2Ki 22 | OssIBT2022 | STEP | Иосиа паддзах куы сси, уӕд ыл цыди аст азы, ӕмӕ Йерусалимы йӕ паддзахиуӕг ахаста иуӕндӕс ӕмӕ ссӕдз азы. Йӕ мад Йедида уыди боцкатаг Адайайы чызг.

‏ 2 Kings 22

1 Иосиа паддзах куы сси, уӕд ыл цыди аст азы, ӕмӕ Йерусалимы йӕ паддзахиуӕг ахаста иуӕндӕс ӕмӕ ссӕдз азы. Йӕ мад Йедида уыди боцкатаг Адайайы чызг. 2 Иосиа кодта Дунедарӕджы фӕндон хъуыддӕгтӕ. Алцӕмӕй дӕр фӕзмыдта йӕ фыдӕл Давиды, йӕхи дзы нӕдӕр рахизӕрдӕм, нӕдӕр галиуӕрдӕм здахгӕйӕ.

3 Йӕ паддзахиуӕджы ӕстдӕсӕм аз Иосиа Дунедарӕджы Кувӕндонмӕ арвыста Мешулламы байзӕддаг Ацалиайы фырт Шафаны, йӕ нымӕрдары. Бафӕдзӕхста йын: 4 «Алчер Хилкиамӕ бацу, ӕмӕ йын банымайын кӕн, Кувӕндоны дуаргӕстӕ ныронг адӕмӕй цы’взист ӕрӕмбырд кодтой, уый. 5 Уыцы ӕвзист раттӕнт, Дунедарӕджы Кувӕндоны куыстытӕм йӕ цӕст чи дары, уыдонӕн, цӕмӕй фидой Дунедарӕджы хӕдзар цалцӕггӕнджытӕн: 6 хъӕддӕснытӕ, аразджытӕ ӕмӕ сисамайджытӕн. Хӕдзар цалцӕг кӕнынӕн хъӕдӕрмӕг ӕмӕ лӕгъзгонд дуртӕ балхӕной. 7 Ӕцӕг бӕрны лӕгтӕй дзуапп домын нӕ хъӕуы, ӕвзист куыд хардзгонд цӕудзӕн, уый тыххӕй, уымӕн ӕмӕ уыдон ӕууӕнкджын адӕм сты».

8 Нымӕрдар ацы ныхӕстӕ Хилкиайӕн куы рафӕзмыдта, уӕд ын уый загъта: «Дунедарӕджы Кувӕндоны ӕз ссардтон Ӕгъдауы чиныг».

Ӕмӕ Хилкиа уыцы чиныг Шафанмӕ радта, ӕмӕ йӕ уый бакасти. 9 Уый фӕстӕ Шафан паддзахмӕ ӕрбаздӕхт ӕмӕ йын рахабар кодта: «Дӕ цагъартӕ, сауджынтӕ, Кувӕндоны мысайнаг ӕвзист райстой ӕмӕ йӕ бӕрнылӕгты къухмӕ радтой».

10 Шафан паддзахмӕ равдыста, Хилкиа йӕм цы чиныг радта, уый ӕмӕ йын ӕй бакасти. 11 Паддзах чиныджы ныхӕстӕ куы фехъуыста, уӕд йӕ уӕлӕдарӕс арӕдывта фӕйнӕрдӕм. 12 Стӕй бафӕдзӕхста алчер Хилкиайӕн, Шафаны фырт Ахикамӕн, Михайы фырт Ахборӕн, нымӕрдар Шафанӕн ӕмӕ йӕ лӕггадгӕнӕг Асайайӕн: 13 «Цӕут ӕмӕ Дунедарӕджы бафӕрсут, ацы чиныджы цы фыст ис, уымӕй. Бафӕрсут Ӕй мӕн тыххӕй, нӕ адӕмы тыххӕй ӕмӕ ӕгас Иудейы тыххӕй. Уымӕн ӕмӕ нӕм мӕстӕй судзы, нӕ фыдӕлтӕ Ӕгъдауы чиныджы домӕнтӕм сӕ хъус кӕй нӕ дардтой, кӕй сӕ не’ххӕст кодтой, уый тыххӕй».

14 Алчер Хилкиа, Ахикам, Ахбор, Шафан ӕмӕ Асайа ацыдысты сылгоймаг-пехуымпар, Йерусалимы ног хайы цӕрӕг Хулдамӕ. Йӕ мой, Хархасы байзӕддаг Тиквайы фырт Шаллум, уыди уӕлӕдарӕсы агъуысты уагдар. Ӕмӕ паддзахы минӕвӕрттӕ фарстой Хулдайы. 15 Уый сын дзуапп радта: «Дунедарӕг, Израилы Хуыцау, афтӕ зӕгъы! Мӕнмӕ уӕ чи рарвыста, уыцы адӕймагӕн фехъусын кӕнут: 16 „Афтӕ зӕгъы Дунедарӕг: Ӕз ацы сахар ӕмӕ йӕ цӕрджыты фыдбылызы амӕттаг бакӕндзынӕн, Иудейы паддзах цы чиныг бакаст, уым куыд фыст ис, афтӕ. 17 Кӕй Мӕ ныууагътой ӕмӕ ӕндӕр хуыцӕуттӕн буд кӕй сыгътой, сӕ хъуыддӕгтӕй Мӕ кӕй мӕсты кодтой, уый тыххӕй ацы бынатмӕ Мӕ маст ссудздзӕн, ӕмӕ нӕ бамынӕг уыдзӕн“. 18 Фӕлӕ Иудейы паддзахӕн, Дунедарӕджы бафӕрсынмӕ уӕ чи рарвыста, уымӕн зӕгъут: „Дунедарӕг, Израилы Хуыцау, афтӕ зӕгъы: ды фехъуыстай, ацы чиныджы цы фыст ис, уый. 19 Ӕз ацы сахар ӕмӕ йӕ цӕрджыты ныхмӕ цы загътон, уый куы фехъуыстай, — гӕныстон ӕмӕ ӕлгъыст сӕм ӕнхъӕлмӕ кӕй кӕсынц, — уӕд дӕ дарӕс фӕйнӕрдӕм арӕдывтай ӕмӕ дӕ цӕссыг калдтай Мӕ разы. Уый тыххӕй дӕ Ӕз дӕр фехъуыстон, — зӕгъы Дунедарӕг. — 20 Ӕз ацы сахарыл цы фыдбылыз ӕруадздзынӕн, уый дӕ цӕстӕй нӕ фендзынӕ. Ӕнцад ралӕудзӕни дӕ царды кӕрон, фарнимӕ дӕ бавӕрдзысты зӕппадзы“».

Паддзахыл сӕмбӕлын кодтой ацы дзуапп.