‏ 2 Samuel 14

Йоавы курдиат Авессаломы тыххӕй

1Церуайы фырт Йоав бафиппайдта, паддзахы зӕрдӕ Авессаломмӕ кӕй фӕфӕлмӕн ис, уый. 2Текоамӕ арвыста ӕмӕ уырдыгӕй иу зонынджын сылгоймаджы ӕрбахуыдта. Загъта йын: «Дӕхи скӕуӕг кӕн. Дӕ уӕлӕ саутӕ скӕн, дӕхимӕ ма базил, раст цыма, йӕ мардыл рагӕй чи хъыг кӕны, ахӕм сылгоймаг дӕ, уый хуызӕн. 3Бацу паддзахмӕ ӕмӕ йын афтӕ ӕмӕ афтӕ зӕгъ». Йоав ын бацамыдта, цы йын зӕгъгӕ у, уый.

4Текоайаг сылгоймаг паддзахмӕ бацыди ӕмӕ йӕ разы зӕххыл ныддӕлгом ис. Загъта: «Паддзах, баххуыс кӕн!» 5Паддзах ӕй фӕрсы: «Цы дӕ хъӕуы?» Уый йын дзуапп радта: «Идӕдз сылгоймаг дӕн, мӕ мой амарди. 6Дӕ цагъарӕн ма дыууӕ фырты уыди; быдыры фӕхыл сты, ӕмӕ сӕ иргъӕвӕг нӕ фӕци, афтӕмӕй дзы иу иннӕйы ныццавта ӕмӕ йӕ амардта. 7Ныр мӕ хионтӕ дӕр мӕ ныхмӕ рацыдысты ӕмӕ мын зӕгъынц: „Йе’фсымӕры чи амардта, уый нын нӕ къухмӕ ратт, ӕмӕ дзы, кӕй бабын кодта, уый туг райсӕм; кӕд бындар у, уӕддӕр ӕй амарӕм“. Мӕ къонайы ма цы зынг баззади, уый бынтондӕр ахуыссын кӕндзысты, мӕ мойӕн йӕ ном куыд фесӕфа ӕмӕ йын зӕххы цъарыл куыд ничиуал баззайа, афтӕ». 8Паддзах сылгоймагӕн загъта: «Цу дӕ хӕдзармӕ, ӕз бафӕдзӕхсдзынӕн дӕу тыххӕй».

9Текоайаг сылгоймаг паддзахӕн загъта: «Мӕ хицау ӕмӕ мӕ паддзах, фӕстиуджыты тыххӕй дзуапдӕттӕг ӕз ӕмӕ мӕ бинонтӕ уыдзыстӕм, паддзах ӕмӕ йӕ бадӕн та ӕназым сты». 10Паддзах загъта: «Дӕ ныхмӕ дзурӕджы-иу мӕнмӕ ӕрбакӕн, ӕмӕ дӕ нал бахъыгдардзӕн». 11Сылгоймаг загъта: «Паддзах ард бахӕрӕд Дунедарӕджы, йӕ Хуыцауы раз, тугисджытӕ ноджы стырдӕр бӕллӕх кӕй нӕ сараздзысты, мӕ фырты мын кӕй нӕ амардзысты, уый тыххӕй». Паддзах ын дзуапп радта: «Дунедарӕгӕй дын ард хӕрын, дӕ фырты сӕрӕй иу ӕрду дӕр не’рхаудзӕн».

12Сылгоймаг загъта: «Дӕ хорзӕхӕй, мӕ бардарӕг, мӕ паддзах, дӕ цагъарӕн-ма иу ныхасы бар ратт». «Дзур», — загъта йын уый. 13Сылгоймаг загъта: «Дӕхӕдӕг Хуыцауы адӕмы ныхмӕ цӕмӕн архайыс? Паддзах йӕ уынаффӕйӕ йӕхи азымджын кӕны, уымӕн ӕмӕ йӕхӕдӕг, кӕй атардта, уыцы фырты фӕстӕмӕ не’рбаздӕхта. 14Мӕлӕтӕй нын алидзӕн нӕй. Зӕхмӕ цы дон ӕркӕлы, уымӕн фӕстӕмӕ сисӕн нал ис. Хуыцауы искӕй уд фесафын нӕ фӕнды, хъодыгондыл дӕр Йӕхи куыннӕ атигъ кӕна, ууыл мӕт кӕны. 15Ӕз та, адӕм мӕ кӕй стӕрсын кодтой, уымӕ гӕсгӕ ӕрбацыдтӕн, цӕмӕй мӕ бардарӕгӕн, мӕ паддзахӕн ацы ныхӕстӕ ракӕнон. Мӕхинымӕры дзырдтон: зӕгъон паддзахӕн, чи зоны, ӕмӕ сӕххӕст кӕна йӕ цагъары курдиат. 16Паддзах ӕнӕмӕнг байхъусдзӕн, ӕмӕ йӕ цагъары фервӕзын кӕндзӕни, мӕн ӕмӕ мӕ лӕппуйы амарынмӕ ӕмӕ нӕ, Хуыцауӕй нын лӕвӕрд цы у, уымӕй ӕнӕхай фӕкӕнынмӕ чи хъавы, уыцы адӕмы къухӕй. 17Дӕ цагъар йӕхицӕн хъуыдытӕ кодта: „Ныфсы хос мын фестӕд мӕ бардарӕджы, мӕ паддзахы ныхас, уымӕн ӕмӕ мӕ бардарӕг, паддзах, Хуыцауы зӕды хуызӕн у — равзардзӕни ӕвзӕр дӕр ӕмӕ хорз дӕр“. Демӕ уӕд кӕддӕриддӕр Дунедарӕг, дӕ Хуыцау».

