’ргом аздӕхта Дунедарӕгӕй ӕмӕ сӕ баппӕрста стыр тӕригъӕды. 22Ӕмӕ израилӕгтӕ фӕзмыдтой Йоровамы тӕригъӕдджын митӕ, фӕсте дзы нӕ задысты. 23Ӕппӕт уыдӕтты тыххӕй сӕ Дунедарӕг фӕсырдта Йӕ цурӕй, Йӕ лӕггадгӕнӕг пехуымпарты уылты рагацау куыд дзырдта, афтӕ. Израилы адӕм сӕ зӕххӕй хаст ӕрцыдысты Ассиримӕ, ӕмӕ ныронг дӕр ма уым сты.

24Ассирийы паддзах израилӕгты бӕсты Самаримӕ ӕрбакодта ӕндӕр адӕмты йӕ бӕстӕйы сахартӕй: Вавилонӕй, Кутайӕ, Аввайӕ, Хаматӕй ӕмӕ Сефарваимӕй. Уыдон бацахстой Самарийы зӕхх ӕмӕ йын йӕ сахарты ӕрцардысты. 25Фӕлӕ уым се’рцӕрыны райдиан Дунедарӕгӕй нӕ тарстысты, ӕмӕ сыл Уый домбӕйтты сардыдта, ӕмӕ сӕ уыдон мардтой. 26Уый тыххӕй фӕхабар кодтой Ассирийы паддзахмӕ. Загътой йын: «Самарийы сахарты цы адӕмты ӕрцӕрын кодтай, уыдон, уыцы зӕххы Хуыцауӕн кад кӕнын куыд хъӕуы, уый нӕ зонынц, ӕмӕ сыл Уый домбӕйтты бафтыдта; уыдон сӕ цӕгъдынц, уымӕн уыцы бӕстӕйы Хуыцауы ӕгъдау нӕ зонынц». 27Паддзах бафӕдзӕхста: «Уырдыгӕй Ассиримӕ хаст чи ӕрцыд, уыцы сауджынтӕй иуы фӕстӕмӕ ӕрбакӕнут. Уадз ӕмӕ уым цӕра ӕмӕ сӕ, уыцы бӕстӕйы Хуыцауӕн кад кӕнын куыд хъӕуы, ууыл сахуыр кӕна». 28Самарийӕ уацары кӕй акодтой, уыцы сауджынтӕй иу фӕстӕмӕ ӕрбаздӕхт ӕмӕ Вефилы ӕрцарди. Адӕмӕн амыдта, Дунедарӕгӕн кад кӕнын куыд хъӕуы, уыдӕттӕ. 29Фӕлӕ ма уыимӕ адӕмтӕ сӕхи хуыцаугӕндты дӕр сарӕзтой ӕмӕ сӕ, кӕм ӕрцардысты, уыцы сахарты сӕвӕрдтой — самариӕгтӕ къуыбыртыл кӕй сарӕзтой, уыцы куывддонты. 30Вавилойнӕгтӕ сарӕзтой Суккот-Беноты, Куты цӕрджытӕ — Нергалы, хаматӕгтӕ — Ашимайы, 31аввайӕгтӕ — Нивхаз ӕмӕ Тартакы. Сефарваимӕгтӕ сӕ мӕнгхуыцӕуттӕ Адрамелех ӕмӕ Анамелехӕн арты нывондӕн хастой сӕ фыртты. 32Уыцы иу рӕстӕг кад кодтой Дунедарӕгӕн дӕр. Сӕхи ӕхсӕнӕй равзӕрстой сауджынты, ӕмӕ сын уыдон кувӕн къуыбыртыл — сӕ куывддонты — лӕггад кодтой. 33Дунедарӕгӕн дӕр куывтой ӕмӕ сӕхи хуыцӕуттӕн дӕр лӕггад кодтой — сӕ фыдызӕххыл цы’гъдау уыдис, уымӕ гӕсгӕ.

34Ныронг дӕр Самарийы цӕрджытӕ ӕххӕст кӕнынц сӕ рагон ӕгъдӕуттӕ. Дунедарӕгӕй нӕ тӕрсынц. Нӕ Йын ӕххӕст кӕнынц Йӕ уагӕвӕрдтӕ ӕмӕ Йӕ амындтытӕ, Йе’гъдӕуттӕ ӕмӕ Йӕ фӕдзӕхстытӕ, Уый кӕддӕр Израил ном кӕуыл сӕвӕрдта, уыцы Йаковӕн кӕй бафӕдзӕхста, уыдон. 35Уыцы заман Дунедарӕг Йаковы байзӕддагимӕ сарӕзта фидыд ӕмӕ сын загъта: «Ӕндӕр хуыцӕуттӕн ма табу кӕнут, ма сын лӕггад кӕнут ӕмӕ сын ма хӕссут нывӕндтӕ. 36Кад кӕнут Мӕнӕн, сымах Йе стыр хъомысы фӕрцы ӕмӕ Йӕ хъомысджын къухӕй Мысыры зӕххӕй Чи ракодта, уыцы Дунедарӕгӕн, — Уымӕн кувут ӕмӕ Йын хӕссут нывӕндтӕ. 37– 38Цы уагӕвӕрдтӕ ӕмӕ амындтытӕ, цы’гъдӕуттӕ ӕмӕ уын цы фӕдзӕхстытӕ радтон, уыдон ӕххӕст кӕныныл уӕхи хъарут цӕрӕнбонты. Уемӕ цы фидыд сарӕзтон, уый ма рох кӕнут. Ма табу кӕнут ӕндӕр хуыцӕуттӕн. 39Кад кӕнут ӕрмӕстдӕр Дунедарӕгӕн, уӕ Хуыцауӕн, ӕмӕ уӕ Уый алы фыдгулы къухӕй дӕр фервӕзын кӕндзӕн».

40Фӕлӕ Йӕм уыдон нӕ байхъуыстой, дарддӕр дӕр хӕццӕ кодтой сӕ рагон ӕгъдӕуттӕ. 41Дунедарӕгӕн кад кодтой, фӕлӕ сӕхи гуымирытӕн дӕр кодтой лӕггад. Суанг сӕ байзӕддӕгтӕ ӕмӕ уыдоны байзӕддӕгтӕ дӕр ныронг дӕр фӕзмынц сӕ фыдӕлты.