18Паддзах ын дзуапп радта: «Цӕмӕй дӕ бафӕрсон, уый мӕ ма басусӕг кӕн». Сылгоймаг загъта: «Дзур, мӕ бардарӕг, мӕ паддзах». 19Паддзах ӕй бафарста: «Йоав ницы бар дары ӕппӕт адӕттӕм?» Сылгоймаг ын дзуапп радта: «Мӕ бардарӕг ӕмӕ мӕ паддзах цӕра, цыдӕриддӕр зӕгъай, уымӕй нӕдӕр рахизмӕ, нӕдӕр галиумӕ ис аздӕхӕн. Ӕцӕгдӕр мын дӕ дӕлдӕр Йоав бафӕдзӕхста афтӕ бакӕнын, ӕппӕт ацы ныхӕстӕ уый бацамыдта дӕ цагъарӕн, 20цӕмӕй Авессаломы хъуыддаг ахӕм ӕмбисонды хуызы ӕвдыст ӕрцӕуа. Фӕлӕ мӕ паддзах Хуыцауы зӕдау куырыхон у ӕмӕ зоны, зӕххыл цыдӕриддӕр цӕуы, уый».

21Уӕд паддзах Йоавӕн загъта: «Дӕ фӕндон дын ӕххӕст кӕнын. Ацу ӕмӕ фӕстӕмӕ ӕрбакӕн уыцы лӕппуйы, Авессаломы». 22Йоав ӕрхауди зӕххыл, ныддӕлгом ис ӕмӕ паддзахӕн раарфӕ кодта: «Ныр дӕ цагъар зоны, мӕ бардарӕг, мӕ паддзах, хорз цӕстӕй мӕм кӕй ракастӕ, уый, уымӕн ӕмӕ паддзах сӕххӕст кодта йӕ цагъары фӕндон». 23Йоав ацыд Гешурмӕ ӕмӕ Авессаломы Йерусалиммӕ ӕрбахуыдта. 24Фӕлӕ паддзах загъта: «Йӕ хӕдзармӕ цӕуӕд, йӕхи мын ма фенын кӕнӕд». Афтӕмӕй Авессалом йӕ хӕдзармӕ ӕрбаздӕхти, фӕлӕ йын паддзахы размӕ фӕндаг нӕ уыд.

Давид ӕмӕ Авессалом бафидыдтой

25Авессаломы хуызӕн рӕсугъд нӕлгоймаг, сӕрӕй къӕхтӕм — ӕнаипп, ӕгас Израилы дӕр нӕ уыд. 26Йӕ сӕры хил-иу куы адаста — дасгӕ та йӕ кодта алы аз дӕр, уымӕн ӕмӕ йыл уӕз кодта, — уӕд-иу паддзахы шекелтӕй дыууӕсӕдӕйы уӕз ӕрласта. 27Авессаломӕн рантысти ӕртӕ фырты ӕмӕ иунӕг чызг, бакастӕй тынг рӕсугъд, йӕ ном — Тамар.

28Авессалом Йерусалимы фӕци дыууӕ азы, фӕлӕ нырма паддзахы нӕ федта. 29Иуахӕмы Йоавмӕ арвыста, паддзахмӕ йӕ баминӕвар кӕнон, зӕгъгӕ, фӕлӕ йӕм Йоав не’рбацыд. Арвыста йӕм дыккаг хатт, фӕлӕ та йӕм уӕд дӕр нӕ фӕзынд. 30Уӕд Авессалом йӕ дӕлдӕртӕн загъта: «Уартӕ мӕ хуымы фарсмӕ — Йоавы хъӕбӕрхоры хуым. Цӕугӕут ӕмӕ йыл зынг бафтаут». Авессаломы дӕлдӕртӕ уыцы хуымыл зынг бафтыдтой.

31Йоав Авессаломы хӕдзармӕ бацыди ӕмӕ йӕ фӕрсы: «Дӕ дӕлдӕртӕ мын мӕ хуым цӕмӕн басыгътой?» 32Авессалом ын загъта: «Ӕз дӕм ӕрвыстон, цӕмӕй мӕм ӕрбацӕуай ӕмӕ дӕ паддзахмӕ барвитон ӕмӕ йын мӕ номӕй зӕгъай: „Цӕмӕн, зӕгъ, ӕрбаздӕхтӕн ӕз Гешурӕй? Фӕлтау уым куы баззадаин! Паддзахы куы фенин, уый мӕ фӕнды. Кӕд мӕм исты азым ис, уӕд мӕ амарӕд“».

33Йоав паддзахмӕ бацыд ӕмӕ йын йӕ ныхӕстӕ куы рафӕзмыдта, уӕд паддзах Авессаломмӕ фӕсидти. Уый ӕрбацыд ӕмӕ паддзахы раз зӕххыл ныддӕлгом ис. Паддзах Авессаломӕн аба кодта.